Аволь умок Орданьбуесэ панжовсь «Ардатовские самоцветы» эйкакшонь неень шкань модельной библиотека. Теевсь сон «Культура» национальной проектэнь «Культурная среда» федеральной проектэнть эрямос совавтоманть лувсо.
Неень шкань библиотеканть панжомасо ульнесть Орданьбуень муниципальной райононь прявтось Александр Антипов, МР-нь культурань, раськень политикань ды архивень тевень министрань полавтыцясь Юлия Елисеева, А.С. Пушкин лемсэ республикань раськень библиотекань важодицясь Ольга Чавкунькина.
Торжественной панжомадонть мейле Орданьбуень эйкакшонь библиотекань прявтось Татьяна Юрьевна Сипигина весень туртов ютавтсь экскурсия. Инжетненень сон невтинзе неень вешематнень коряс теезь ловноманть-налксеманть туртов нупальтнень, ёвтнесь, мезе ули эйкакштнень марто важодеманть туртов.
– Проектэнть топавтоманзо коряс важодемась ветявсь иензэ перть. Ушодынек минь 2023 иестэ. Васняяк анокстынек весе эрявикс документтнэнь, кучинек сынст конкурсонь комиссияв. Комиссиянть вановтонзо коряс понгинек изницятнень юткс. Ды ярмактнень явомадо мейле сеске ушодынек проектэнть эрямос совавтомо, – ёвтни Татьяна Сипигина. – Весе тевтнень топавтомс миненек явозельть 8 млн целковойть. Неть ярмактнень эйстэ 1,5 млн целковойть явозельть зданиянть аламодо витнеманть-вадрялгавтоманть лангс (тесэ икеле ульнесь эйкакшонь интернат). Кадовозь ярмактне ютасть эрявикс оборудованиянь, книгань ды мебелень рамамонть кис.
Од библиотекасонть лововить тематической зярыя курот, эрьвасонть ули мезе-бути мельстуиця вишка ловныцятнень туртов.
– Вейсэ холлонть марто минек библиотекасонть кото нупальть. Васенце нупалесь – «Узнаю САМ» – ламофункциянь. Тесэ кирдеви весе литературась, налксемань фондось. Минек важоди электронна книгань максомань лувось, улить пластикстэ теезь ловномань билетт ды кармить электронной билетткак, – ёвтни Татьяна Сипигина. – Эйкакшонь библиотекань фондсонть лововить 15 тёжат экземплярт. Проектэнть лувсо рамазь 1,5 тёжат од книгат. Весе сынь вадрят, эйкакштненень вечкевить.
Неень шкань библиотекасонть ули световой проекция ды оймавтыця музыка марто «ЦВЕТные сны» сенсорной нупаль. Налксемань туртов тесэ ули интерактивной киякс, оймсемга – чевте кресла. Истя жо тесэ лиятнень эйстэ башка паро ловномс сэтьмечисэ.
– Проектэнть лувсо раминек лавшосто неицятнень туртов эрявикс оборудования, «кортыця книга», Брайлень шрифтсэ книгат. Минек Орданьбуесэ ули лавшосто неиця эйкакштнень туртов школа-интернат ды истят книгатне сынст туртов пек эрявикст, – корты Татьяна Сипигина.
Эштё вейке нупалесь – «Я САМ» шкинемань мастерскоесь. Тесэ эйкакштнень кармить тонавтомо эрьва кодамо мазычинь тееме. Кода тешкстызе Татьяна Юрьевна, кедьчелькевень ёрокчитнес вишкинетнень кармить тонавтомо райононь ёроков ломантне, конатне важодить народно-художественной промыслатнень ёнкссонть. Арсевить мастер-класст лембе кемень кевердемань, илейстэ паргинень кодамонь, раськень някань теемань коряс ды ламо лият. Орданьбуень районось сюпав кедьчелькев ломаньсэ, ули кинень ды мезес тонавтомс эйкакштнень.
