Вера Ивановна Щукина чачсь-кассь Дубенка буень Морга велесэ. Эйкакш пингестэ саезь тонавтнесь авань тевтненень: кодась, стась, викшнесь, теде башка, вечкилизе морамонтькак. Эрьва тевстэ, кодамо ежозо илязо уле, серьгедиль моро. 8 класстнэнь прядомадо мейле тусь тонавтнеме Орданьбуень культпросветучилищав. Тонавтнема шкадонть сон ледстни лембестэ.
– Эрямось сестэ ульнесь пек уцяскав. Эйсэнек тонавтсть вадря тонавтыцят, конат бажасть максомс тенек культурасо важодемань содамочитнень. Сеть шкатнестэ минь ютавтнинек ламо мероприятият, конатнень мельспаросо ледстнян нейгак, – корты Вера Щукина.
17 иесэ Вера Ивановна лиссь мирденень ды сынь састь эрямо Саранскоев. Мирдензэ марто вейсэ чачсть-кастсть колмо эйкакшт. Седе тов поладызе важодеманзо Н.П. Огарев лемсэ госуниверситетэнь велень хозяйствань факультетсэ, конань прядомадо мейле Вера Ивановнань кадызь важодеме кафедрас учебной мастерэнь тевенть топавтыцякс. Кода корты эрзянь авась: морамонть эзизе кадно сеть шканестэяк. Ие якась «Келу» морокуров.
Кавто иеде икеле «Ламзурь» ансамблянь прявтось Раиса Щанкина гайневтсь Вера Ивановнанень ды тердизе мартост морсеме.
– Ансамблясонть морамось сеске тень саевсь, васенце чистэнть уш морынек ломань икеле. «Ламзурьсэ» улемась тень пек вечкеви, минь ардтнетяно Мордовиянь буетнева, якатано школава, колледжга, невттяно кезэрень койть-кирдат. Тесэ лия аватнень лангсто неинь човалясто кодазь гердант. Ансамблясо морыцятне мерсть варчамс те тевенть моненьгак. Васня кода-бути эзинь кеме эсь лангозон, пелинь, тевесь а лиси, ялатеке шкань ютазь Интернэтсэ карминь ваномо кодамонь урокт, ловномо материалт. Иеде икеле кодыя васень герданом, – корты эрзянь авась.
Ней кедьчелькевенть лововить малав 100 кодавксонзо. Сынст ютксо – кедькст, пилекст, гердант, чокерт. Эряви меремс те тевесь а шожда, ялатеке Вера Ивановна герданонть кодасы кавто чинь перть. 5-6 часонь перть а стякшны таркастонзо, бажи эрьва кодавксонтень путомс ойме.
– Эрьва кедьчелькевенть эсензэ кодамонь стилезэ. Ули сон моньгак. Човалятнеде мазылгавтомапелентень эрявить ламо, секскак вешнян эйсэст эрьва кодамо лавкасто. Мон а жалян ярмакт, бажан кодамс паро ежосо ды вечкезь, – мерсь Вера Ивановна.
Степан Эрьзянь чачома чистэнзэ саезь 150 иетненень сентябрясто Китайсэ сонзэ лемс панжови выставка, косо эсь шкинемаст невтьсызь Мордовиянь мастертнэяк. Сынст ютксо – Вера Щукина. Степан Эрьзя лемсэ фондонь важодицятне неизь аванть кодавксонзо Римма Жегалинань лангсто ды вешсть содавтомс сынст кедьчелькевенть марто. Важодевкстнэнь ванкшномадо мейле Вера Ивановна тердевсь Китаев выставкав. Нама, тов эряви анокстамс ламо кодавкст, секс неень шкасто авась чинек-венек топавты кармавтоманть. Июленть ушодовомсто Московсо эрьва кодавксонтень сермадыть декларация. Сонсь авась корты:
– Зярдо тердимизь те выставкантень, ульнесь тень пек мельспаро. Ней вана капшан, теян ламо мазыльмат, тосо тень максыть покш витрина. Прявт жо бажамось: невтемс лия раськень ломантненень эрзянь-мокшонь мазычинть ды сюпавчинть, кода оршамосо, истя эрямонь лувсояк. Евтан сюкпря весенень, кить лездыть тень те шкастонть ды кенярдыть мартон. Арсян, весе мелень топавтовить, мазылгавтомкатне кодавить, невтемась юты парсте.
Вера Ивановна марто кенярдтано миньгак. Те выставкась тееви таркакс, косо каштанчисэ карми аштеме эрзянь раськесь эсь ломанензэ кувалма. Степан Эрьзяньгак мелезэ топавтови: зярыя иень ютазь минек енкстонть тагояк кармить содамо масторонь лия эрицятне.
Яна Кудашкина