Веленть сюпавчизэ – те ломантне, конат тосо эрить свалшкасто. Ды зярс улить вишка велетнесэ эрицят, семс лекси тосо эрямось. А весть уш евтазель, веленть вандынь чизэ – те школась. Бути сон пекстазь, аламо шка кадовсь эрямс велентеньгак. Ицялбуень Пардалесэ школась пекстазь уш кода 12 иеть. Тонавтницятнень кармасть усксеме шабра велева, а вана тонавтыцятне кадовсть тевтеме.
2013 иестэ школанть пекстызь, авась кадовсь важодемавтомо. Любовь Васильевна школантень весемезэ алтась 32 иеть. Роботаволь эштеяк, бути а те тувталось. Савсь туемс пенсияв. Лия роботат велесэнть арасть: а кодамояк хозяйства, а фермерства, а мезеяк лия. Ансяк шабра велев зярыя седе од ломанть ардтнить роботамо. Лиятне аштить пенсиясо кудосо.
Сонсь Любовь Васильевна чачсь ламо эйдень триця семиясо. Эйкакштнеде ульнесть сисем. Колмо сазоронзо сонзэ ладсо пурнасть эстест семия теске, Пардалесэ, вейкесь лиссь мирденень Камайвелес, кавтотне тусть ошов – Саранскоев ды Московов.
Любовь Васильевна семиясонть омбоце эйкакшоль. Васенцекс ульнесь лелязо. Теде мейле чачсть вейке ялаксозо ды ниле сазоронзо. Тетяст-аваст ульнесть колхозникть: тетязо трактористэль, авазо якась ракша мельга.
Мирденень лисемадо мейле одтнэнень колхозонть пельде максокшность кудо. Мирдезэ важодсь колхозсо механикекс, мейле – экспедиторокс. «Неть стякодонь кудотнень кис кадовинекак велес, эзинек туе ве енов, роботат ульнесть, эрямось пароль, эряк ды тряк эйкакшт апак пеле вандынь чинть кис», – евтни Любовь Васильевна. Мирдензэ марто трясть кавто эйкакшт, сынь ней Московсот – велесэнть а мезе теемс… Мирдезэяк ней пенсиясо.
Школасо роботась мелезэнзэ пек тукшныль, сон уш вишка пингестэ саезь вечкилизе те тевенть ды содыль, карми тонавтыцякс. Налксемасткак истят ульнесть. Сон, кода покш патя, озавтылинзе сазоронзо-ялаксонзо ды налксиль мартост «школынесэ». Сестэ Интернет арасель, олятольть эйкакштне неень шкансетнень коряс, весе шабрань эйкакштненьгак пурнылизь, эрьва кудосо ламо ломанть сестэ ульнесть, секскак покш эйкакштне пурныльть эстест «класс» ды адя «тонавтомо» вишкинетнень. Мейле сермадовксост ванкшнылизь, оценкат путнильть…
Ней кизэнь перть Любовь Васильевнань кедьсэ эрить нуцьканзо. Эйкакштненень тесэ кизна пек вадря. Зярдо пиресэ эрьва мезе кенери, сынь кецнить ягодатнес ды эмежтнес, кочкить ды паро мельсэ ярсыть касозденть. Бабат-нуцькат якить вирев пангос-мезес. Кстыйтькак пурныть, конатнеде летьке шкане чачить пек ламо. Эйкакштне пек вечксызь велесэ кизэнть ютавтомс.
Минь кевкстинек Любовь Васильевнань, явовить-арась неень эйкакштне седикеленсетнеде ды мейсэ? Тонавтыцясь апак кавтолдо мерсь: «Явовить, седикелень эйкакштне седе кунсолыцят ульнесть ды сынь сынсь тонавтнесть. Ней жо велень эйкакштне а явовить ошонсетнеде. Икеле весе ризнэсть, ачарькодевиксэнть мартост вейсэ ваннынек, кевкстемат макснесть. Сестэ эдь экзамент ульнесть, билетэнь коряс кевкстематне анокставсть, те уш мейле ЕГЭ-тне кармасть. Ды сестэяк важодинек чинь-чоп мартост, урокто мейлеяк кадновинек талайс…
А ней эйкакштнень лангс ванан, койсэнь, мезеяк тенст а эряви. Эсень нуцькам туртовгак кортнинь, эряви анокстамс сыця тонавтнема иентень, ледстямс ютазенть, а сон малазонзояк а нолды. «Мон аволь превтеме…» – ранги…»
– Мезе арсетядо неень шкань тонавтыцятненень?
– Шумбрачи, васняяк! Покш цидярдома эйкакштнень марто эряви. Ней сынст тонавтнемс мелест арась, секскак невтевкстнэяк кармасть берянть, а эдь тонавтыцянть те ризнэвти. Лисни, те тонь чумось, куш прянть вачкоек, а сынь тень мезекскак а путыть…
Арсетяно тонавтыцятненень кизэнь перть таштамс вийть ды шумбрачи! Тетятненень-аватненень – ванстомс эйкакштнень ды сынст тонавтыцяст, конат неень шкасто топавтыть аволь шожда тев – бажить путомс превс ды аравтомс виде кис минек эйкакшонок.
Марина Агафонова