А. С. Пушкин лемсэ библиотекасо ютась «Монь килеень мастором» кенярксчинь вастовома. Сон алтавсь МР-нь заслуженной поэтэнть Геннадий Гребенцовонь 65 иетненень ды сонзэ творческой кинь 45 иетненень. Лембе ды паро валонь ёвтамо тей сакшность поэтэнть содавиксэнзэ, ловныцянзо, мартонзо важодицятне. А. И. Полежаев лемсэ музеесь анокстась мельстуиця выставка, косо невтевсть поэтэнть эрямосто фотографият.
Г. С. Гребенцов чачсь 1957 иень январень 2-це чистэ Покш Березникбуень Бозаёв велесэ. Школань прядомадо мейле тонавтнесь Ицялонь педагогической училищасо (1976), седе тов – Н. П. Огарёв лемсэ МГУ-нь филологиянь факультетсэ (1981). Сон сёрмады эйкакштнень ды од ломантнень туртов поэзиянь ды прозань произведеният. Нолдась ёвтнемань, ёвксонь, стихень ды пьесань зярыя пусмот.
Те вастовомасонть МР-нь Культурань, раськень политикань ды архивень тевень министрань васенце полавтыцясь А. И. Карьгин пачтясь лембе валт министранть С. Н. Баулинань ды эсензэ пельде.
– Геннадий Сергеевич – лия ёнов а молиця ломань. Сон – поэт, тонавтыця, общественной деятель. Яви мель ламо тевтнес, вейсэнь вастовоматнес. Минь мартонзо умок содавикст: ве шкане тонавтнинек Н. П. Огарёв лемсэ МГУ-нь филологиянь факультетсэ, важодинек телевидениянь ды радионь госкомитетсэ. Сон свал кирди валонзо. Ков иляк терде – свал муи шка, зярдояк а моли каршо, эсь тевензэ топавты парсте. А кодат вадрят эйкакштнень туртов сёрмадовксонзо! Эйдетнень а манясыть, авторось сёрмады весе седейстэ, – кортась Александр Иванович.
Вал сайнесь МР-нь Писателень союзонь правлениянь прявтось Т.П. Швецова:
– Савкшны ансяк дивсемс, кона шкане эрьва ков кенери Геннадий Сергеевич. Сон топавты ламо тевть, сёрмады-нолды книгат. А кады пейдевтемань ёрокчинзэ. Эряк шумбрасто ды парсте, тон эряват минек литературантень, малавиксэть, ловныцятнень туртов!
Лембе валт ёвтась 1941-1945 иетнень войнань ды трудонь подвигень Мемориальной музеень прявтось Н. А. Кручинкин. Сынь вейке райононь, умок содавикст. Геннадий Сергеевич ней важоди А.И. Полежаев лемсэ музейсэ, кона кандови Мемориальной музеентень, покш мельсэ ютавтни инжетненень экскурсият. Сонензэ свал сёрмадыть сюкпрянь валт мелень-арсемань пачтямонь книгантень.
Саранск ошонь тиринь келень тонавтыцятнень пельде вал сайнесь Луховкань лицеень тонавтыцясь Е. А. Великанова:
– Тынк книгатне, стихтне – пек паро сюпавчи. Те муевкс весе тонавтыцятнень ды эйкакштнень туртов. Рузонь эйдетненень, кить тонавтнить эрзянь кель – пек паро лезкс.
Геннадий Сергеевич мельспаросо кунсолось сетнень, кить ёвтасть тензэ лембе валт. Сонгак эсензэ пельде эрьвантень мусь каршо ёвтамс чевте валт, киньгак эзизе стувто.
Кодамо кенярксчи моровтомо? Сынст казизь «Пувама», «Масторава», «Ламзурь» фольклорной ансамблятне, МР-нь заслуженной артисткась Елена Воронина, Артём Мамаев, Сергей Фудин. Гребенцовонь стихензэ ловность 39 № школань, 26 № лицеень тонавтницятне ды нуцькинезэ – Алина Гребенцова.
Поэтэнть васенце книгазо лиссь 1981 иестэ, се шкане сон тонавтнесь университетсэ. Те – «Ёжов ур» ёвтнемань пусмось. Мейле лиссть «Азбукась стихсэ» (1985), «Панжовкст» (1992) поэзиянь пусмось, сон ютавтозель рузонь кельскак ды нолдазель 1996 иестэ «Ростки» лементь ало. 2005 иестэ лиссь «Кодамо тюсонь ведесь» эйкакштнень туртов ёвтнемань книгазо, 2006 иестэ – «Веснушки» стихень пусмозо, 2013 иестэ – «Вирень лисьмапря» эрзянь ды рузонь кельсэ пусмозо, 2014 иестэ – «Лесные сны» эйдетнень туртов удмуртонь кельсэ стихень пусмозо, теке жо иестэнть – «Нурька вастовома» ёвтнемань книгазо, 2015 иестэ – «Чиньжарамот» – эйдетнень туртов ёвтнемат, 2015 иестэ – «Жили-были в Бузаеве…» эрзянь ды рузонь кельсэ ёвкст, 2017 иестэ – «Чавола верьгиз» пусмозо, 2019 иестэ – «Кочказь произведениянь» 1-це томось. Г. С. Гребенцовонь произведениянзо лиснесть вейсэнь пусмотнесэ, лия ёнкссояк. Ютавтовсть рузонь, болгаронь, венгрань, удмуртонь, маринь ды лия кельтнес. Сонзэ ёвтнематне ды стихтне совасть начальной класстнэнь туртов школань учебниктнес. Авторось парсте чарькоди эйкакштнень ёжомарямост, мелест-арсемаст. Сон тонавты ломантнень, пертьпельксэнть, важодеманть вечкеме.
Кой-кона стихтнень лангс А.Аверкин, Н. Кошелева, Н. Митин, А. Пивкин, В. Кисляков ды лия композитортнэ сёрмадсть музыка. Моротнень морсить эйкакшонь коллективтне, содавикс морыцятне.
Г. С. Гребенцов важодсь МАССР-нь Гостелерадиокомитетсэ литературно-драматической редакциянь редакторокс, анокстась Мордовиянь литературань содавикс деятельтнеде вадря радиопередачат. Роботась «Чилисема» журналсо ответственной секретарекс, МАССР-нь Писателень союзсо литконсультантокс, художественной литературань пропагандань бюронь прявтокс. Ламо иеть важодсь образованиянь системасо, ульнесь «Народное образование РМ» журналонь редакторокс.
Сон – Россиянь Писателень союзонь член (1992), РФ-нь общей образованиянь Почетной роботник (2012), МР-нь заслуженной поэт (2015), Покш Березникбуень Почетной ломань (2017), Финнэнь-угрань Писателень ассоциациянь ды Эстониянь Малавикс раськетнень программань премиянь Лауреат (2019).
«Эрзянь правда» газетань коллективесь ёвты лембе валт сёрмадыцянтень чачома чинзэ кувалма. Геннадий Сергеевич, уледе шумбра, уцяскав, шожда ки тенк ды кувака эрямо!
Татьяна МАТОРКИНА
Фототне: Э.Ретунский