– Шкинемань мастерскоенть туртов раминек стамонь машинка. Эдь минек ули театральной студиянок. Нама, профессиональна стамо минь тесэ а карматано, а вана мезеяк витнемс-каярдамс ды сцена лангсо налксеманть туртов анокстамс кодамояк оршамопель, тень тейсынек, – корты библиотекань прявтось.
Кода уш тешкставсь икеле, неень шкань библиотекань коридорось истя жо нолдавсь тевс. Тесэ тееви художественной галерея. Ней уш улить райононь художниктнень зярыя картинаст, седе тов коллекциясь пештяви одто. Сынь мазылгавтсызь коридоронь стенатнень ды кармить мелень витема таркакс.
Библиотекасонть ули краеведениянь кужинеяк. Тесэ важоди «Городок на Алатыре» музеесь. Нупалесь явозь кавто пельксэс. Васенцесэнть невтеви рузонь кудось кезэрень шкань курмотнень-кармотнень марто. Весе ули-паронть максызь ошонь эрицятне. Эйкакштне сыть покштяст-бабаст марто ды кандыть кодамояк сюпавчи. Кудосо кезэрень шкань предметтнэ сыненст а эрявить, а вана тезэнь кадовить свалшкас.
– Омбоце пелькссэнть невтеви лия проектэсь. Культурань инициативатнень Президентэнь фондонь «Объединение «Культпоход» проектэнть эрямос совавтоманть лувсо пурнынек эйкакшонь театрань ды «Силуэт» сулеень театрань музей, – ёвтни Татьяна Юрьевна. – Те минек васенце проектэнек. Изнямонь фондось ульнесь – 350 тёжат целковойть. Неть ярмактнень лангс раминек эйкакшонь театранть туртов эрявикс оборудования. Театрась лемдезь Галина Ивановна Субботинань лемсэ. Те васенце ломань, конась Орданьбуесэ панжсь эйкакшонь театра. Музейсэнть ванстовить сонзэ ули-паронзо, архивстэнзэ фотографиятне. Истя жо музеень стендтнэ домкасто ёвтнить, кодат эйкакшонь театрат улить неень шкасто – ломанень сэрьсэ някань театрась, пенчсэ налксемань, сурсо налксемань, сулеень театратне ды ламо лият. Сулеенсенть туртов минек ули эрявикс оборудованиянокак. Ды те ёнкссонть уш важодтяно, спектакляткак путокшнынек. Эйкакштне сынськак покш мельсэ варчнить пряст актёрокс. Тесэ важоди «РазноЦВЕТный мир» студиясь. Те шкас кавто иеть роботынек эйдень кужов якицятнень марто. Ульнесь «Каруселька» театральной студиянок. Ней важодемась карми ветявомо седе келейстэ. Проектэнть лувсо тень туртов теезь весемесь: рамазь экран, проектор, ули сцена ды 38 таркас озамка марто вадря зал. Карматано важодеме седе покштнень марто ды путомо седе вадря спектаклят. Эдь ней эйкакштненень арсеви ветямс «актёрское мастерство» курсанть, мартост важодеме карми Орданьбуень В. Б. Лазерсон лемсэ театрань режиссёрось Татьяна Александровна Силантьева.
Орданьбуень неень шкань модельной библиотекасонть важодить колмо ломанть. Кода тешкстызе Татьяна Сипигина, те ёнкссонть весе важодить аволь умок. Анастасия Семёновна Лапина – 3 иеть, Лидия Григорьевна Карпушкина – весемезэ ие (зярыя кементь иеть ульнесь тонавтыцякс). Сонсь Татьяна Юрьевна эйкакшонь библиотекасо важоди ниле иеть. Теде башка, 30 иеть роботась эйкакшонь кудосо тонавтыцякс ды вишкинетнень марто важодеманть пек парсте содасы.
– Те ёнкссонть важодемань нурька шканть лангс апак вано, минек специалисттнэ пек ёроковт, сынь эрить теньсэ. Покш мельсэ кундыть куш кодамо проектэнть топавтомо, кирдить весе мельтнень-арсематнень. Истямо коллективсэ важодемась – покш уцяска, – тешкстась Татьяна Сипигина.
Юлия Еремина