Пятница, марта 29, 2024
Важное

Тедеде, сентябрянь 24-це чистэ, топодить 100 иеть седе мейле, зярдо Московсо лиссь «Якстере теште» газетань васенце номерэсь. Те чись лововияк эрзянь-мокшонь периодической печатень ушодовома шкакс, куш теде икеляк, 1920 иестэ, Симбирскойсэ (ней Ульяновск ош) кармакшнось лиснеме «Чинь стямо» эрзянь газетась.

Сонзэ редакторокс ульнесь Д.Г. Орхидея. Нолдыцянзо-анокстыцянзо ютксольть истя жо Я. Катаев ды Д. Желтов.

Седе тов Д.С. Желтов Московсо роботась РКП(б)-нь мордовской секциянь секретарекс, ды ламо вийть путсь «Якстере тештенть» сыргавтомантень. Сонзэ васенце вете номертнэнь жо сёрмадстынзе, кода редактор, М.К. Евсеев. Мейле «Якстере тештень» редакторокс ульнесь Е.С. Окин. Тарказонзо сась «Кедровой пештть» содавикс повестенть авторось П.С. Глухов. 1927 иестэ саезь «Якстере тештень» редакторокс аравтозель Г.А. Егоров, кона сёрмадстынзе Саранскойсэ лисиця «Эрзянь коммунань» васенце номертнэнь.

Седе тов эрзянь газетань редактортнэнь ютксо ульнесть Н.Л. Иркаев (Никул Эркай), В.И. Радин-Аловский, Д.Ф. Учаев, И.А. Зубов, А.С. Щеглов, В.Е. Кувакин. Сехте кувать, 1963 иестэ саезь 1986 иенть куншка видьс, редакционной коллективенть прявтсо ульнесь П.П. Борейкин.

Сизьгемень иень перть эрзянь газетасо кассть-кемекстасть ламо пек паро журналистт. Меремс, минек весе икелень ды неень писательтнеяк чалгасть литературас сонзэ лангс нежедезь. Ледстятано ансяк зярыя лемть: А. Моро ды А. Лукьянов, кить од цёрынекс састь «Якстере тештев» наборщикекс, Ф. Чесноков, Т. Раптанов, И. Кривошеев, П. Гайни, А. Куторкин, В. Радаев, А. Дуняшин, А. Мартынов ды ламо лият.

Ансяк свал ды эрьва косо сехте а шожда эрси кинь невтицятненень, ветицятненень. Минек, журналистэнь тевсэ – редактортнэнень, кинь лангс пры сехте покш ответственность эрьва номерэнть, эрьва материалонть ды – мик эрьва строчканть ды валонть кис. Нурькинестэ можна меремс истя: кодамо редакторось, истямо газетаськак.

«Якстере тештень» васенце номертнэнь ванкшномсто, неяви, кода стакасто ды вечкезь анокставсть сынь Е.Окинэнь пингстэ. А стяко туемстэнзэ икелень редактордонть заметкасонть ловныцятненень пачтявсь: «…ансяк Окинэнь упорствасо ды терпениясо можна роботамс те каторжной роботасонть».

Дивас прат: кода эштё тень пингстэ теке жо Окинэсь ды лиятне кенерсть сёрмадомояк, тонавтнемеяк. Истя, П.С. Глухов, кода Е.С. Окингак, прядсь вуз ды уш экономистэнь диплом марто тусь газетасто Магниткав, косо мольсь металлургической покштояк покш комбинатонь строямось.

Виде, редакционной коллективень прявтокс кой-зярдо путнесть а чарькодиця ломантькак. Ёвтнесть, вейкесь эйстэст вешнесь газетань «подвалонть» каськасто («Подвалось» – газетань лопасо сехте алов путозь покш материалось. – Т. К.). Нама, истятнэ те таркасонть кувать эзть кирдевкшне: полавтылизь или тукшность сынсь. Седе ламо редактортнэ жо алкукс ульнесть журналисттнэнь ютксо васенцеть. Ветицят, кинь невтицят.

