Рубрикатор

Спорт Николай Девяткин: «Вечкевикс роботасо ломанесь а сизи»
Николай Девяткин: «Вечкевикс роботасо ломанесь а сизи»

Отяжелень райононь Таразбуе велень средней школасо физкультурань тонавтыцядонть Николай Петрович Девяткиндэ ды спортонь вечкиця сынст семиядост районсонть а содыцят арасть. Николай Петровичень ды нинзэ Ольга Сергеевнань содасынь аволь марсемань коряс. Зярдо-бути савсь вейсэ ютавтомс студентэнь иетнень. Те шкастонть ютасть ламо иеть. Аволь умок Николай Петрович тешкстызе 60 иень юбилеензэ ды секскак, зярдо журналистэнь китне-янтнэ ветимизь Отяжелень районов, ульнесь мелем вастовомс мартонзо ды ёвтамс поздоровт. Истя лисськак. Вастовинек велень школасо.

Эрьва ломаненть эрямозо онкстави аволь ансяк иесэ, паро тевсэяк. Тень кисэ Николай Петрович Девяткиннэнь якстерьгалемс а сави.
Чачсь сон 1959 иестэ Отяжелень райононь Таразбуе велесэ. Тетязо, Пётр Дмитриевич, Ине Отечественной войнань участник, роботась колхозсо механизаторокс. Авазо, Матрёна Фёдоровна, истя жо топавтсь колхозонь тевть. Девяткинтнэнь семиясо ульнесть кото эйкакшт. Истят семиятнесэ эйкакштне свал трудонь вечкицят. Коляненьгак вишка шкасто саезь уш савсь лездамс кудоютксо тетянстэнь-аванстэнь, топавтомс эрьва кодат тевть. Кие соды, паряк самай тестэ ютась цёрантень трудонь вечкемась.
Кода лия эйкакштнеяк, тесэ тусь васенце классос. Таразбуень школась ульнесь 8 иень, эштё кавто класстнэнь савсь прядомс Сабанцелесэ. Сестэ тонавтницятнеде ламольть ды, штобу понгомс спортонь командас, прянть эрявсь невтемс паро ёндо. Николай пек вечкиль сокссо чийнеме, футболсо налксеме.
Николай Девяткин свал участвовась райононь ды седе покш пелькстамотнесэ. Се шкане «Золотая шайба» турнирсэнть Таразбуень школань командась свал лисниль изницятнень юткс. Девяткин паро мельсэ ледстни физкультурань васенце тонавтыцянзо Николай Филиппович Парамоновонь. Спортонть марто эрямонь ояксчинь сюлмотнень уставась сюлмамо эйкакштнень марто сон. Кавксо класстнэнь прядомадо мейле Николай Девяткин поладызе тонавтнеманзо Сабанцелень средней школасо. Физкультурань учителекс тесэ роботась эсь тевень вечкиця ломанесь – Николай Николаевич Пелагейкин. Сон Николаень превс путызе школань прядомадо мейле молемс тонавтнеме М.Е.Евсевьевень лемсэ МГПИ-нь физической воспитаниянь факультетэв.
– Се шкане тов понгомс снартнесть ламот, – ёвтни Николай Петрович, – вейке таркантень савкшность 10 абитуриентт. Кувать арсинь. Сынь мельс, а карман снартнеме лиякс ладямс эсь уцясканть.
Саизь армияв. Служась Москов маласо Подольск ошсо. Подразделениясонть, косо служась Николай Девяткин, спортонь роботась ладязель кода эряви. Те пек тукшнось мельс. Од солдатось поладынзе сокссо чийнемань тренировкатнень. Васенце турнирсэнть сокссо чийнемстэ сайсь васенце тарка. Теде башка, пек парсте леднесь. Кода паро спортсменэнть, Николай Девяткинэнь кучизь спортонь ротас. Округонь турнирсэнть военной троеборьясо топавтынзе спортонь мастерэкс кандидатонь нормативтнень. Службась эзь марявояк кода мольсь. Тонавтнемадо мельтне эзть тукшно цёранть пряудемстэ. Савсь вешемс кудосто учебникть ды ютко шкасто ледстямс школасо тонавтнемань материалтнэнь. Армиясто велявтомадо мейле икелень солдатонтень колхозсо явсть од комбайна. Те тевенть Николай Девяткин парсте содылизе. Аволь вейке ие тетянзо марто роботакшнось комбайнёронь лездыцякс.
– Ёжомарямон эрьва кодатольть, – ёвтни физкультурань тонавтыцясь, – ве ёндо ульнесь мелем молемс тонавтнеме, лия ёндо – од комбайнанть тень стакаль кадомс. Сынь мельс, кода илязо уле, виень варчасынь.
Примамонь экзаментнэнь Николай Девяткин кирдинзе парсте. Тонавтнемскак ульнесь тензэ шожда. Тесэнь дисциплинатне сюлмавозь спортонть марто, конань сон пек вечкелизе. Седе ламо вийть путсь шожда атлетиканть лангс. Институтонь сборной командась, косо ульнесь Девяткингак, якась Таганрог ошов весероссиянь турнирэв. Многоборьясо топавтокшнынзе васенце разрядонь нормативтнень.
Тонавтнемань иетне ютасть эзть марявояк. Николай Девяткин прядызе тонавтнеманзо якстере диплом марто. Се шкане парсте тонавтницятненень меревсь муемс роботамо тарка эсь мелень коряс. Николаень ульнесь мелезэ роботамс Рузаевкань школасо физкультурань тонавтыцякс, ансяк таркат арасельть. Савсь вешнемс робота Мордовиянть томбале. Стройотрядонь коряс оязо тердизе Рязанев. Тосонь швейной техникумсо муевсь тарка. Ушодсь роботамо. Эштё Саранскойсэ тонавтнемстэ вастокшнызе Ольга вечкевиксэнзэ. Иень ютазь налксесть свадьба. Ней савсь арсемс аволь ансяк эседензэ. Эрявсь эрямо тарка. Китне-янтнэ ветизь мик Донбасов. Донецк ошсо ульнесть раськензэ ды тонат тердизь. Тесэ робота кувать вешнемс эзь саво. Шахтатнень управлениясо арасель