2026 иень июнень 22-це чистэ топодевельть бу 90 иеть профессоронть Николай Федорович Мокшинэнь чачома чистэнзэ саезь. Те чистэнть Н.П. Огарев лемсэ МГУ-со ютавтови «Этнические процессы в Поволжье и Приуралье в условиях меняющегося мира» Весероссиянь конференция – Мокшинэнь I ловномат, конат алтавить минек содавикс земляконть ледстнемга.
Сон чачсь 1936 иень июнень 22-це чистэ Горьковской (ней Нижегородской) областень Лукояновабуень Иваньбие велесэ. Прядызе Лукояновань педагогической училищанть (1954), отличия марто – Мордовской государственной университетэнь историко-филологиянь факультетэнть (1959), аспирантуранть (1962). Сон историянь наукань кандидат (1964), историянь наукань доктор (1987), доцент (1967), профессор (1989). 1962 иестэ саезь 2022 иес важодсь Мордовской государственной университетсэ, ютызе кинть ассистентстэ саезь профессоронть самс, важодсь кафедрань прявтокс (1980–2021). Сон ульнесь университетэнь этнографической музеень теицякс (панжовсь 1979 иестэ) ды Уралонь-Равчирень финнэнь-угрань раськетнень этнологиянь научно-педагогической школань панжицякс. Анокстась 2 докторт, наукань 4 кандидатт. Комсте ламо монографиянь автор, сермадсь малав 500 научной статьят, ютксост учебно-методической важодевкст.
Н.Ф. Мокшин – неень шкань Мордовиянь наукань ды культурань деятель, лемезэ содавикс аволь ансяк Мордовиясо, истя жо Российской Федерациясо ды сонзэ томбалеяк, сон – историк ды этнограф, религиовед ды ономатолог, музеевед ды географ, педагог ды общественной деятель, писатель ды журналист, исследователь ды наукань организатор. РСФСР-нь культурань заслуженной роботник, МР-нь наукань заслуженной деятель, Рузонь географической вейсэндявксонь почетной член ды Старейшинань советэнь член, Россиянь Журналистэнь вейсэндявксонь, Россиянь Писателень союзонь член, научной ды художественной ламо произведениянь автор, Финляндиянь Наукань ды литературань академиянть пингстэ фольклористэнь Раськеютконь товариществань ассоциированный член, МР-нь Огаревонь премиянь лауреат (1979), Мордовиянь Государственной премиянь лауреат (1995), МР-нь Прявтонь премиянь лауреат (2005, 2006), Дружбань Ордентнэнь кавалер (1996) ды Славань III (2011), II (2016) степентнень орденэнь лауреат, казезь «За заслуги в проведении Всероссийской переписи населения», «За заслуги в ознаменовании 1000-летия единения мордовского народа с народами Российского государства» медальтнесэ, Эрзянь ды мокшонь раськень регионъютконь общественной вейсэндявксонь «Гордость нации» почетной тешкссэ. 2021 иестэ казевсь Н.Н. Миклухо-Маклай лемсэ Сырнень медальсэ.
Н.Ф. Мокшин – лия енов а молиця специалист, сон ванкшнось научной истят енкст: этнической историянть ды историографиянть, этнической ономастиканть ды картографиянть, этнической религиоведениянть ды этномифологиянть, этнической культорологиянть ды краеведениянть. Пек сюпав поэтической творчествазо, стихензэ кармасть содавикс морокс (авторось нолдась моро марто кавто дискт). Музыканть сермадызь Мордовиянь ды Россиянь композитортнэ – Г.И. Сураев-Королев, Г.Г. Вдовин, Н.Н. Митин, В.Ф. Овчинников, Н.Н. Балашкин, В.И. Веряскин, М.Н. Фомин, Н.П. Спиркин, Н.В. Маркова. Эрзянь ды мокшонь раськень художественной творчествасо те кармась профессиональной башка пельксэкс. Н.Ф. Мокшинэнь произведениянзо вечкевикст, сынст морсить покш залтнэсэ, сынь совасть Мордовиянь содавикс морыцятнень репертуарс: Н. Марковань, А. Атласовань, Н. Спиркинань, Г. Макшевань, Н. Виряскинань, Е. Воронинань, С. Колесниковань, «Келу», «Ламзурь» ды лия ансамблятнень. Сонзэ редакция ало нолдазь поэтической ды музыкальной сборниктне, конат алтазь Саранск ошонтень, ков совасть Мордовиянь профессиональной ды самодеятельной поэттнэнь стихест.
Н.Ф. Мокшинэнь покш путовксозо образовательной тевентень, сон ульнесь Н.П. Огарев лемсэ МГУ-нь Россиянь историянь кафедрань прявтокс, «Этнография финно-угорских народов» магистрань программань научной ветицякс, «Этнография: теория и методология», «Формирование и развитие мордовского этноса», «Финно-угорская (уральская) фольклористика», «Национальная политика России: история и современность» тонавтнемань профильной дисциплинатнень разработчикекс, сынь кармасть РФ-нь педагогической мастерствань пек вадря невтевксэкс. Ламо иень перть сон ульнесь паксянь этнографической практикань ветицякс, тонавтсь студенттнэнь-историктнень научно-исследовательской тевтнес.
