Суббота, апреля 04, 2020
Важное

 

Эрьва иестэ февраль ковсто масторсонок тешкстави воинэнь-интернационалистэнь чись. Те иестэнть сон тондави февралень 15-це чинтень. Воинэнь-интернационалистэнь чись алтазь советской войскатнень 1989 иестэ Афганистансто ливтемантень.

 

Афганистан – зяро сестэ те валсонть ульнесть сэредькст ды ризнэмат, тетятнень-аватнень учомат ды сельведть. Сеть, кить тосто велявтсть, зярдояк а стувтсызь те масторонть, косо савсь неемс маштовозь оятнень. Афганистанонь толонть пачк ютасть 620 тёжат советской солдатт ды офицерт, 15 тёжат маштовсть.

Отяжелень райононь Сабанцелестэ Николай Слугинэнь туртов Афганистанось кадови мельс эрямонь меельце читнес. Сон эзь арсекшнеяк, сави улемс тосо. Чачсь ды кассь Сабанцелесэ, тонавтнесь школасо. Пек вечкилизе спортонть. Нейгак ледстни покш мельспаросо физкультурань тонавтыцянзо Николай Николаевич Пелагейкинэнь, Дмитрий Петрович Горбуновонь – бороцямонь тренерэнзэ. Пек вечкилизе бороцямонть, сокссо чийнеманть.

Николай Слугин школань прядомадо мейлень тешкст эзь тейне. Сон эсь классонь тонавтницятнеде ульнесь иеде седе покш. Содась, сёксня сайсызь армияв. Истя лисськак. Кемень класстнэнь прядома иестэнть кизна тердекшнизь военкоматов. Забайкальянь погранотрядсто сакшнось представитель. Тов пурнась од служицят. Николай Слугин понгсь сынст юткс. Сынст группаст кадокшнызь сёксес. Те тувталонть кувалма эрзянь цёрась эзь арсеяк Афганистандо, куш тосо уш мольсть военной действият. 1985 иень сёксня кандсть повестка. Коень коряс ильтясть эйсэнзэ оятне ды малавикстнэ. Забайкальяв кись аволь нурькине. Савсь ливтямс самолётсояк, ардомс поездсэяк. Пачкодсть Приаргунск ошонть малас. Тесэ ульнесь сынст учебной подразделенияст. Николай Слугин понгсь маневренной группас. Те шкас сонзэ уш ульнесть трактористэнь праванзо. Кармасть эйсэст тонавтомо. Сынст маневренной группантень эрявсь свал сакшномс лезкс марто заставатнень нарядтнэнень, бути сынст лангс кияк каявиль. Сабанцелень цёрантень ульнесь а стака, техниканть сон вечкилизе. Шкась мольсь. 1986 иень май ковсто сынст погранзаставань зярыя служицятнень кучизь командировкав Средней Азияв. Сестэ эштё аламот кить чарькодсть, мекев Забайкальяв велявтома а карми. Пачтизь Термез ошов. Ковонь перть кирдизь пекстазь помещениясо. Тенень тувталось – климатонь условиятне. Забайкальясь – якшамо ёнкс, Сибирь. Термезэсь жо Средней Азия. Псись тесэ кизна лиясто эрси 40 градусто ламо. Аклиматизациясь мольсь весень туртов а вейкетьстэ. Николай Слугин кодамояк стакачи эзь маря, спортонь вечкемась ды од порась эзть максо цёрантень нусмакалемс. Ковдо мейле кармасть тонавтнеме. Занятиятнесэ ламо мель явовиль мусульмантнэнь койтнень-кирдатнень тонавтнемантень. Васняяк а весе чарькодсть, ков тевесь моли, мейле аламонь-аламонь весемесь пачкодсь. Кавтошка ковдо мейле сынст оршизь од оршамопельсэ, макссть оружиянтень боекомплектт ды озавтнизь вертолётс. Ней уш весе содасть, кись – Афганистанов. Ливтясть аволь кувать. Герат провинциясь границядонть мейле сехте маласо. Тагтабазар эрямо тарканть маласо ульнесь минек погранотряд. Те минек Кушкадонть овсе аволь васоло, ансяк леень трокс. Тесэ ульнесть кавто ковт. Те шканть ютазь сынст явизь кавто группава. Николай Слугин понгсь служамо Герат провинциянь Кайсар эрямо тарканть маласо погранотрядонтень. Тесэ ульнесь аволь сэтьме. Душмантнэ леднесть чинек-венек. БТР-сэ, косо икеле Слугин ульнесь наводчикекс, таркат арасельть. Савсь тензэ улемс снайперэкс. Те тевесь аволь шождатнестэ. Зярдо леднят ятонть ёнов ды а содат, кияк понгсь эли жо эзь – те вейке тев. Зярдо ломаненть лангс ванат оптической прицелэнть пачк ды сон теке кедь лангсо – те овсе лия. Тезэнь эряви кеме обуця ды а сорныця кедть. Слугинэнь те весе ульнесь. Зярдояк а стувтови тензэ, кода васенцеде понгонесь душмантнэнь марто карадо-каршо. Сестэ сынь ванстсть колоннанть, кона ардсь пандонь киванть. Апак учо верде кармасть лангаст леднеме. Николай Слугин обуцянь коряс пек сэтьме, секскак тандадомат арасельть. Теке марто икелень служицятне одтнэнь икелев эзть нолдтне. БТР-стэ васняяк лисильть сынсь, мейле уш седе одтнэ. Сестэ весе велявтсть заставав живстэ.