физкультурань методист-организатор. Физкультурань базась тосо сюпаволь. Эрьва шахтанть ульнесть эсензэ спортзалонзо, стадиононзо. Эрявсь ладямс физкультурно-шумбрачинь витемань роботанть. Цёрась кедень илештязь кундась тевентень. Нурька шкань перть спортонь роботась вельмевтезель. Эрьва оймсема читнестэ ютавтневсть турнирт, первенстват шахтатнень ютксо. Муевсь робота нинстэнь Ольга Сергеевнаненьгак. Зярыя шкань ютазь макссть тенст эрямо тарка. Перестройканть самонзо марто весемесь кармась полавтовомо. Кармасть пекстневеме шахтатнеяк. Спортось истямо шкасто киненьгак эзь эряво. Ломантне, кода маштсть, трясть эсь прятнень рынкань отьмасонть. Девяткинтнэнь икелев стясь кевкстема: мезе теемс седе тов? Теке марто тиринь ёнксоськак седейстэст зярдояк эзь тукшно. Нинзэ марто састь вейке мельс – велявтомс Таразбуев. Истя тейстькак. Таразбуень школасо физкультурань тонавтыцянь тарка арасель. Николай Петровичень жо обуцязо аволь истямо, штобу аштемс тевтеме. Сон эзь карма покшкавтнеме ды лиссь важодеме колхозов. Истя мольсь кавто иеть. Мейле тердизь школав. Се шкантень тосо таркась чамокшнось.
– Тонавтницятнеде сестэ ульнесть 90 эйкакшт, ансяк кодамояк спортонь база арасель, – ледстни Николай Петрович. – Савсь ушодомс чаво таркасто. Содавикстнэнь кувалма добовинь спортонь оршамопель, лия-мезе. Эсь роботасон арсинь нежедемс шожда атлетиканть ды сокссо чийнеманть лангс. Мельсэнь кирдеви, кода 1993 иестэ ютавтынек сокссо чийнемань васенце тренировканть. Прась васень лов. Эйкакштнень марто футболсо налксемань паксянтень пурнынек лов ды уставинек. Невтевкстнэнь кувать учомс эзь саво. Райононь уш васенце старттнэсэ Таразбуень тонавтницятне лиссть призёртнэнь юткс. Владик ды Павел Кузнецовтне, Светлана Абрамова, Алексей Сульдин свал невтнесть паро результатт.
Зярыя шкань ютазь велень клубсо кинонь ваномань залонть мерекшнесть теемс школань спортзалокс. Кенярксось ульнесь певтеме. Роботасть тонавтыцятнеяк, эйкакштнень тетятнеяк-аватнеяк. Зярдо весемесь аноколь, панжозельть мини-футболонь ды лия секцият. Уш иень ютазь мини-футболсо Н.П.Девяткинэнь командась лиснесь райононь чемпионокс. Панжозель армспортонь секция. Тесэяк улить изнявкст. Николай Петровичень ды Ольга Сергеевнань тейтерест, Юля, топавтынзе спортонь мастерэкс кандидатонь нормативтнень. Сон истя жо тусь тетянзо киява ды ней роботы Н.П.Огарёвонь лемсэ МГУ-со физкультурань тонавтыцякс. 2009 иестэ Таразбуесэ панжозель од школа. Проектэнь коряс тесэ ули паро спортзал. Кармасть явомо ярмакт спортинвентарень рамамс. Лиясь бу оймаволь истят тевтнеде мейле. Н.П.Девяяткин жо ломанесь аволь истямо, оймамонь а содыця. Се шкане районсонть овсе ёмакшнось эйкакшонь хоккеесь. «Сырнень шайба» турниртнэ ютыльть Отяжелень налксицятневтеме. Николай Петрович арсизе, ды эйкакштнень марто школанть ваксс тейсть хоккеень стадион, эсь вийсэ. Кармасть налксеме, теезельть кавто командат. Се шкане районсонть те ульнесь дивань тевекс. Теке жо сезонстонть Таразбуень вишка хоккеисттнэ пачкодекшнесть Мордовиянь первенствантень. Самай Николай Петрович Девяткинэнь хоккеень стадионось макссь сестэ од лув районсонть те спортонть кепедемга.
2010 иестэ Саранскойсэ панжозель соксонь-биатлононь куншкакуро. Республикань районтнэсэ кармасть панжтнеме филиалт. Отяжелесэ тренерэкс тердизь Николай Петровичень. Каршо эзь моле. Неень шкас те спортсонтькак улить изнявксонзо. Сонзэ зярыя воспитанникензэ совавтозь Мордовиянь сборнойс. Паро результатт свал невтни Никита Леонтьев. Сон – спортонь мастерэкс кандидат. Изнясь Равчирень федеральной округонь первенствасо. Свал изницятнень ютксот Ивашкин Артём, Адушкин Никита.
Кода илязо уле, сехте ламо тевтне школасо тонавтницятнень марто. Николай Петрович Девяткин снартни совавтомс тонавтнемань лувонтень неень шкань од ёнкстнэнь.
– Николай Петрович коллективсэнек ловови эсь тевень алкуксонь специалистэкс, – ёвтни школань директорось Марина Алексеевна Атласова, – Сонзэ роботанзо невтить результаттнэ. Эйкакштнень сон тонавты сенень, мезесь маштови эрямосо. Школав сеедьстэ сакшныть икелень воспитанникензэ ды ёвтыть тензэ сюкпря. Тонавтыцянть туртов те сехте питней.
Роботадо башка, Николай Петровичень ламо вечкевикс тевензэ. Покш мельсэ вечки котьмамо сад ды эмеж пиресэ, вечки якамо калонь кундсеме.
Николай Петровичень роботазо апак редя эзь кадово. Сон – Россиянь Президентэнь грантонь саиця. Ламо Почётной грамотанзо Российской Федерациянь ды Мордовиянь образованиянь министерстватнень пельде. Сонсь ветеранось оймсеме туеме а снартни.
– Вийтне ды аравтлувтне эштё ламо, – корты Николай Петрович. –Вечкевикс роботасо ломанесь а сизи, карман топавтомо вечкевикс тевем седе товгак.
Н.Евдокимов


