Теевтяно содавиксэкс минек героинянть марто. Тейтеренть чачома ёнксозо – Орданьбуень райононь Тургенева посёлкась. Весе минь содатано, те районось пек сюпав кедьчелькев ды ёроков ломаньсэ. Мордовиясо вейкеяк кенярксчи а ютни Орданьбуень райононь кедьчелькевтнень выставкавтомо. Сынь свалшкань инжеть республикань фестивальтнесэ ды пелькстамотнесэ. Истя, тиринь райононь ёроков ломантнень марто вейсэ Екатерина Щеглова невтизе эсь докачинзэ «Шумбрат, Мордовия!» раськень творчествань республикань фестивальсэ. Катя эзь арсекшнеяк, кода те фестивальденть мейле полавтови эрямозо. Тейтересь вейке чистэ теевсь содавикс кедьчелькев ломанекс весе Мордовиянть келес ды мик сонзэ томбалеяк.
– Фестивалентень мон анокстакшнынь выставка ды мастер-класс. Чинть перть монь столенть экшсэ ульнесть зярыя ломанть. Эрьвась эйстэдест бажась тонавтнемс артомань салавачитнень. Нама, ве чис истямо тевентень а тонадат. Ансяк мон неинь, кодамо покш мель марто инжетне кундыть тевентень, ды весе седейсэ бажинь лездамс тенст ды тонавтомс, – ёвтни тейтересь. Екатеринань матрёшканзо аволь покшт. Сынь явовить колмов: веенстнэ – брелокт, омбонстнэ – сюлгамот, колмонстнэ жо – магниткеть. Матрёшкатне а молить вейкест-вейкест ёнов. Улить раськень оршамопельсэ ды сельмукшсот, лиясь жо кедьсэнзэ кирди неень шкань юдмине эли газета. Теде башка, тейтеренть коллекциясо улить ярсамопелень керсемань туртов лазт, менажницат, телефононь ды пенч алов путомкат. Неть теевкстнэнь лангсо артозь ривезть, эрзянь, мокшонь ды татаронь тейтерькат-мазыйкат ды тешкстазь «Шумбрат!», «Вечкевикс аванень», «Мордовиясто вечкема марто» ды ламо лия сёрмадовкст. Ёвтатано, тейтересь важоди анок макетт марто. Седе сеедьстэ тевс нолды пекшень, тумонь ды бук чувтосто теезь макетт. Васняяк сонзэ лангс арты карандашсо, седе тов ушоды артомонзо краскасо (акрилсэ эли жо гуашсо). Теевкстнэнь мазылгавты раськень тешкссэ, те мазычинть а коламга, эрьва изделиянть вельтясы эпоксидной смоласо. Эрьва теевксэнтень Екатерина путы седейлембензэ. – Теде икеле мон а вейке ие артынь точечной росписьсэ тарелкат. Чарькодеви, сынь теевсть кода сувенирт, ярсамс лангсост а мереви. Теде башка, мон варчния прям кенжень мазылгавтомасо. Те тевсэнть котьминь зярыя иеть, налкстынь. Мон зярдояк а аштян вейке таркасо, свал бажан касомс эсь шкинемасонть. Тонавтнян артомань од ёнкст ды техникат, – корты тейтересь. Неень шкасто Екатерина важоди Орданьбуень 1-це № Искусствань школасо декоративно-прикладной творчествань ёнкссо тонавтыцякс. Те профессиянть сон кочкизе а стяко. Вишка шкасто саезь тейтерькась бажась улемс тонавтыцякс. Эсь ёрокчинзэ васенцеде невтизе эштё школасо тонавтнемстэ. Катя пек вадрясто артыль стенгазетат. Теде башка, покш мель явиль райононь ды республикань артомань коряс пелькстамотненень. Сонзэ лемезэ свал ульнесь изницятнень ютксо. Школанть прядомадо мейле кочкизе Ицялонь педагогической училищанть, косо тонавтнесь «Дизайн» специальностенть коряс. Педучилищадо мейле заочна тонавтнесь М. Е. Евсевьев лемсэ МГПУ-со ды секе жо шкастонть ушодсь важодеме тонавтыцякс. – Эйкакш марто важодемась канды эрямозон кеняркс. Мон роботан малав 50 эйкакш марто. Эрьва занятиясо бажан тонавтомс эйкакштнень мезескак одс. Чарькодеви, важодемс зняро эйкакш марто а шожда. Эрьвантень эряви муемс башка ёнкс, эряви маштомс панжомс эйкакшонть ёрокчинзэ. Кинень-бути явома седе ламо шка, лиясь жо невтьсы прянзо сеске. Мон важодян вете иестэ саезь кеветее иесэ эйкакштнень марто. Вишкинетнень марто седеяк вечкеви роботамс. «Нармушкатне» ваныть лангозот теке эсест аваст лангс. Кунсолыть эрьва валонть, бажить топавтомс тевест валанясто, – ёвтни Екатерина. Занятиятнесэ тонавтыцясь эйкакштнень марто тейни конёвонь салфеткасто покш ды мазый паннот, арты куш кодат композицият. Неть важодевкстнэнь эйстэ седе ламотне теевить православной тематнень коряс. Эйкакштненень те ёнкссонть роботамс пек вечкеви. Сонзэ тонавтницятне свалшкань изницят райононь ды республикань пелькстамотнесэ. Кода тешксты минек героинясь, Орданьбуесэ пек ламо ёроков эйкакшт. Те кенярдовты, тиринь ёнксонь кедьчелькев ломантнень улить поладыцяст. Арсетяно, ловныцятнень чачи кевкстема, косто Екатеринань истямо ёрокчись? Ёвтасынек, тейтеренть семиясо улить кедьчелькев ломанть. Катянь тетязо, Евгений Михайлович, кадык аволь артыця, ансяк эсь кедьсэнзэ теи эрьва мезе. Вана аволь умок сон уськестэ тейсь колмо сярдот. Уськень конструкциянть пачка нолдась гирляндань чова кирькске ды лиссь истямо мазычи, валсо а ёвтневи! Теде башка, Евгений Михайлович ламо мезе теи кудонь перька. Саемга, ськамонзо строясь оймсемань туртов чувтонь беседка. Тетядонзо башка, Екатеринань семиясо ульнесь эштё вейке ёроков ломань – покштязо. Сон рисовиль мазый картинат, седе сеедьстэ пейзажт. Катя ледстни, покштязо артыль натой акварельсэяк.
Неень шкане Екатеринань пек покш мелезэ седе домкалгавтомс эсь творчестванть. Тейтересь бажи важодемс вейсэ райононь кодамояк кедьчелькев ломань марто. Эдь истямо вейсэнь тевесь свал панжи творческой од кить-янт. Алена Артемьева
Фототне саезь Е. Щегловань архивстэ.