Апрелень меельце читнестэ Пензасо ютась «Финно-угрань мазыйка» пелькстамо, конань анокстыцякс кармась те ёнксонь Эрзятнень ды мокшотнень национально-культурной автономиясь (прявтось Елена Первушкина).
Конкурсось ютась М. Ю. Лермонтов лемсэ библиотекасо, косо анокстазель эрзянь ды мокшонь оршамопелень, книгань, кезэрень кудоютконь ули-паронь выставка. Инжетнень вастсть зярыя фольклорной коллективть, конатне морсесть морот, ютавтнесть квестт ды налксемат культурань, историянь коряс.
Конкурсонтень пряст яволявтызь Сура лей ёнксонь 14 иестэ саезь 25 иес вете од тейтерть: Алина Баранова, Виктория Дарькина, Юлия Арбари, Елена Цыганова ды Валерия Антонова. Сынь невтизь эсест мазычист, докачист, эрзянь ды мокшонь кельтнень содамочист, тиринь ёнксонь койтнень-кирдатнень. Сынст мельга вансь тевень содыця жюри, козонь совасть Пензань губернаторонь советникесь, региононь Касомань-кемекстамонь институтонь проректорось Владимир Первушкин, Мокшонь ды эрзянь раськень регионъютконь общественной вейсэндявксонь прявтось Юрий Мишанин, филологиянь наукань докторось Ольга Налдеева, культурологиянь кандидатось Татьяна Сидоркина, «ДаншиноFest» весероссиянь историко-культурной фестивалень арсицясь Николай Пиксин.
Весе пелькстамотнень ютазь, изницякс кочказель Наровчатовской райононь Од Пичуры велестэ Елена Цыганова. Сонензэ максозель ваныцятнень пельде призэськак. Омбоце степенень дипломось сатотсь Бессоновской райононь Кижеватовасто Алина Баранованень, колмоцекс кармась Камешкирской райононь Чумаёво велестэ Виктория Дарькина. Весе казезельть питней казнесэ, конатне рамазельть Пенза ёнксонь Правительстванть лездамонзо вельде.
Конкурсось вейсэндинзе весень, морсеме сакшность натой «Лукоморье» эйдень кужонь эйкакштнеяк. А пелькстамотнень ютксо морот морсесть-киштсть Пенза ёнксонь «Яксярочка», «Лучинушка», «Забава», «Лейне», «Лаймоне», «Келу» ансамблятне ды лият. Мордовиясто мазый оршамопелест невтизь «VARMA» этно-арт-театрань модельтне.
Ламо тевть тейсть конкурсонть анокстамсто автономиянть од ломанень отделениянь тейтертне-цёратне: Елена Борискина, Николай Кадкин, Ирина Круглова, Елена Прокаева, Анна Гурина, Анна Чебакова, Лилия Кадкина, Александр Гущин, Николай Ермаков, Ксения Стенькина, Дарья Маринина, Ирина Девяткина, Марина Несяева, Мария Зоткина.
Марина Девятова