Н.Ф. Мокшин кемекстызе «Замечательные представители мордовской интеллигенции» сериянть, конасонть сон ванкшнынзе эрзянь ды мокшонь раськень государственной, научной ды общественной деятельтнень сюпавчист. Истя, 2016 иестэ лиссь «Во благо народа» важодевксэсь, конасонть авторось васенцеде тонавтнинзе, ванкшнынзе ды пачтинзе ловныцятненень З.Ф. Дорофеевень эрямонь ды творческой кинзэ теде икеле асодавикс факттнэнь.
Содавикс педагогтонть А.А. Куманевдо (1910–1975) публикациятне пештязельть од даннойсэ. Те ломанесь тонавтсь ламо студентт Лукояновань педагогической училищасо, трясь-кастсь кавто церат – РАН-нь академикенть Георгий Александровичень (1931–2018), сон содавикс кода Ине Отечественной войнань историк, ды РАН-нь член-корреспондентэнть Виктор Александровичень (1931–1994) – советской культурань историянь содыця, Россиянь народной образованиянь стакачитнень исследователь. Н.Ф. Мокшин поладсь ванкшномо-тонавтнеме эрзянь содавикс просветителенть М.Е. Евсевьевень важодевксэнзэ («М.Е. Евсевьев: жизнь мордвы в фотографиях. Конец 19 – начало 20 в.», Саранск, 2017).
Научной покш тев тейсь Н.Ф. Мокшин политико-религиоведческой исследованиятнесэ, конат кемекстызь РПЦ-нь Мордовиянь митрополиянть, сонзэ теевемантень истя жо явсь мель. Сон ванкшнынзе Митрополитэнть Антоний Вадковскиень духовной сюпавчинзэ («Митрополит родом с Вада», 2016), Россиясо внешне-церковной ды общественной служамонзо. 1903 иестэ сон ульнесь Серафим Саровскиень канонизациянь ды мощанзо панжомань тевтнень ушодыцякс.
Авторось покш мель явсь Московонь ды Весе Русень Патриархонть Никононь историясо путовксонть ванномантень. «Патриарх Никон – просветитель мордовского народа» (2017) важодевкссэнть сон эрьва ендо панжинзе те содавикс деятеленть новаторстванзо, реформаторствань прогрессивностензэ. Кафедрасо Н.Ф. Мокшин ютавтсь научно-практической мероприятият: «Вадковские чтения» (2016), «Никонианские чтения» (2017), конференция, конась алтавсь протопопонть Аввакумонь чачома чистэнзэ саезь 400 иетненень (2020).
Россиянь пассионарийтнень антропологиянь ванномань текшокс кармась общественной деятеленть, ученоенть М.И. Сумгинэнь профессиональной ды эрямонь кинзэ тонавтнемась. Паро коекс ладявсь 2018 иестэ саезь ютавтомс Мордовской госуниверситетсэ «Сумгинэнь ловноматнень». Наукасо покш путовкстнэнь кисэ М.И. Сумгинэнь лемезэ совавтозь наукань содавикс деятельтнень Раськеютконь банконтень, Астрономической раськеютконь союзось сонзэ лемсэ лемдизе Марс планетасо кратерэнть. Сумгинэнь научной сюпавчинть ванкшномась панжи ламо мезе од Мордовиянть ды эрзятнень-мокшотнень масторлангонь келес популяризациянть туртов.
Те енкссонть вадря муевкст тейсь Н.Ф. Мокшин «Просветители мордвы» монографиясонть, сон лиссь Саранскойсэ 2020 иестэ (Ю.Н. Сушковань соавторстванть марто). Вадря рецензия тень коряс нолдась «Вестник антропологии» журналсо антропологось, профессорось, РФ-нь наукань заслуженной деятелесь М.Ю. Мартынова. Теке марто, эрзянь ды мокшонь интеллигенциянть пек паро плеяданть ванкшнозь, сон сонсь умок теевсь эсь раськень лия енов а молиця сюпавчикс (брендэкс), неень шкань пассионариекс.
Сон анокстась фундаментальной научно-исследовательской зярыя важодевкст, конат алтазь эрзятнень ды мокшотнень этногенезэнтень ды этнической историянтень, сонзэ этноструктурантень, лия раськетнень марто этногенетической ды этнокультурной сюлмавоматненень.
Покш мель явозь эрзятнень ды мокшотнень этнической процесстнэнь ванкшномантень, мезесь келейстэ тевс нолдави Эрзянь-мокшонь регионъютконь общественной вейсэндявксонть, национально-культурной автономиятнень ды целанек эрзятнень ды мокшотнень раськень общественно-политической движениянть важодемасо.
2020 иестэ «Финно-угорский мир: опыт системного анализа» покш изданиясонть Н.Ф. Мокшинэнь лиссть паро материалт Россиянь финнэнь-угрань раськетнень неень шкань эрямодост. Кода специалист, сон свалшкане ловнось лекцият, кортась Мордовиядо ды эрзятнеде-мокшотнеде республикань томбале, седеяк пек тосо, косо эрить неть раськетне.
