Рубрикатор

Домашнее хозяйство Лейтнень ды эрькетнень ванстомга
Лейтнень ды эрькетнень ванстомга

Ведесь свал сайсь покш ды эрявикс тарка эрьва ломаненть эрямосо. Тюштянь пингестэ саезь ломантне эрямо кудокс кочкасть сеть таркатнень, косо маласо ули лей эли эрьке. Минек покштянок-бабанок эзть явово лиятнень эйстэ ды весе раськенек эсь кудоюртост тейсть покш лейтнень малас.Ютасть ламо иеть, полавтовсь эрямоськак. Ансяк вана лейтнень эрявиксчист саи покш тарка течияк. Мордовия Республикасо лововить зярыя покш лейть ды эрькеть, конат аштить пертьпельксэнь покш сюпавчикс.

Мокшась

 Мокша леесь эсь ушодксонзо саи Пенза ёнксонь Мокшан веленть маласто, пры Ока леентень Рязанень областьсэ. Целанек леенть кувалмозо 656 вайгельпеть, Мордовиява сон таргавсь 320 вайгельпес. Арсематнень коряс, леенть лемезэ лиссь мокша раськенть лемензэ эйстэ, конат эрить минек республикасо те леенть малава.

Мокшась – састо чудиця лей. Келезэ таркань-таркань малав вете метрат, Кочелаева веленть маласо – малав 30 метрат, Краснослободскоенть маласо пачколи 85 метрас, а леенть прамо таркатнесэ келесь малав 150 метрат.

Мордовия Республиканть территориясо Мокшанть маласо аштить Ковылкина, Краснослободск, Темников оштне. Те леесь пек вечкеви туристтнэнень, секскак тия юты ведень маршрут. Мокшанть малава пек мазый пертьпельксэсь. Теке марто тесэ истямо коштось – а пештяват.

Сурась

 Сура леесь покшолмань коряс минек республикасо ловови омбоцекс. Чуди сон Мордовиянь обедъёнкс марто чилисема ёнксканть ды ашти минек республиканть Ульяновскоень областенть марто межакс. Целанек леенть кувалмозо 841 вайгельпе, Мордовиява чуди 120 вайгельпень покшолмасо пельксэсь.

Сурась малав весе чуди виде таркава. Сонзэ потмакссо чувар, чуросто вастневить вишка кевнеть. Вить чиресь весе леенть кувалт сэрей, тесэ касыть эрьва кодамо куракшт ды чувтот. Керш чиреванть ламо пляжт, конат таркань-таркань кассть чувтосо. Мордовиява чудема таркатнесэ лайменть келезэ пачколи 3-5 вайгельпес, улить таркат, косо 10-12 вайгельпеть. Эсензэ Суранть келезэ пачколи 80-160 метрас.

Венчсэ ды лиясо мейсэ укшныцятнень туртов Сура леесь пек вечкеви панжиковсто. Те шкастонть леесь пешкеди ведте ды чудияк седе эрязасто.

Леенть маласо роботыть эйкакшонь туртов ламо лагерть, оймсема базат. Поймасонть ламо эрькеть, теке марто Мордовиянь сехте покш эрькесь – Инеркась.

раторось

Чуди леесь Ицялонь ды Орданьбуень районтнэва. Ушодови жо Нижегородской областень Первомайской райононь Алатырь веленть маласто (тестэ, паряк, аштияк лемесь). Раторонть пек келей поймазо. Кендя веленть маласо сон малав 3,5 вайгельпеть, а Ицялонть ды Кемлянть вакссо  – 5 вайгельпеть. Тундонь шкастонть пертьпельксэнь весе лугатне туить ведь алов.

Леенть чудемань весе таркаванть вастневить пек ламо вишка эрькинеть ды чеядавкст. Орданьбуе ёнксонь Тургенева посёлканть маласо леенть лангсо ашти плотина, кона полавты сонзэ чудеманзо.

Республикань эрицятнень ды инжетнень, конат вечкить ведь маласо оймсеманть, леесь пек кенярдовты кизэнь ды тундонь лембе шкастонть. Тия укшныть венчсэ, пек вадря сон байдаркатнень туртовгак.

Эряви тешкстамс, Ицялонь районсонть Раторонь керш ёнонь бассейнань малав весе пельксэнть саи «Смольный» национальной паркось.

 Инеркась

 Сонзэ лемезэ корты эсензэ кис – ине эрьке. Целанек эрькенть покшолмазо 56 гектарт, кувалмозо – 4,1 вайгельпеть, келезэ – 200 метрат, сэрезэ – 6 метрат (улить таркат, косо сэрезэ пачколи 11,2 метрас). Кизэнь лембе шкатнестэ ведесь тесэ эжи 20-24 градусос. Веденть тюсозо сэняжа-пиже, пачканзо неят кавтошка метрат. Инерканть перька касыть тусто пичевирть, секскак коштось тесэ пек ванькс.

Неть лейтне ды эрькетне минек республиканть туртов аштить аволь ансяк мазычикс, сынь ломантнень эрямонь ванстомань юр, сынь минек андыть-симдить. Секскак пертьпельксэнь неть сюпавчитнень  ванстома ды пштистэ мельгаст ванома.

Ю.Еремина

 

Новости

Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...
 
Университетсэ кармить тонавтнеме 4600 студентт

Н.П.Огарёв лемсэ МГУ-нь примамонь комиссиясь панжинзе кенкшензэ абитуриенттнэнь туртов июненть прядовомсто. Неть читнестэ университетэнь ректорось С.М.Вдовин ёвтынзе примамонь комиссиянь икелепелень итогтнень. Васняяк Сергей Михайлович ёвтась сюкпрянь валт республикань СМИ-тненень университетэнть тевдееманзо весеме ёндо невтеманть кисэ.

Подробнее ...
 
Ветеранонь промкс

Августонь 15-це чистэ Саранскойсэ ютась Мордовиянь ветеранонь организациятнень активень промкс. Пурнавкшность малав 400 ломанть. Промксонь участникекс ульнесь Мордовиянь Прявтонь тевтнень нурька шкас топавтыцясь В.Д.Волков.

Подробнее ...