Среда, августа 17, 2022
Важное

А. С. Пушкин лемсэ библиотекасо ютась «Йовлань Оло. Неень шкань Тюштя» книгань-альбомонь презентациясь. Тедеде содавикс музыкантонтень, учёноентень топодевельть бу 70 иеть.


2021 иесь алтазель сонзэ ледстнемга. Ютавтозельть ламо вастовомат, кенярксчить, сонзэ лемс панжозель выставкаяк. Весе теде минь домкасто пачтинек ловныцятненень «Эрзянь правдань» лопатнесэ.

Ды вана ней пурнавсть вейс сетне, кить важодсть книганть лангсо. Ёвтасынек сеске, книгась пурнавсь зярыя иень перть, сонзэ нолдамс эрявсть ярмакт, конатнень пурнызь тагояк чевте седей ломантне.

– Тетям тусь ды кадымизь минек содамоёвкс марто, конань эряви муемс. Мезе сон эзь кенере теемс ды топавтомс – тень эряви поладомс. Свал ламо кортатано. Бути а карматано тееме – кияк тарказонок а карми, – кортась В. Ромашкинэнь цёразо Андрей.

Мельспароль неемс те вастовомасонть МР-нь заслуженной поэтэнть Р. С. Кемайкинань:
– Книгась лиссь аволь ансяк мазый. Сон пек домка, смустев. Зярдо сонзэ ловнат – икелеть сти Олонь чачозо. Валдо ойме, домка прев, мазый, сюпав ойме ломань. Весе содатано: сон тейсь пек ламо минек культурантень. Олонь, маряви, арасельть а вечкицянзо, паряк, ульнестькак. Сон маштсь эрьва кинь марто ладямо. Аволь эрьва ломаненть обуцясо ули истямо ёнкс. Весе сёрмадовкстнэ превейть, ялганзо лембестэ ёвтнить эйстэнзэ. Вечкевсть Пётр Рябовонь сёрмадовксонзо. Кие эзизе ловно – саинк. Седеенк-ойменк пешкеди вечкемадо ды валдо арсемадо. Книгась кады тенк валдо арсемат ды ёжомарямот. Сюкпря Пётр Рябовнень, сон зярыя иеть пурнась книганть, вешнесь ярмакт.

Вал сайнесь книгань нолдыцясь Константин Шапкарин:
– Неень шкане сонзэ кондят ломанть пек а сатныть. Кие эштё эзизе ловно книганть, ловнынк. Тосо улить мемориальной лопинеть, Владимир Ромашкинэнь эсь кедьсэ сёрмадозь рукописензэ, документэнзэ, арсеманзо. Мезе мерян: минь а топавттано сонзэ мельтнень-бажамотнень, пелензэяк эзинек тее, мезе сон аравтсь икелензэ.

Паро инжекс ульнесь Эстониянь «Сятко» эрзянь ды мокшонь вейсэндявксонь прявтось Наталья Абросимова:
– Эстононь ды сетунь ломантнень пельде ёвтан тенк лембе валт. Минь Эстониясо истя жо тешкстынек Йовлань Олонь иенть. Ютавтынек конференция. Сон монень панжовсь лия ёндояк. Арсинь, сон ансяк морыця. Алкукс жо – фольклоронь пурныця, седямонь-морамонь парсте чарькодиця. Арсеманок коряс, седе товгак поладтано ютавтомо сонзэ лемс конферецият, саемга, Эстононь литературань музенть ды музыкальной академиянть марто вейсэ.

Книгань редактортнэстэ вейкесь, Т. С. Баргова пачтясь, улить эштё ламо ломанть, кинень ули мезе ёвтнемс ды ледстнемс В. Ромашкиндэ. Секскак, паряк, те ломанденть тагояк нолдави книга.

Меельцекс ютась «Моронь пусмонь» невтема. Те – рузонь кельстэ эрзянь кельс ютавтозь содавикс морот. Сынст лангсо важодсть Р. Б. Щанкина (пурныцясь), Т. П. Швецова ды Анна Лачина.
Вастовомасонть ульнесь «Ламзурь» фольклорной ансамбляськак. Аватне кецявтызь весе инжетнень мельстуиця моросо.

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».