Ине Отечественной войнась нельгсь ламодояк ламо эрямот. Арась истямо ош ды веле, косо бу авольть ледстне эсест героест. Ды минек тевенек – а стувтнемс сынст ине подвигест, конась теезь минек валдо эрямонок кис.
Дубенкань райононь тиринь Кобале велень поселенияс сови Турдаково велесь, косо чачсь Советской Союзонь Героесь Николай Михайлович Бровцев. Мартонь 30-це чистэ сонензэ чачома чистэнзэ саезь топодить 110 иеть. Интернет-энциклопедиятнень ванномсто, муевсь домка информация эрямодонзо ды войнань шкань тевдензэ.
Николай Бровцев чачсь 1915 иестэ сестэнь Россиянь империясо, Симбирской губерниянь Алатырень уездэнь Тыргак велесэ сокицянь-видицянь кудораськесэ. 1932 иестэ Кобале велесэ прядсь школань сисем класст, мейле важодсь слесарекс Нижегородской областень Дзержинск ошонь «Химмаш» заводсо. 1937 иень октябрясто Дзержинскоень военной комиссариатонть пельде тердезель служамо Важодицянь ды сокицянь-видицянь Якстере Армияв. Прядсь полковой школа, ютась младшей лейтенантонь курсат. 1941 иень декабрянь 27-це чистэ саезь Ине Отечественной войнань фронттнэсэль. Ульнесь Северэнь, Карелэнь, Западонь ды 3-це Белорусской фронтнэсэ. Теде башка тюрсь финнтнэнь каршояк, олякстомтсь Смоленскоенть. Котоксть ранязель.
1945 иень апрельстэ саезь Николай Бровцев капитанось ульнесь 923-це стрелковой полконь стрелковой батальононь прявтокс (3-це Белорусской фронтонь гвардиянь 2-це армиянь 251-це стрелковой дивизия). Пек парсте невтизе прянзо Восточной Пруссиясо тюрематнесэ.
1945 иень апрелень 15-це чистэ Пальмникен веленть эйстэ (ней – Калининградской областень Янтарной поселкась) а васоло немецень ушмотнень пехотань ды танкань покш вийтне Флангервальд вирьсэнть каявсть советской подразделениятнень лангс. Те тюремасонть Бровцевень батальонозо кандсь покш емавкст. Ледницянь группань прявтокс улемстэ Бровцев кемекставсь сэрей таркасо ды пурнась-тейсь круговой оборона, каршо молицятнень ланга леднесь пулеметсто. Чавовсь теке тюремасонть. Калмазь Калининградской областень Зеленоградской райононь Русское велесэ.
1945 иень июнень 29-це чистэ СССР-нь Верховной Советэнь Президиумонть кармавтомасо тешкстазель: «батальононть парсте ветямонзо кис, апелемачинть ды героизманть кис, конатне невтезельть Восточно-Прусской операциясонть» Николай Бровцев капитанонтень куломадо мейле максозель Советской Союзонь Герой покш лемесь. Теке марто казезель Ленинэнь, Якстере Знамянь, Суворовонь 3-це степенень, Отечественной войнань 2-це степенень ды Якстере Тештень ордентнэсэ, зярыя медальсэ.
Героенть лемензэ кандтнить Дубенка велесэ ды Зеленоградск ошсо куротне. Теде башка Н.М. Бровцевень лемесь максозель калонь кундамонь траулерэнтень.
Героенть раськезэ
Аволь умок минь сюлмавкшнынек Николай Бровцевень малавиксэнзэ марто. Турдаковасо чачсь Алексей Григорьевич Ратников, конась ней эри Ульяновскойсэ. Сонензэ 80 иеть. Николай Михайлович сави тензэ аванзо ендо лелякс. Нама, неемс лелянзо живстэ эзь саво: 1945 иестэ Николай Бровцев уш чавовсь, Алексей Ратников ансяк чачсь. Подвигензэ ланга тензэ пачтясть тетязо-авазо. Аванзо лемезэ ульнесь Дарья Михайловна. Сон сави вечка бабакс Героенть лия малавиксэнзэ туртов – Елизавета Ивановна Кургаеванень. Авась венчамодо мейле эри Саранскойсэ, сонензэ 73 иеть. Минь сюлмавкшнынек мартонзо. Телефонга кортнемстэ Елизавета Ивановна тенек пачтясь: «Николай Бровцев – монь вечка бабань (Дарья Михайловнань) ялаксозо. Николаень эрямодонзо аламо мезе содан, эрясь кода весе, тонавтнесь, важодсь… А вана подвигензэ содаса пек парсте. Сон чавовсь высотань саемстэ. Кувать леднесь немецтнень лангс, меельцекс, зярдо а мейсэ кармась леднемс, сон таргась граната ды ертызе лангозонзо эциця немецтнень лангс. Те сезевемадонть чавовсь сонськак, ансяк немецтненьгак седе тов эзинзе нолда».
Меельце валтнэ минек туртов пек питнейть. Сынь арасть сермадозь Интернетсэ, лисни, неть ледстнематне семиянь архивстэ. Вана истя, эсь прянь апак жаля тюрсть минек покштятне тиринь масторонть кис!
Меельцекс ледстявлинь Кобалень поэтэнть-фронтовикенть Евгений Иванович Агеевень (1922-1943) валморонзо, кона кандови войнасо эрьва чавовозентень.
Завещания
Зярдо пран ды кулан,
Тынк ютксо а улян,
Ледстнеде кой-зярдо:
Ульнинь эдь МОНГАК!!!
… Тюринь весе вийсэ.
Эсь мастором кисэ
Максынь виень, превень
Ды… эрямомгак.
Седе домкасто ловнодо эрзянь РУВИКИ-сэ.