Н.Ф. Мокшин покш мель явсь эрзянь ды мокшонь этничностень ды государственностень прявт этаптнень ванкшномантень, кемекстызе ютазь, неень ды сы шкань «мордовской национальной идеянть», мезесь тевс нолдави научно-практической тевтнесэ, эрзятнень ды мокшотнень Россиянь лия раськетнень марто исторической ды культурной сюлмавоманть кемекстамосо. «Мордовский народ в истории и культуре Российского государства» книганть кисэ сон кармась «Литературная Мордовия: лучшая книга на родном языке» республикань конкурсонь лауреатокс («Лучшее издание о Мордовии» номинациясь, Саранск ош, 2016). Теке жо книганть кисэ Равчирень финнэнь-угрань раськень культурань центрась яволявтызе изницякс «Лучшая книга на родном языке» республикань пелькстамосо («Лучшее издание, вносящее вклад в диалог культур» номинациясо, 2017).
Николай Федоровичень покш путовксозо Рузонь географической обществань Мордовиянь отделениянть теемасо. Сон – те вейсэндявксонть почетной член ды Старейшинань советэнь член. Старейшинань советэнь покш промксонь ютавтыцяль, конась ульнесь 2018 иень октябрясто Саранскойсэ. Н.Ф. Мокшинэнь авторитетэзэ макссь покш лезкс Мордовиянтень Рузонь географической обществанть пельде гранттнэнь саемасо ды топавтомасо.
Н.Ф. Мокшин лововсь финно-угроведениянь кевкстематнень коряс умонь экспертэкс. Сеедьстэ тензэ пшкалесть научной косультированиянь коряс республикань государственной властень органтнэ, зярдо эрявсь муемс ояксчинь сюлмот омбо масторонь ломантнень ды содавикс финно-угроведтнэнь марто. Сон истя жо ванкшнынзе эрзянь ды мокшонь раськень этнографияст коряс финнэнь исследовательтнень важодевксэст (2019). Вейсэндинзе ды кемекстынзе финнэнь-угрань раськетнень рузонь ды масторлангонь культурантень путовксост (2020).
Н.Ф. Мокшин – Россиясо содавикс специалист, кона ютавтсь научной экспертиза эрьва кодамо енкстнэнь коряс – историянть, этнографиянть, политологиянть, социологиянть, философиянть, культурологиянть, ономастиканть ды лиятнень. Сон важодсь «Социально-политические науки», «История и современное мировоззрение (Москва), Finno-Ugrica (Казань), «Финно-угроведение» (Йошкар-Ола), «Краеведческие записки», «Гуманитарий» (Саранск) журналтнэнь редколлегиянь членэкс.
Н.Н. Миклухо-Маклай лемсэ РАН-нь Этнологиянь ды антропологиянь институтонть марто ламо иень перть вейсэ важодезь, Н.Ф. Мокшинэнь прявт роботанзо теезельть оцифрованной форматсо Россиянь покш библиотекатнесэ. Те седеяк кемекстызе Мордовиянь исследовательтнень имиджест. Академической ды энциклопедической изданиятнесэ финнэнь-угрань раськетнеде Н.Ф. Мокшинэнь публикациянзо нолдавить одс истя, кода сон витнекшнынзе ды совавтсь од вариантт. Ютксост – Равчирень ды Приуральянь раськетнень этнической ды культурной касомаст коряс кевкстематне.
Башка валт эряви евтамс Н.Ф. Мокшинэнь лия енов а молиця теевкстэнзэ, кода «Паспорт мордвина» справочникесь-путеводителесь. Сон пачти эрзятнень ды мокшотнень башкачидест. Паспортось казевкшни Мордовиянь инжетненень, минсенек ломантненень, кить тейсть покш путовкс неень шкань Мордовиянь экономикантень ды культурантень. Справочникесь аволь весть нолдазель одс, те корты сонзэ эрявиксчиденть.
Николай Федоровичень важодевксэнзэ неень шкане тевс нолдавить общеобразовательной учреждениятнесэ. Сынь содавтыть тонавтницятнень Россиянь раськетнень, самобытной историянть, материальной ды духовной культуранть, общественной ды семиянь бытэнть, Пазнэнь кемеманть ды койтнень марто. Те пек эряви од ломантнень патриотической лувсо тонавтомасо-кастомасо, истя ладявить ды кемекставить раськетнень ютксо тевтне.
Н.Ф. Мокшинэнь творческой тевезэ келей ды покш, кода научной, истя жо литературно-художественной сферасо. Покш мель сон явсь «Масторава» эпосонть витнемантень (пурныцятне Г.Я. Меркушкин, В.В. Горбунов, А.Д. Шуляев ды А.М. Шаронов). Те кармась лия енов а молиця произведениякс, конась теезь эрзянь ды мокшонь раськень фольклоронть юрсо, сон кемекставсь кезэрень пингестэ саезь.
Ю.Н. Сушкова, историянь наукань доктор, профессор.