Николай Слугинэнь мельс кадовсть аволь ансяк душмантнэнь марто кежей вастовоматне. Ледстневи пароськак. Зярдояк а стувтсы, кода кандокшность казнеть афганонь эйкакштненень сынст школав. Неть казнетнень кучокшнызь тиринь ёнкссто истят жо тонавтницят. Тесэнь школась теезель сёвоньстэ, тонавтнесть ведьгеменьшка эйкакшт. Тетятне-аватне аволь весень нолдтнесть. Николайнень зярдояк а стувтови эйкакштнень сельмсэ кенярксось.

Колмо ковонь ютазь рядовоесь Николай Слугин кармась БТР-нь наводчикекс. Сынст экипажось участвовась ламо операциятнесэ. 1987 иестэ Афганистанонь вейке  провинциянь пандотнесэ разведчиктне мусть душманонь база. Тосо ульнесь ламо оружияяк. Базась парсте кекшезель. Командованиясь кучсь тов колмо маневренной группат. Сынст ютксо ульнесь Слугинэнь экипажоськак. Ардомс пандонь киванть савсь сядошка вайгельбеть. Лангаст зярыяксть леднесть. Эрявикс таркантень пачкодемадо мейле сынст группанть явокшнызь кавтов. Пещерантень совамо тарканть леднесь артиллериясь ды ёртнесть бомбат самолёттнэ. Экипажтнень солдаттнэнень те шкас тев арасель ды секскак кие оймсесь, кие ванкшнось техниканть. Николай Слугин оймсесь БТР-нть лангсо ды вансь, кода сезневить снарядтнэ пещеранть маласо. Весе арсесть, душмантнэ тосто умок оргодсть. Апак учо Слугин неизе, кода пещерастонть лиссть душмантнэ ды ношкстасть оргодеме. Сон курок саизе автоматонть ды уставась лангаст леднеме. Састь ёжос сонзэ оянзояк, ды группась кармась валомо душмантнэнь виев толсо. Аламотненень удалась оргодемс. Зярдо совасть пещерантень, тосто мусть ламо эрьва кодамо оружия ды ярсамопель. Душмантнэ сонзэ анокстакшнызь кувать эрямс. Те операциянть кисэ Николай Слугинэнь казекшнизь «За отвагу» медальсэ.

Эрзянь цёранть мельс кадовсь эштё вейке операциясь. Сестэ сынст БТР-сь  ильтясь автоколоннанть. Ардомс савсь чинь перть. Весе сизекшнесть. Чокшне малав колоннась лоткась оймсеме. Весе теезель уставонь коряс: ладязельть ванстыцят, лиятне оймсесть. Эзть удо ансяк душмантнэ. Сынь кувать вансть колоннанть мельга ды веньберть арсесть каявомс лангозонзо. Истя лиссь, ванстыцятненень душмантнэ эзть редяво. Сынь ульнесть тиринь масторсо ды содылизь пандотнева эрьва ютамо кинть. Ушодовсь боесь. Минектне эзь талакадо. Полонс саезельть зярыя душмант.

Истят операциятнеде Николай Слугинэнь ульнесть ламо. Эрсиль, зярдо весе шумбрасто велявтыльть мекев, эрсиль истяяк, аволь весе. Эсензэ Николаень уцяскась ванстызе. Службадо мейле велявтсь кудов. Тевтеме эзь аште. Роботась велень колхозсо  механизаторокс, лиясо-косо. Эрьва иестэ воинтнэ-интернационалисттнэ пурнавкшныть вейс, ледстнить служамонь иетнень. Аволь весенень савсь тосто велявтомс. Районсонть зярыя калмот, косо калмазь афганецтнэ. Сындест а стувтнить. Николай Слугин эсь оятнень-интернационалисттнэнь марто свал кандтнить калмост лангс цецянь каштазт. Афганистанось а стувтови, сон свал карми седейсэ.

Николай Евдокимов

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».