Вана ардтано Ромодановав ветиця кияванть, конань кавто ёнга ацазь ацавсть келей пиже паксятне, мерят, песткак а неявить, овсе токасть певтеме сэнь менелентень. Те кинть эзга тень савкшнось ардтнемс эштё студентэкс улемстэ, зярдо группанек университетсэ тонавтнемань шкасто сайнимизь Ромодановань райононь «Красный узел» совхозов якстерькаень таргамо.
Ламо ведь чудсь се шкастонть саезь, ялатеке ардомань перть мекс-бути се од, студентэнь шкась ледсь мелезэнь, ды мон, теке мерят, таго чопавтинь те мазый шкантень, конась терди эйсэнь прянь кепедезь икелев молеме, максы сёлмот, кецямо, уцяска, од эрямонь вийть ды покштояк покш кемема…
Вана истямо кенярксов ёжо марто пачкодинек Ромодановань райононь Администрацияв. Минек вастымизь Администрациянь прявтось Сергей Валентинович Ведяшкин ды сонзэ полавтыцязо Виталий Сергеевич Кузнецов. Сеске теевинек содавиксэкс, ёвтынек меленек-арсеманок, ды прявтонь полавтыцянть Виталий Сергеевич марто сыргинек культурань ды оймсемань парконть ёнов. Шкась ульнесь эштё валске марто, ялатеке парконь важодицятне уш тейсть эсест тевест: кие тенсесь, кие ванськавтсь эрькень веденть, кие кочкась зыянов тикшетнень ды валнось мазыйдеяк мазый цецятнень. Вана мон эзинь кирдеве таркасон, зярдо неия сэрей фонтанонть, конась эсензэ эрексиянь кондямо ванькс ведензэ ёртсь верев – менелентень. А кодамо паро фонтанонть вакссо оймсемань таркась: веденть эйстэ моли экше кошт, перьканзо касыть пиже чувтот ды мазыйдеяк мазый цецят.
Ютынек седе тов, икеленек вастовсь мазыйстэ теезь вишкине сэдне, конань эзга ютамсто эряви эсеть потмова арсемс кодамояк мель-арсема, конась, паряк, мейле топавтови. Вакссонзо ашти одирьвань-женихень оймсемань эзем, тезэнь свадьбань чистэ од полатне сакшныть сень кисэ, штобу эсест кудораськень эрямосост улемс седе уцяскавокс ды сюпавокс. Филатов лемсэ оймсемань парксонть ули покш сцена, конань лангсо ютавтовить райононь мероприятиятне, тесэ касыть чуросто вастневиця чувтот: сэньшт мериця кузт (рузкс голубая ель), каштант, туят. Теезь брусчаткасо ацазь ян, фонтан марто эрьке... Вана пачкодинек «Славань Аллеянтень»! Тесэ лангозонок ваныть Ине Отечественной войнасо маштовозтненень кеврунготне, конатне, теке мерят, одов вельмить, а сынст кеме вановтост, мерят, максыть тенек ламо эрямонь вийть ды тердить апак пеле икелев молеме. Вана каштмолезь аштетяно Свал палыця толонть икеле. Каштмолезь, эрьвась эйстэнек ледстинзе мельсэ-превсэ эсензэ покштянзо-раськензэ, конатне виест ды эрямост апак вансто тюрсть войнань паксятнесэ минек валдо ды уцяскав эрямонок кисэ.
Нама, те иень тунда весе масторонок келес сравтовсь стакадояк стака ормась, кода, рузкс мерить, коронавирусось, конась ламонть полавтызе весе масторонь ломантнень эрямосост. Ялатеке, покш стакачитнень ды зыянтнэнь лангс апак вано, ломантне бажить изнямс те орманть, эрьва чистэ молить икелев, важодить эсест тевсэст. Ромодановань райононь эрицятне эсест прявтост марто вейсэ теить эрявикс тевест: кандыть лезэ аволь ансяк республиканть, весе Россиянть туртов. Эрьвась важоди эсензэ вечкевикс тевсэнзэ, эдь Ромодановань районсо ули весемесь ломантненень седе вадрясто эрямга ды оймсемга: вадря школат, од эйдень кужот, Эень дворец, покш спортивной стадион, Культурань кудо, эйкакшонь искусствань школа, краеведениянь музей, Филатов лемсэ оймсемань парк. Сынь весе теезь Нацпроектэнть вешематнень коряс, штобу велень ломантнень эрямост улевель седе паро ды шожда. Пандемиянь шканть лангс апак вано, Ромодановань районсо теезельть ламо тевть «Культура», «Общественная территория, городская среда», «Благоустройство территорий» национальной проекттнэнь топавтомга.
Мила БОГАТОВА