Вторник, марта 19, 2024
Важное


Россиянь Авань вейсэндявксонтень тедеде топодсть 30 иеть. Пандемиянть кувалма те покш чинть келейстэ тешкстамс эзь саво.
Теке марто эрьва регионсо ялатеке ютавтневить промкст, вастовомат. Те покш чинть вакска эзь юта Мордовиянь Авань союзоськак, кона сови Россиянь вейсэндявксос ды кандтни лем, кода «Мордовское региональное отделение». Сонзэ прявтокс ней Ольга Викторовна Игнатова.
Кавтошка таргодо икеле Мордовиянь аватне пурнавкшность конференцияв, кона ютавтозель видеоформатсо. Эйсэнзэ кемекстазель вейсэндявксонть од уставозо, кочказельть прявт куронтень совицятне.
Россиянь вейсэндявксос совиця аватне юбилеень иестэнть эзть кадово мельтеме ды казневтеме. Апакольть стувто Мордовиянь аватнеяк. Весероссиянь авань вейсэндявксонть пельде ламотнень туртов максозельть ледстнемань медальть, шнамонь конёвт, питней казнеть. Те теезель вастовомасонть, кона ютась таштамковонь 10-це чистэ С.Д. Эрьзя лемсэ музейсэ. Эйзэнзэ тердезельть аволь весе казезтне, ансяк сеть, кить топавтыть райононь авань советэнь прявтонь тевтнень. Эсест казнетнеде башка сынст вельде максозельть лиянь туртов алтазтнеяк. Кудов велявтозь, неть казнетне пачтязельть эрьвантень, кинь лемс сынь максозельть.

Пурнавозтнень туртов лембе валт ёвтась Мордовия Республикань Правительствань Председателень полавтыцясь Г.А. Лотванова. Галина Алексеевна тешкстызе: келя, аватне свал ульнесть ды кадовить ламонь содамо, паронь тееме бажицякс. Сынь, аватне, свал анокт самс лездамо эрьва тевсэ. Секс а кода а шнамс ды а кода а пандомс паросо сынст парост кисэ.

Казезтнень ютксо улить «Литова» эрзянь авань вейсэндявксонтень совицяткак. Вейкесь эйстэст «Ламзурь» ансамблясо морыцясь Р.М. Пронькина. Раиса Максимовна, иензэ лангс апак вано, свал лаки тевсэ-мелявкссо, ков сатыть виензэ лезды вельмевтемс эрзянь койтнень-кирдатнень, кезэрень моротнень. Ёвтатано тензэ пси поздоровт!

Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».