Четверг, марта 28, 2024
Важное

Шумбрат, вишка ловныця! Ютасть кизэнь оймсематне (каникулатне). Таго ушодовсь тонавтнема шкась. Кода свал, васенце уроксонть кортамось тукшнось седе, кода ютавтынк кизэнть, косо ульниде, мезе неиде. Эрьвантень эйстэнк ульнесь, мезде ледстнемс. 
Кой-кинень эйстэнк пракшнось уцяска якамс походов, ютамс ламо таркава, кузнемс сэрей пандо пряс, венчсэ укшномс лей ланга, улемс косояк васоло ошсо эли натой омбо масторсо. Сеть эйкакштне, нама, прянь шназь, ёвтнесть, ков пачколесть, мезе несть. Тоньгак, содан, мелеть покш сыргамс ки лангов, ютамс сеть таркатнева, косо араселить. Арсетяно, тонь бажамот зярдо-а зярдо топавтовить. Зярс жо тердтяно эйсэнк сыргамс путешествияв минек марто. Течи арсетяно теемс тынк содавиксэкс Россиясо кезэрень зярыя оштнень марто. Васняяк, сетнень марто, конат теить весе масторлангонть келес содавикс Сырнень кирьксэнть (Золотое кольцо). Мекс кирькс? Ды мекс сырнень? Неть кевкстематнень каршо толковамот муят путешествиядонок мейле. Эрь, сыргатано!

РОССИЯНЬ СЫРНЕНЬ КИРЬКСЭСЬ

Сырнень кирьксэс совить кавксо содавикс оштне – Сергиев Посад, Переславль-Залесский, Ростов, Ярославль, Кострома, Иванова, Суздаль, Владимир.

Эсенек путешествиянок ушодсынек Сергиев Посад ошсто. Тов сыргатано Московсто. Ардтано пелеве-чилисема ёнов. Ды вана пачкодинек Сергиев Посад ошов. Сон истя лемдязь Сергий Радонежский иневанькс ломаненть ледстнемга сень кис, мекс сонзэ мелензэ коряс тесэ стявтозель покш монастырь. Те монастырентень мерить Троице-Сергиевень лавра. «Лавра» валось канды истямо смусть: сехте икельце, сехте эрявикс монастырь. Ды сон алкукс ловови Россиянь сехте икельце монастырекс. Потсонзо артовкстнэнь лангсо XV пингестэ ламо вий макссть рузонь содавикс артыцятне (иконописецтнэ) Андрей Рублёв ды Даниил Чёрный.
Те монастыренть перька стявтозь архитектурань ламо храмт, сынст юткс совить 50 ламо эрьва кодат кудот. Весе сынь стявтозельть XV-XIX пингетнестэ масторонь сехте содавикс зодчийтнень превсэ ды вийсэ.
Сергиев Посадсто ардтано Переславль-Залесскоев. Те – ош, кона, кода Московоськак, теезель Юрий Долгорукий чинязонть ушодксонзо коряс. Тесэ ванстовсть кезэрень ламо церьковат ды архитектурань памятникть.

Мейле минек кись ашти Ростовов. Те ошось – Сырнень кирькссэнть сехте кезэрень оштнестэ вейкесь, ды умоктояк умоконь шкасто сонзэ вечкезь лемдсть Ине Ошокс. Тосонь сехте неявикс таркась – Ростовонь кремлясь, конань ашо стенатнень экшстэ неявить церьковань ламодояк ламо куполтнэ. Ростовонь церьковань баягатне лиятнень эйстэ явовить эсест мазый гайтьсэст. Сынст гайтест сёрмадозь пластинкас, аудиокассетас, лазерэнь диск лангс, ды сындест содыть весе масторлангонть келес. Ростовсо минь мольтяно тосонь финифтенть ваномо, конань мазычизэ а кадсы мельтеме киньгак. Те – эмалень мазыйдеяк мазый сюлгамот, пилекст, кедькст. Сынст тесэ теить зярыя сядот иеть.

Седе тов кинек лангс понги Углич ошось. Сон ашти Рав леенть чиресэ. Ошонть лемезэ, паряк, чачсь «угол» валонть эйстэ. Леесь те таркасонть мендяви, чуди «угол» ладсо.
Угличсэ пек ламо кезэрень памятниктнеде. Сындест башка меленк, секень вант, явовтсы Угличень гидроэлектростанциясь. Те – васенце гидроэлектростанциятнестэ вейкесь, кона теезель Рав леенть лангсо. Теде башка, тосо ули часонь нолдыця покш завод, косо теить «Чайка» частнэнь.

Угличстэ минь сыргатано Ярославляв. Те – Сырнень кирькссэ сехте покш ош. Сон теезель Ярослав Мудрый чинязонть ушодксонзо коряс. А стяко ошось кандтни сонзэ лементь. Ошось истя жо ашти Рав леенть чиресэ. Леенть чирева якат ды а лотксят дивсемеде сень лангс, кодат тесэ мазыйть таркатне. Ошонть куншкасо минь несынек Фёдор Григорьевич Волковнень памятникенть. Те валдо ойме ломанесь Ярославлясо тейсь васенце истямо театра, ков кармасть якамо весе, кинь ули мелезэ. Вана мекс Ярославлянть ловить рузонь театрань чачома ошокс.

