Четверг, марта 28, 2024
Важное

Неть читнестэ Самарань раськетнень Ялгаксчинь кудосо ютась «Мордва Самарского края: история и традиционная культура» книгань презентация. Сон лиссь мелят, нолдамонзо лездась Самарань областень Культурань министерствась.

2018 иестэ саезь книганть лангсо важодсть Самарань ды Мордовиянь специалисттнэ, весемезэ сисем ломанть. Сынст ютксо – Самарань культурань государственной институтонь теориянь ды историянь культурань кафедрань доцентэсь, этнографось, историянь наукань кандидатось Т. И. Ведерникова; Самарань областень универсальной научной библиотекань наукань коряс прявтонь полавтыцясь, историянь наукань кандидатось Н. М. Малкова; Самарань раськетнень Ялгаксчинь кудосо важодицясь, Самарань областень «Эрзянь ды мокшонь раськень-культурань региононь автономия» общественной вейсэндявксонь прявтонь полавтыцясь В. И. Алексеева (сынь ульнесть презентациясо).

Самарань ёнкссо эриця эрзятне ды мокшотне ламочист коряс аштить омбоце таркасо Мордовиядо мейле. Коллективной монографиясонть минек раськетне ванновить археологиянь, этнографиянь, историянь ёндо. Теде башка, ваннозь, кода эрить раськетне неень шкане. Ламо материалтнэ лиссть васенцеде. Книгась алтави историктненень, этнографтненень, краеведтнэнень, музейсэ, библиотекасо, культурань кудосо, школасо важодицятненень, студенттнэнень, школасо тонавтницятненень ды весенень, кить явить мель тиринь раськень культурань тонавтнемантень, ванстомантень.

Тей тердевсть районсо важодиця автономиянь филиалтнэнь прявттнэ. Весенень сыненст казевсть книгат. Тиражось аволь покш, сон максови областень библиотекатненень, вузтнэнень, эрзянь ды мокшонь вейсэндявкстнэнень. Секскак промкссонть ёвтазель мель тагояк нолдамс те книганть. Тов пурназь сюпав ды мельстуиця материал.

– Книгась лиссь 450 экземпляронь тиражсо, эйсэнзэ 336 лопат, ниле покш пелькст, улить приложеният. Тесэ пурназь пек ламо фотографият, сёрмадозь Самара ёнксонь эрзянь ды мокшонь малав весе велетнеде – кодамо иестэ сынь теевсть, косто састь васенце эрицятне, кодат ульнесть сынст коест-кирдаст, кудост-кардазост, оршамопелест, морост. Книгасонть ламо лемть, неть: учёнойть, сёрмадыцят, морыцят, масторонь ванстыцят, конат чачсть-кассть минек ёнкссо.

Эряви меремс, те изданиясь – васенце башка покш книга Самарань эрзятнеде ды мокшотнеде. Ёвтан покш сюкпря Мордовиянь учёнойтненень, книгань сёрмадыцятненень Галина Альбертовна Корнишинанень ды Татьяна Петровна Прокинанень. Вейсэ минь теинек покш тев. Книгась явшезь эрзянь ды мокшонь вейсэндявкстнэнень, курок пачкоди библиотекатненень. А стувтсынек ундоксонок, коенек-кирданок, минек покштянок-бабанок, тиринь келенек! – ёвтнесь тенек книгань авторось Вера Алексеева.

Истя жо те вастовомасонть яволявтозельть 2021 иень перть автономиянь важодемань итогтне. Сындест пачтясь общественной вейсэндявксонь прявтось Л.А. Колесникова. Областень районтнэсэ важодиця автономиятне ёвтнесть 2022 иестэ ютавтовиця кенярксчитнеде, вастовоматнеде.
Кода содатано, тедеде – Россиянь раськетнень культурань сюпавчитнень ие, секскак кармить ламо эрьва кодат покш чить. Сынь алтавить тиринь келень, раськень культурань ванстомантень ды виевгавтомантень. Маласо шкасто вастовомась карми Отрадный ошсо апрелень 16-це чистэ «Россия» Культурань кудосо.

Анокстызе
Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».