Минек зярс арась редакторонь галереянок. Мик эсенек редакциясояк а муят портретт, сведеният коллективень прявттнэде, кодат неят зярыя заводтнэсэ, лия организациятнесэ. Вейкеяк кудонь стенасо а муят журналисттнэнень – газетань редактортнэнень алтазь лазпанкс – ёвтамо седе, косо те содавикс ломанесь эрясь, трудясь. Эли ютксост алкукскак арасть пек содавикст? Эли, кода монень весть уш савсь сёрмадомс, эрьва чинь пек эрявикс газетной роботась а ловови героической тевекс? (Ванодо, «Жизнь в борьбе и труде» книганть, конань нолдызе Мордкизэсь 1987 иестэ – 94 стр. Т. К.). Истя эли аволь, ансяк журналисттнэде ёвтневи-ледстневи пек чуросто. Ёвтнемс жо эрьвадонть ули мезе. Тесэ мон ледстиньгак аволь весень. Мелем ули весень ютксто течи саемс кавтотнень. Ды вана мекс. Эрзянь-мокшонь журналистикань ушодыцятнестэ вейкентень Григорий Антонович Егоровнень тедеде чачома чистэнзэ топодить сядо колоньгемень иеть.

Пётр Прохорович Борейкиннэнь, кинь пингстэ самай «муезель» эрзянь периодической печатенть ушодксозо ды «Эрзянь правдась» окойники кармась лововомо «Якстере тештень» поладксокс, тедедень июльстэ топодевельть бу 100 иеть. Кода минек газетантеньгак.

Григорий Антонович Егоров чачсь 1891 иень ноябрянь 14-це (26) чистэ Саратовской губерниянь Петровской уездэнь Даниловской волостень Камаевка велесэ. Кода эрзянь лия семиятнесэяк, Егоровтне кастсть эйкакштнень апак кольневте. Антон Андреевич ды Наталья Захаровна сынськак нузяксчи эзть сода, пакшатненьгак вишка пингстэ саезь тонавтсть важодеме. Истя, Гриша кавксо иесэ уш кармась якамо тетянзо марто стада ваномо. Ашолгадома ланга сезевиль цёрыненть тантей удомазо, ансяк кода кармат пеняцямо? Семиясо эрьва трёшникесь питнейдеяк питней. Аламонь-аламонь сынст таштазь, окойники, удалась Егоровтненень рамамс лишме.

Рана ды келейстэ панжовсть эрзянь цёрыненть сельмензэ, виензась бажамозо содамс седе ламо, тонавтнемс. Гришань тетясь, Антон Андреевич, эсензэ лишмесэ сиведсь тескень церковно-приходской школав пенгень усксеме. Сонсь керяськак, лазнось эйсэст, уштсь школанть, тенсесь киякстнэнь, цёразо лездась тензэ ды покш мельсэ совсесь уроктнес, тонавтнесь. Гришанень топодекшнесть уш кемгавтово иеть, ды пек стакасто тонавтневсь тензэ рузонь келесь. Сюкпря учителентень Григорий Васильевич Скоробогатовнень – тона чокшне лангаяк мукшнось шка лездамс чарькодиця пакшантень.

Паро ломанть эрьва косо вастневсть. Вана Гришаненьгак, начальной школанть пек вадрясто прядомадо мейле, ялганзо, Никита Архангельский ды Иван Кочетков, лездасть анокстамс омбоце ступенень школас вступительной экзаменэнь максомо. Школась те ульнесь ниленьгемень вайгельбень тарка, Кутьина велесэ. Экзаментнэнь Гриша цидярдынзе, ансяк стипендия тензэ, кода алтнесть, ялатеке эзть максо. Тонавтнемс ульнесь а мезе лангс. Ды таго Антон Андреевич сиведсь Кутьинской школас сторожокс, кизна жо икеле ладсо вансь стадат. Гриша лездась тетянстэнь ды тонавтнесь.

