Четверг, марта 28, 2024
Важное

«Мордовское землячество» МРОО-сь ламо иеть вейсэнди эрзятнень ды мокшотнень, конатне састь Мордовиясто ды ней эрить Московсо ды Московонь областьсэ.

РФ-нь Президентэнть юрсо Мордовия Республикань Постпредствань Эрзянь ды мокшонь культурань центрань прявтось Лидия Виссарионовна Круглова тешксты, ней те землячествантень совить сеть эрзятне ды мокшотне, конатне састь Московов лия регионтнэстэяк, ды сынст ули мелест тиринь ёнкстонть васолояк ванстомс эсь келест, вастовкшномс вейсэ, кортамс эрзянь ды мокшонь кельтнесэ, ледстнемс стувтовозь валтнэнь, койтнень-кирдатнень, морсемс эли кунсоломс тиринь кельсэ морот.

Вейсэндявкссонть уш теевсь паро коекс ламо иень перть весе вейсэ тешкстамс Эрзянь ды мокшонь келень чинтень алтазь мероприятиятнень. 1993 иестэ саезь вастовоматне ютавтневсть Н.А. Некрасов лемсэ библиотекасо, ансяк ней коронавирусонть кувалма тосо а мереви пурнавомс ламонеть. Тедедень чадыковсто Московонь эрзятне ды мокшотне пурнавкшность васенцеде пандемиядонть мейле офлайн-форматсо Видное ошонь «Нармунь» пидемань-панемань кудосо, конань кирди эрзявась Надежда Фомина. Кода корты организаторось Лидия Виссарионовна Круглова, те ульнесь келень покш чинтень репетиция. Ды вана чадыковонь 24-це чистэ Эрзянь ды мокшонь кельтнень чись тешкстазель седе келейстэ Од Москов ошонь округонь «Коммунарка» Культурань кудосо.

«Те мероприятиянть ютавтомс залонть коряс лездась Егор Ильич Сорокин, конантень землячествась ёвты покш сюкпря, – корты Лидия Виссарионовна. – Минек истят концерттнэ свал ютнить питневтеме. Зярдо яволявтови покш вастовома, ломантне телефонсо гайневтнить эсест родняст-раськест, ве велень, райононь ялгаст-ояст туртов, конатне эрить Московсо. Минек эдь тесэ арась ве тарка, косо бу эрявольть ламо мокшот ды эрзят, сынь сралезь весе Московганть ды областьканть. Секскак прявт задачанок – вейсэндямс сынст ве курынес вана истямо мероприятиятнень шкасто, кода Эрзянь ды мокшонь кельтнень чись, «Шумбрат» фестивалесь ды лият».

Вастовомантень сакшность малав 200 ломанть. Весе пек тошнакалесть алкуксонь вастовоматнень кисэ, ды зярдо яволявтозель Эрзянь ды мокшонь кельтнень чинтень концертэсь, пизементь ды ютавтома тарканть васолочинть лангс апак вано, састь паро мельсэ. Ульнесть инжеть Саранскойстэяк. Пурнавозтнень содавтынзе сонсь Эрзянь ды мокшонь раськень регионъютконь общественной организациянь прявтось Юрий Александрович Мишанин, кона ёвтась ламо лембе валт весенень, тердсь а стувтнемс эсест тиринь раськенть сыця сёрмадстомань шкасто ды явшесь Шнамонь конёвт сехте ёроковтненень. Сакшнось вастовомантень Московонь областень эрзянь ды мокшонь национально-культурной автономиянь прявтось Дмитрий Иванович Макайкин.

Концертэсь ютавтовсь эрзянь ды мокшонь кельтнесэ. Ветясть сонзэ эрзянь цёрась Юрий Наумкин ды мокшонь тейтересь Елена Алямкина. Моротнеяк, стихотворениятнеяк те чистэнть гайгсть эрзякс ды мокшокс. Сценанть лангсо пряст невтизь «Азорава», «Колопинские голоса», «Бояраваня», «Валдоня», «Эх, мордовочка» ансамблятне, Елена Широкова, Николай Кочегаров, ломанесь-оркестрась Юрий Наумкин, «Ойме» фолк-группань прявтось Ежевика, Александр Рогачев ды лият. Концертэнь омбоце пельксстэнть морась весенень содавикс «СадКо» группась.

Кода кортыть ваныцятне, концертэсь ютась вейке лексемасо, кой-кить эзть кирдеве ды лиснесть киштеме залонтень. Седе тов ульнесть ойместэ лисиця сельведтькак, кутьморямот ды певтеме кортамот. Кода корты Лидия Виссарионовна Круглова, истят вастовоматне теке вейке классонь эли покш семиянь кенярксчить. Ды алкукскак истя, эдь сынст вейсэнди пек ламось: эрзянь ды мокшонь кельтне ды тиринь Мордовиясь, конась свал кадови вечкевикс чачома таркинекс!

Анокстызе Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».