Мартонть ушодовомсто шкинемань 30 иетнень тешкстынзе «Росичи» Мордовиянь государственной моронь театрась. Тень коряс И. М. Яушев лемсэ Оперань ды балетэнь театрасо ютавтовсь концерт. Коллективенть творчествань вечкицятнеде пурнавкшность пешксе зал. Артисттнэ морызь сехте вечкевикс композициятнень, конатне кармасть хитэкс ды аштить «Росичи» моронь театрань чачокс, истя жо ульнесть ламо од произведеният.

Эряви меремс, «Росичи» театравтомонть а юты Саранск ошонь вейкеяк кенярксчи. Республикань покш читнестэ эйсэст мельспаросо учить минек районтнэсэ. Лембестэ ды седейшкава морыцятнень вастыть лия регионтнэсэяк.
30 иеть – те эште овсе од пора, ансяк теезьгак уш ламо. Весе те шканть перть коллективенть прявтсо, косо артисттнэде ней лововить 11 ломань, эряза, мазый, эрямонь вечкиця, свал икелев молиця авась – Елена Николаевна Едакина.

Аволь умок минек газетантень интервьюсонть Елена Николаевна евтнесь, зярдо ансяк пурнавсь коллективест, морсесть кезэрень, акапельной, духовной ды народной морот. Седе тов арсевсть концертэнь пелькст: казаконь, цыганонь, кадриль, неень шкань обработкасо раськень фольклор, 1970-це иетнень морот. «Мордовиясо минь ульнинек васенцеть, кить тейсть казаконь блок. Мельганок ламот кармасть тейнеме истят жо номерт. Те шкас концерттнэнь ютавттано истямо лувсо. «Росичи» – те вишка Россия», – евтнесь Елена Едакина.

Ды течияк, вейке коллективсэ сынь невтить покш масторонок сюпавчинть. Ламо раськеть эрить Россиясо, ансяк весенень эряви улемс вейсэ! Теньсэ минек виенек. Неень шкане коллективенть репертуарсо 500 ламо морот. Покш пельксэсь Россиядо, эсь масторонтень вечкемадо. Кезэрень моротненьгак коллективесь а кадны, тейни тенст неень шкань аранжировка. Ваныцятне покш мельспаросо вастыть советской шкань моротнень. Эйсэст ули смусть, парос кемема, киньгак а кадыть мельтеме. Улить морост мокшонь ды эрзянь кельтнесэяк.

«Росичинь» концерттнэ эрсить малав эрьва чистэ, теде башка, улить республикань кенярксчить, покш вастовомат. Кодат иляст уле мелявкст ды талномат, весемесь стувтови сцена лангсо. Меельце шкасто ламо тев ветяви Пушкинэнь картанть коряс. «Росичинть» тердтнить морамо республикань школатнева. Коень коряс, концертсэ морамсто сынь ламо кортыть кунсолыцятнень марто, бажить токшемс эрьва ойменть. Ваныцятнеяк пандыть тенст паросо: виев цяпамосо, цецясо, евтыть ды сермадыть сюкпрянь валт, тердить самс эштеяк морамо.
Ды кода тешксты «Росичи» моронь театрань прявтось, художественной руководителесь, МР-нь заслуженной артисткась Е. Н. Едакина, моронть ютавтома седеенть пачк – ансяк сестэ ваныцясь карми теть кемеме.

Фотось «Росичи» моронь театранть.