1910 иестэ Григорий Егоров отличия марто прядызе Кутьинской школанть ды получась права тонавтомс церковно-приходской школасо. Те тензэ эзь сато, ды од цёрась экстерна максынзе экзаментнэнь Аткарской реальной училищасо, штобу получамс земской учителень лем. 1910-1912 иетнестэ Г.А. Егоров тонавтсь Веришимской начальной школасо, мейле роботась Саратовской типографиясо конторщикекс. 1913 иестэ эрзянь цёрась земствань ярмак лангс тусь тонавтнеме границянь томбалев, Моравиясо Преров ошов. Те – се шкань Австро-Венгриясо (ней Чехия). Велень хозяйствань образованиянь получамо бажазь, Григорий Егоров, нама, эзь сода, кодашка стакачить сави тензэ печтямс...

1914 иестэ ушодовсь васенце мировой войнась. Григорий Антонович лия студенттнэнь марто вейсэ пекстазель ды понгсь интернированнойтнень туртов лагерьс (Дрозендорф, Гроссау). Снартнесь оргодеме – кундызь, ды седеяк пек кармасть лангсонзо нарьгамо, чавсть ёжонзо маштомс. Весть мик пекстнизь вачо крысадо пешксе подвалс. Эль-эль менсь тосто живстэ. Шумбрачизэ истя лавшомокшнось, секень вант, а мезекс уш тензэ улевель агрономонь образованияськак, рузонь кельденть башка, чехень, немецень кельтнень содамоськак...

Пек майсесь пиштякась ятонь керчавкстнэнь потсо. Кудосо жо тарка-эзем эзь муе авазо. Жив-арась эйкакшозо? Вана мазый кавалоськак, конань овсе левкскекс синдезь сёлмо марто туекшнизе кудов Гриша, учось, учось азоронзо ды та-ков ёмась, ризксэнь печтязь...

Ансяк 1918 иень ноябрясто Григорий Егоров велявтсь тиринь велезэнзэ. Истя берякадокшнось, натой малавиксэнзэяк сеске эзизь сода. Ёжос сась а сеске. Ансяк 1919 иень тунда мольсь военкоматов, но Якстере Армияв эзизь сае лавшо шумбрачинзэ кувалма. Кода специалистэнть, кучизь райононь земельной отделс. Се шкастонть тосонь эрицятнень пек тандавтнесть Поповонь бандатне. Сынст каршо бороцямга Г.А. Егоров сёрмадстовтызе прянзо ЧОН-нь отрядс ды ансяк бандатнень громамодост мейле, 1924 иень августонь 9-це чистэ, мекев велявтынзе штабс винтовканть ды патронтнэнь.

1920 иень январень 4-це чистэ Г.А. Егоров совась большевикень партияс. Лия ки эрзянь цёрась эстензэ эзь кочка. Вишка пингстэ саезь сон несь, кода пельс вачодо, сёрмас апак сода эрить, важодить сокицятне. Весе виензэ, содамочинзэ бажась путомс эсь раськентень седе вадря уцяскань добовамонтень. Кодат тесэ эсь прянь жалямот? Г.А. Егоров свал тевсэ, ломань ютксо, яки веледе-велес, вастневи эрицятнень марто, кортни, вети пропагандистской, организационной покш робота, сонськак тонавтни.

1919-1921 иетнестэ Г.А. Егоров – Петровской уездной земотделэнь сад ды эмеж пирень коряс инструктор, мейле – партиянь Петровской укомонь инструктор. Теке марто вейсэ 1920-1923 иетнестэ сон ульнесь эсь уездэнь эйкакшонь зярыя кудонь прявтокс. Тонавтсь вишкинетненьгак, покштненьгак ловномо-сёрмадомо, пурнась эрзянь эйкакштнень пионерэнь отрядс. Камаевкань школасо сонзэ ушодксонть коряс озавтозель покш сад.