01.03.2019

 

Новости

«Единая Россия» добьется закрытия недобросовестных «наливаек» в регионах
«Единая Россия», активисты «Молодой Гвардии Единой России» и проекта
«Трезвая Россия» начали всероссийский сбор подписей в поддержку своей
инициативы об ограничении работы питейных заведений, расположенных
на первых этажах многоквартирных домов и придомовых территориях (так
называемых «наливаек»). На сайте Партии и ее региональных отделений
каждый желающий может оставить свое мнение о данной инициативе и
сообщить адреса «наливаек», мешающих жителям. Информация о
подобных заведениях будет передана в правоохранительные органы для
проведения проверок. Об этом сообщила первый заместитель секретаря
Генсовета «Единой России» Ольга Баталина.
Подробнее ...
 
Единороссы высадили еловую аллею в Саранске
Акция по высадке саженцев, посвященная 75-летней годовщине Великой
Победы, состоялась сегодня в Саранске в микрорайоне Юбилейный.
Представители регионального отделения Партии «Единая Россия», МГЕР
Мордовии, молодежных общественных организаций, студотрядов,
юнармии, поисковых отрядов посадили более 40 саженцев, которые
доставили из Краснослободского района республики.


Подробнее ...
 
В Краснослободском районе успешно реализуется проект «Наследники Гиппократа»
Сегодня в медицинском колледже прошло занятие для волонтеров-медиков
Одним из победителей конкурса общественно-значимых проектов первичных отделений Партии «Единая Россия» стал проект первичного отделения №381 Краснослободского района «Наследники Гиппократа». Этот проект уже успешно реализуется в медицинском колледже в рамках реализации партийных проектов «Здоровое будущее» и «Старшее поколение», его участниками стали студенты-волонтеры.
Как отмечает секретарь первичного отделения 381 Краснослободского района Татьяна Кутузова, на средства, полученные в рамках гранта, были закуплены тонометры для измерения артериального давления, медицинская литература.
Подробнее ...
 
Съезд «Единой России» будет посвящен старту избирательной кампании в Госдуму в 2021 году
Предстоящий Съезд «Единой России» будет посвящен подготовке к
избирательной кампании в Государственную Думу в 2021 году и оценке
результатов прошедших выборов. На Съезде также предстоит обновление
партийных институтов с акцентом на электоральную составляющую. Об этом
заявил секретарь Генерального совета «Единой России» Андрей Турчак на
заседании Президиума Генсовета Партии.
Подробнее ...
 
В Мордовии стартовала акция «Круг добра»
Акция «Круг добра» проводится в рамках сотрудничества Центра
поддержки гражданских инициатив, сторонников «Единой России» и
благотворительного фонда «ДаДобро». Это еще один этап реализации
Календаря Добрых дел.

Подробнее ...