Рав чиресэ лия ошось, козонь лоткатано – Костромась.
Варштындерятадо сень лангс, кода ашти ошось, редясынк: куринкатне тесэ таргавсть веер ладсо. Ули истямо ёвтамо, кона тень толкови вана кода. Зярдо Екатерина II инязоравась мерсь одс вачкамс ошонть, сонзэ кевкстизь, кодамокс сон арси неемс Костроманть. Те шкастонть инязоравась келемтизе веерензэ. Секс, келя, ошонтькак теизь истямокс, лия ёнов а молицякс. Ошонь се таркасонть, косо куринкатне токить вейс, аштить кезэрень Микшнемань рядтнэ. Сынст экшсэ микшнить уш зярыя пингеть мельцек. Эрьва товаронтень максозель эсензэ тарка. Теде кортыть лемтне – товаронь микшнема Покш ды Вишкине рядтнэ, Оень рядтнэ, Пряникень рядтнэ…

Поладсынек кинек Рав чирева. Соватано таго вейке пек мазый ошов, конань лемезэ Плёс. Те лемесь тензэ сась плёсонть пельде. Плёсось – те леень кавто мендявкстнэнь ютксо келей тарка.

Плёсось – художникень ош. Минь, кеман, несынек сынст тесэ эсест тевест экшсэ. Сынст тей терди ошонть ды перьканзо таркатнень мазычист. Художниктне сакшность тей икелеяк. Весемеде пек Плёсонть вечкилизе рузонь художникесь Исаак Ильич Левитан (1860-1900). Ней ошсонть панжозь И. И. Левитанонь музей.
Плёс ошстонть сыргатано Суздалев, конань содасызь весе масторлангонть келес, кода ошонть-музеенть. Тесэ 33 церьковат, 5 монастырть, 17 часовнят. А ёвтавияк кода шождасто прят марят Суздалень куринкатнева якамсто. Неезесь кандтанзат ков-бути васов ютазь шкантень.

Ошсонть ули чувтонь зодчествань пек содавикс Музей, козонь пурназь чувтосто теезь кезэрень церьковат, кудот, ведьгевть ды истя седе тов.
Суздаленть эйстэ овсе аволь васоло ашти Владимир ошось. Сонензэ ушодксонть теизе Владимир Мономах чинязось (тестэ ошонть лемезэяк). Владимир мазый ошось ашти Клязьма леенть чиресэ (сон пры Ока лейс). Бути арсят ванкшномс ошонть эли сонзэ перька таркатнень, дивсемс сынст мазычист лангс, кузтяно сэрей башня пряс, козонь теезь ванома тарка. Тестэ ошонь кезэрень пельксэсь неяви, кода кедь лангсо. Башнясто валгозь, ютатано Владимирэнь куринкатнева. Вана минек икеле кезэрень пек питней памятникесь – Сырнень ортатне.

Аволь васоло ашти верев наянсто прянзо таргиця Успенской соборось, кона кувать ульнесь Русень сехте содавикс соборокс. Сонзэ коряс стявтозель Успенской соборось Московонь Кремлясо. Вакссонзо Дмитриевской соборось. Сонзэ стенатнень лангсо сельмс каятыця зярыя сядот чувтосто «викшневкст».
Владимирстэ минь мурдатано Московов. Россиянь Сырнень кирьксэнть эзга якамонок прядовсь.

СЕХТЕ МАЗЫЙ ТАРКАТНЕ ТОСОТ, КОСО ЧАЧИТЬ ДЫ КАСЫТЬ ТОНСЬ

Эрямот перть, содан, ламо мезе сави теть неемс, марямс. Те карми сестэ, зярдо касат покшсто. Ней зярс вишкинят. Эйкакш пингестэ аволь весенень пракшны уцяска молемс оймсеме эли ошонь-мезень ваномаст кисэ якамо ковгак васолов. Иля пек янксе тень кувалма. Истят таркат, косо ули мезе лангс варштамс, ули ков молемс ды косо оймсемс, муят тосояк, косо эрят тонсь. Листь веле ушов, варштак перть-пельга ды тонсь несак, кодамо мазычи панжови сельметь икелев. Ве ёно – келей паксят, лия ёно – вирть, а васоло чуди лей. Паро! А эрявить кодаткак омбо масторт. Секс а мезекс якамс васолга. Васня ушодт седе ламо содамс сеть таркатнеде, кодат улить эсеть перька. Те тееви ансяк сестэ, зярдо тонсь сыргат ды эсеть пильгсэ ютасыть малава аштиця таркатнень. Нама, аволь ськамот. Сыргак содыця ломань марто. Те улезэ тонь тетят, лелят, малавикс ялгат. Вейсэ седе вадря тонетькак, сыненсткак.

Кода паро ули, зярдо кувать якамодо мейле лоткатадо оймсеме!
Истят якамотне лездыть теть аволь ансяк седе ламо содамс эсеть чачома таркатнеде. Сынст пингстэ ламо мезес тонадат. Кода витемс толбандянть, пидемс ярсамопель, теемс удома тарка. Весе те, эсь ёндо, кемекстасы тонь обуцянть, максы теть вийть ды ёрокчи цидярдомс ки лангсо вастовиця весе стакачитнень ды мездеяк а пелемс.
Кеман, истят якамотнеде мейле кудов велявтат паро ёжосо.

Раиса Щанкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».