Овсе од, пек стака тевекс ульнесь эрзянь кельсэ васенце стенгазетатнень ды печатазь листовкатнень нолдамось. Васенце заметкатнень сёрмадомась-пурнамось, од ломантнень ютксо активисттнэнь вешнемась – тенень Г.А. Егоров явсь ламо мель Петровскойсэ, косо нолдавсь «Коммуна» газетась ды эрзянь кельсэ «Од веле» сонензэ приложениясь.

1924-1925 иетнестэ Григорий Антонович роботась партиянь Кузнецкой укомонь инструкторокс ды тонавтсь уездной совпартшколасо, ульнесь Саратовской губерниянь, Кузнецкой уездэнь Неверкинской волостень волкомонь секретарекс. 1925-1927 иетнестэ сон – ВКП(б)-нь Кузнецкой укомонь пропагандань ды агитациянь отделэнь прявтонь полавтыця. Тесэяк, эсь роботадонть башка, нолдась «Серп и молот» газетанть марто эрзянь кельсэ «Якстере веле» листок. Те ульнесь эрзянь кельсэ периодической печатенть ладямосо Г.А. Егоровонь васенце лезксэзэ-путовксозо.

Эряза, чевте седей, кортакшов, кургосонзо – цилим, сон кадыль валдо ледстнемат эрьва ломаненть седейс, кинь марто вастневиль. Вечкилизь ды свал пурнавильть перьканзо одтнэ. Весть эйкакшонь Кузнецкой кудосо тевтнень ванкшномсто теевсь содавиксэкс тосонь овсе однэ воспитательницанть Зоя Полякова марто, ды кирвазсь ютксост вечкемань сяткось. Курок сынь тейсть од семия. Венчамо чистэнть од одирьвась наряжакшнось ашо коцтсто стазь ковтасо... Пингензэ перть Зоя Петровна ульнесь Григорий Антоновичнень паро, мелявтыця никс, эрямосо кеме нежекс. Мартонзо вейсэ тонавтнесь, роботась, шкань ютазь теевсь Мордовской АССР-нь школань заслуженной тонавтыцякс. Семиясост кассть кавто эйкакшт – тейтерь ды цёра.

1927 иестэ Г.А. Егоровонь саизь Московов, аравтызь васняяк СССР-нь Центриздатонь технической редакторокс. Сон лездась эрзянь кельсэ книгань, брошюрань нолдамосо, тень ютксо велень хозяйствань темас. Рузонь кельстэ ютавтнесь эрзянь кельс статьят, брошюрат. Печатьсэ ды партийной роботась эрямосонзо теевкшнесь прявт тевекс. Теке жо 1927 иестэ саезь сон кармась «Якстере теште» газетань редакторокс.

П.С. Глуховдо мейле, конань пек вечкилизь, од редакторонть кой-кить вастызь а мельсэ. Монень теде ёвтнекшнесь А.М. Моро, кие А.М. Лукьянов марто вейсэ сестэ роботась «Якстере тештень» наборщикекс. Сынь натой гранкатненьгак нарошной човорякшность. Но Г.А. Егоров, чевте обуця ломань, маштсь коллективенть марто ладямо, од покш тевс сонзэ сыргавтомо. Куроксто уш сонзэ пек кармасть кунсоломо, кемсть тензэ. Газетанть перька пурнавсть од вийть. Содавикс журналисттнэнь Ф. Чесноковонь, А. Дуняшинэнь, С. Салдинэнь ды лиятнень марто вейсэ, «Якстере тештесэ» кармасть печатакшномо эсь стихест, ёвтнемаст А. Моро, А. Лукьянов, Никул Эркай, П. Кириллов, И. Цыганов, И. Рузайкин, В. Радаев, Т. Раптанов ды ламодояк ламо робочей ды велень корреспондентт.

Писателесь В.К. Радаев лембестэ ледстниль Г.А. Егоровдо, седе, кодамо мель сон явсь велестэ сёрмадыцятненень. А стяко содавикс писателесь ловсь Григорий Антоновичень эсензэ учителекс.

