Среда, августа 17, 2022
Важное

Истямо лем ало ютавтовсь Раськень эйкакшонь литературань регионъютконь чи. Сон мольсь Саранскоень Эйкакшонь республиканской библиотекасо.
Эйзэнзэ сакшность инжеть кода эсенек Мордовиясто, истя шабра регионтнэстэяк. Сынст ютксто седе ламотне ульнесть Чувашиясто. Неть: библиотекасо важодицят, эйкакштнень туртов книгань сёрмадыцят, искусствоведт, тонавтыцят.

Вастовомась ушодозель «Раськень ояксчи» киштемасо (библиофлешмоб). Россиясо эриця раськень оршамосо оршазь зярыя од ломанть невтизь, кодамо мазый ды сюпав минек масторось. Сонзэ сюпавчизэ ламо раськетнесэ, сынст аволь вейкеть культуратнесэ, конат вейсэндязь вейсэнь сюлмосо.
Невтезельть кавто видеот. Вейкесь ёвтнесь Чувашиядо, омбоцесь – Мордовиядо.

Лембе валт пурнавозтненень ёвтасть Мордовиянь эйкакшонь библиотекань прявтось О. И. Федотова, Чувашиянь Минкультурань эйкакшонь-од ломанень библиотекань прявтось Т. Р. Григорьева.
Паро мельсэ вастозельть «Ламзурь» ансамблясо морыцятне, конат ледстизь эрзянь ды мокшонь кезэрень – «Утяша» ды «Ватта панихть» – кавто моротнень.

Седе тов пурнавозтне явовсть кавтов. Васенцетне ютавтсть вейсэнь морга экшсэ кортамот. Эйсэнзэ кепедезельть кевкстемат, конат сюлмавозь сень марто, кода неень шкасто ладязь эйкакштнень туртов книгань нолдамось. Эряви меремс, те тевсэнть меельце шкастонть эрьва косо стякшныть покштояк покш стакачить. Васенцесь ды сехте покшось – те ярмаконь арасьчись. Текень кувалма ней, келя, икелень коряс пек седе аламолгадсь книгань нолдамось. Некеть майсематнень печтить чуважонь кельсэ сёрмадыцятнеяк. Тень лангс пеняцясь Раиса Сарби сёрмадееськак, кинь лемезэ Чувашиясо сови сехте содавикс писательтнень юткс. Ведьгемень лем ало книгатнень эйстэ, зняро кенерсь нолдамо те авась эрямонзо перть, пеледест ламотне лиссть эсензэ ярмак лангс.

Тень лангс апак вано, эйкакштнень туртов книгат Чувашиясо лиснить минек коряс ков седе сеедьстэ. Тенень кемевтемакс ульнесь книгань выставкаськак, конань ускизь чуважонь инжетне весенень невтемга. Эйсэнзэ зярыя лемень книгат, конат лиссть меельце шкастонть. Ды весе сынь алтазь эйкакштнень туртов. Ламо книгатне нолдазь неень шкань вешематнень коряс. Эрьва кодамо «вальмине», «зепе» марто книгатнеде башка улить истят, косо ёвтнематнень ды валморотнень поладыть ракшань-нармунень вайгельтне. Вишка ловныцянтень саты ансяк лепштямс книганть потсо «плаштинетнень» лангс ды сонзэ пилес каятыть кодамо эряви вайгельть эли морот. Содан, ней тень эйсэ киньгак а дивавтсак. Рузонь кельсэ истят книгат умок уж нолдтнить. А вана эрзянь ды мокшонь кельтнесэ те шкас эзинь марсе. Чувашиясо, келя, умок уш нолдтнить истят книгат ды сынст вельде тонавтыть эйкакштнень тиринь келенть марямо сынст чачомстост саезь. Неть книгатнесэ лавсень моротне, «тютюшкалематне» ды лиятне-мезтне максовить ломанень вайгельсэяк.

Се чистэнть библиотекав сакшность ламо эйкакшт. Сынст туртов невтезельть зярыя мастер-класст. Вейкесэнть содавтозельть кезэрень койтнень марто, кода седикеле эрзятне ды мокшотне тешкстасть Эрьбань чинть, вастсть Инечинть.
Эйкакштне покш мельсэ ёвтнесть валморот, ледстнесть, кодат содыть ёвкст, налксесть эрьва кодамо налксемасо.

Весе, кить пурнавкшность се чистэнть Саранскоень эйкакшонь библиотекав, прасть вейкине мельс: истят вастовомат эряви ютавтнемс седе сеедьстэ. Сынь седеяк малавгавтыть Россиясо эриця раськень ломантнень, лездыть седе ламо содамс сынст культурадост, ютазь ды неень шкань эрямодост.

ЛОВНЫЦЯТНЕНЬ МЕЛЬС: Чувашиясо нолдтневи эйкакштнень туртов кулялопа (газета). Сонзэ лемезэ «Тантăш». Од ломантнень эсест журналост, кона лисни «Самант» лем ало. Теде башка, «Чувашиянь радиосо» лиснить передачат чуважонь ды рузонь кельтнесэ, конатне истя жо алтазь эйкакштнень туртов.

Чувашиянь телевидениясь истя жо покш мель яви вишкинетнень туртов. Ламо иень перть лисни «Салтарчак» (Звездочка) передачась, кона ваныцятнень содавты превей ды ёроков эйкакштнень марто. Пертьпельксэнть вечкеме ды сонзэ ванстомо эйкакштнень тонавты «Шевле» (Солнечный зайчик) невтевксэсь. Сехте вишкинетнень туртов лисни «Сывар, аптраман тавраш» (Спи, моя радость) передача.

Раиса Щанкина

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».