МР-нь Някань государственной театрасо неть читнестэ ульнесть инжеть. Тей сакшность Донецкой Народной Республикань Горловкань някань театрань артисттнэ. Сынь сакшность РФ-нь Культурань министерствань «Покш гастрольть» проектэнть лувсо.

Кода евтнесь Горловкань някань театрань прявтось ды художественной руководителесь Артем Тон, сынь уш колмоце ие явить мель «Покш гастрольтненень». Ульнесть Южной федеральной округсо, Якутиясо, Амурской областьсэ. Тедеде пачколесть Пензав, Ульяновскоев, Димитровградов. Эрьва косо вастызь пек лембестэ, залтнэ пешксельть ваныцядо. Саранскойсэ сынь невтизь «Братец Кролик» ды «Планета Вити» спектаклятнень. Вишка инжетне мельспаросо ванызь неть путвокстнэнь.

– Горловкань някань театрась панжовсь 2001 иестэ. Сы иестэ тешкстасынек 25 иетнень. Минек репертуарсо 42 путовкст. Ули классика, советской ды неень шкань эйкакштнень туртов сермадыця автортнэнь произведенияст. Ули эсенек режиссеронок ды тердтнетяно лият. Арсян, зярдо важоди тердезь режиссер, сон канды мезеяк од артисттнэнень: од содамочить ды маштомачить. «Планета Вити» – од пьесась сермадозель минек театранть туртов, теде икеле косояк лиясо эзь невтеве. Минь важодтяно эрьва кодамо няка марто: тевс нолдатано классическойть верховойть, тростевойть, перчаточнойть, паркетнойть, планшетнойть, ростовойть ды лият, – пачтясь театрань прявтось.

Горловкань театрасонть ансяк вете артистт, нама, сынь учить юткозост од кадрат. Ансяк зярс сынст ошось ашти СВО-нь передовоенть маласо. Горловкась – промышленной ош, косо эрить шахтерт, химикть, машиностроительть. Теке марто, улить зярыя театрат ды вадря музейть.

– Сюкпря «Покш гастрольть» проектэнтень, конань вельде невттяно Донбассонь культуранть, творческой сюпавчинек, теевтяно содавиксэкс някань лия театратнень марто, – кортась Артем Тон.

Татьяна Маторкина