1930 иень сёксня Г.А. Егоров кучозель ВКП(б)-нь Мордовской обкомов «низовой печатень ладямо». Тесэ сон ульнесь «Эрзянь коммуна» газетань васенце редакторокс, виевстэ невтсь прянзо Саранскоень ды республикань общественной эрямосонть. Сон чаво таркасто ушодызе-ладизе Кочкуровской районной газетань нолдамонть. Седе тов, 1931-1933 иетнестэ, Г.А. Егоров ульнесь ВКП(б)-нь Мордовской обкомонь культпропсо печатень секторонь прявтокс, мейле кучозель Ардатовской райононь «Волна революции» совхозонь политотделэнь газетань тееме, косо малав кавто иеть ульнесь редакторокс. 1935-1936 иетнестэ Григорий Антонович важодсь Мордкизэнь редакторокс, ульнесь «Эрзянь коммуна» газетань велень хозяйствань отделэнь прявтокс.

Шумбрачизэ таго лавшомсь. Ды Егоровтне тусть Темниковав, ков пединститутонь прядомадо мейле кучозель роботамо Зоя Петровна (паряк, аволь ансяк шумбрачинть, но олячинть ванстомгаяк ульнесть таркадо-таркас тукшноматне?). Тесэяк Григорий Антонович ютавтнесь эрзянь кельс эрьва кодамо литература. Ёжос сазь, трудясь райгазетасо. 1942-1943 иетнестэ ульнесь Темниковской райисполкомонь прявтокс, 1943-1946 иетнестэ – ВКП(б)-нь Темниковской райкомонь инструкторокс ды оргинструкторской отделэнь прявтокс, мейле – Темниковской райзонь агрономокс, переводчикень тевенть апак кадно.

1949 иестэ Егоровтнень тердинзе эсензэ мельга Хабаровскоев тейтерест Маргарита. Тосо Григорий Антонович роботась госохотинспекторокс, 1954 иестэ – Всесоюзной географической обществань Приамурской филиалонь учёной секретарекс. Неть иетнеде ледстнемакс эряви ловномс «Тайгасо» ёвтнеманзо (лиссь «Сурань толт» журналсо 1959 иестэ) ды лиятнень, конат кадовсть апак печата.

Пенсияс туемадо мейле Григорий Антонович велявтсь Мордовияв, эрясь Рузаевской райононь Хованщина станциясо. Тесэ апак учне маштовсь цёразо…

1960 иестэ Егоровтне тусть эрямо Тирасполев, косо кармась роботамо тейтерест М.Г. Ильина. Тосо Григорий Антонович сёрмады «Уссурийской тайгасо» повестенть, ютавты рузкс «Вишкай» ёвксонзо, кона эрзякс печатазель «Сурань толт» журналсо 1959 иень ветеце номерсэ. Ушодсь тиринь таркатнеде повестень сёрмадомо. Якась Камаевкав а сатыця эрявикс материалонь пурнамо. Те якамось кандсь тензэ покш кеняркс. А вана роботанть прядомс эзь саво. 1963 иень июнень 24-це чистэ Григорий Антонович Егоров кулось ды калмазь Тираспольсэ. Кода ледстни тейтерезэ Маргарита Григорьевна, куломстонзояк мельсэнзэльть тиринь таркатне, ков сон свал бажась.

Жаль, мекс Мордовиясо зярс мезеськак а ледстни Г.А. Егоровдо, кие истя ламо вийть макссь минек национальной периодической печатенть ладямонтень, целанек мордовской культуранть, государственностенть касомантень-кемекстамонтень. Яла апак тонавтне се, мезе сон тейсь, кода переводчик. Койсэнек, берянь, мекс Кочкуровасояк районной газетань редакциясо арась сонзэ теицядонть мемориальной лаз.

 

Татьяна Ковалева,

журналист, Россиянь ды Мордовиянь

культурань заслуженной роботник.

(Поладксось моли)

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».