Н. П. Огарёв лемсэ МГУ-нь Национальной культурань институтось тешкстынзе 30 иетнень. Тень коряс кенярксчинь вастовома ютась университетэнь Культурань ды искусствань кудосо. Институтось анокстась вадря фильма, косо пачтясть те тонавтнема тарканть эрямодо. 

Тонавтыцятне ёвтнесть важодемадост, изнявкстост, мельдест-бажамодост. Васенце деканокс тесэ ульнесь В. С. Брыжинский. Сон седейшкава ледстнесь, кода весемесь ушодовсь. Мейле деканокс кармась А .И. Брыжинский. 2006 иестэ национальной культурань факультетэсь теевсь институтокс. Седе тов сонзэ 2020 иес ветясь Т. Н. Сидоркина. Неень прявтось – С. А. Исаева.

Институтсо эрямось лаказь лаки валскестэ саезь позда чокшнес. Тесэ тонавтнить сы шкань дизайнерт, рекламань теицят, актёрт, библиотекасо важодицят, хоронь ветицят ды хорсо морсицят, киштицят ды морыцят, творческой коллективень ветицят. Сынь кенерить тонавтнеме, невтеме пряст раськеютконь пелькстамотнесэ, кой-кить – важодемеяк. Тонавтницятнень ютксо улить лия ёнксонь ламо од ломанть.

Лембе валонь ёвтамо сакшнось Н. П. Огарёв лемсэ МГУ-нь ректоронь тевтнень топавтыцясь Д. Е. Глушко:
– Те фильмась – аволь ансяк Институтонть эрямо, те – Россиянь неень шкань историянь невтема. Минек масторонь культуратнень ды кельтнень ламочись – те весе раськетнень сюпавчи, конат эрить Россиясо. Тесэ тынк таштазь важодемань ды тонавтомань вадря опыт, конань вельде анокстатадо эсь тевень содыця специалистт. Тыненк ули мезес тонавтомс лиятнень.
Д. Е. Глушко алтась одкстомтомс Институтонь научно-технической базанть. 2022 иестэ эряви рамамс компьютерной техника. Полавтомс балетэнь залсо паркетэнть.

Истя жо кенярксчинтень сакшнось МР-нь Культурань, раськень политикань ды архивень тевень министрась С. Н. Баулина. Сон ёвтась сюкпрянь валт тонавтыцятненень, весе важодицятненень, кить максыть содамочить, путыть вийть ды ойме вечкевикс тевентень.
– Колоньгемень иетнень перть тынь анокстыде культурасо пек ламо важодицят. Сынь роботыть республикань тёжадо ламо учреждениятнесэ. Те: театрасо, музейсэ, библиотекасо, концертэнь вейсэндявкстнэсэ. Неень шкане топавтови «Культура» национальной проектэсь. Панжовить культурань од кудот, витневить-петневить таштотне. Миненек эрявить ломанть, кить кармить важодеме тосо, кить невтьсызь пряст паро ёндо. Минь учотано Институтонь прядыцятнень эсенек кедьсэ, – яволявтсь Светлана Никитовна.

– Весе неть иетнень перть вишка факультетэсь кассь тонавтомань покш учреждениякс. Тонавтницятне сыть тенек 9-це классонь прядомадо мейле, кочкить средней профессиональной образованиянь отделениянть, седе тов – высшей, поладыть тонавтнеме магистратурасо. Кой-кить алтыть пряст наукантень, идить диссертацият. Сюкпря ёвтавлинь лия ёнов а молиця, пек паро педагогической коллективентень, – кортась Национальной культурань институтонь прявтось С. А. Исаева.

Институтонь тонавтыцятне казевсть Н. П. Огарёв лемсэ МГУ-нть, МР-нь Культурань, раськень политикань ды архивень тевень министерстванть пельде Почётной грамотасо. Весе инжетнень туртов студенттнэ невтсть мельстуиця концерт: виев морот, киштемат ды, нама, невтизь эсест кедьсэ стазь оршамопельтнень. МГУ им. Н.П. Огарева ИНК СПО Дизайн ДПИ

Татьяна МАТОРКИНА
Фототне Эдуард Ретунскиень