Рубрикатор

Cобытия недели Мордовиясь кочкась прявт
Мордовиясь кочкась прявт

Сентябрянь 10-це чистэ, вайгелень максомань вейкине чистэнть, Мордовиянь эрицятне кочкасть республикань Прявт. Регионсонть важодсть 785 кочкамонь участкат, весе сынь панжозельть валске марто 8 чассто ды важодсть 20 часос. Эрьвасонть теезельть кочкамонь комиссият, важодсть наблюдательть. Республикань эрицятне чарькодсть, сынст кочкамост эйстэ ашти республиканть вандынь эрямозо, се, кода карми касомо-кепетеме регионось, кода карми эрямо эрьвась эйстэнек. Секскак кочкамонь участкатнес ламот мольсть семиянек, малавиксэст-содавиксэст марто. Ломантне ютасть мизолкс марто, паро ёжосо, весе ёвтасть вейкест-вейкест туртов поздоровт те покш чинть кувалма.

Чинь омбоце пельксстэнть кочкамонь 557 номер участкантень, сон ашти Советской куросонть, вайгелензэ максомо сакшнось республикань лидерэсь В.Д.Волков. Владимир Дмитриевич шумбракстнесь участковой кочкамонь комиссиянь представительтнень марто. Весе процедуратнень ютавтомадост мейле саизе бюллетененть ды мольсь кабинкантень.

Вайгеленть максомадо мейле Владимир Дмитриевич явсь шка республикань журналисттнэнень. Сон тешкстызе, те чись сонзэ туртов, кода весе лиятнеяк, – важодемань. Видькстась, ёжосонзо редяви талнома, эдь неть кочкамотнень эйстэ ашти республиканть сы шкань уцясказо. Владимир Дмитриевич ёвтызе, Россиянь Конституциянть коряс, эрьва гражданинэнтень, конанень мереви максомс вайгелензэ, эряви топавтомс те праванть.

– Минек туртов питней эрьва вайгелесь, секс мекс сон невти, кинь бу ломантне неевлизь региононь прявтокс, – мерсь В.Д.Волков. – Минек историясь ледсти истямо иеть, зярдо ломантне кочкасть Мордовиянь Прявтонть, зярдо Государственной Собраниянь депутаттнэнень сонзэ ёвтась Россиянь Президентэсь. Минек региононть туртов неть 20 иетне кармасть созиданиянь шкакс. Масторонь Президентэсь кунсолы ломантнень мелест-арсемаст, ды те пек питней. Ней жо, зярдо кочкамонть теить сынсь ломантне, изниця кандидатонть ответственностезэ седеяк касы.

Кочкамонь 569 номер участкась панжозель М.Е.Евсевьев лемсэ МГПИ-нь прявт корпуссонть. Тесэ эсь вайгелензэ максызе Мордовиянь Правительствань Председателесь В.Ф.Сушков. Кочкицятнеде тесэ ламольть, те ёнкссонть эрицятне, студенттнэ, седе покш пельксэсь ютксост – од ломанть. Владимир Сушков тешкстызе, одтнэ – эрицятнень те пельксэсь, конатнень эйстэ ламосо ашти региононть ды масторонть вандынь чист. Мельспаро, од ломантне чарькодить политической те кампаниянть питнейчинзэ ды эрязасто максыть вайгелест.

– Мон максыя эсь вайгелем стабильностенть, виевгавтоманть, ломантнень паро эрямост кисэ. Республикань Прявтокс мон неян се ломаненть, конань улить покш содамочинзэ, конась весе седейсэнзэ сэреди тиринь республиканть ды сонзэ ломантнень кисэ, – мерсь МР-нь Правительствань Председателесь В.Ф.Сушков. – Арсян, ломантне макссызь вайгелест се кандидатонть кисэ, конань содасызь, конанень кемить, кие топавтсынзе сынст пшкадемаст.

* * *

Сентябрянь 10-це чистэ ютавтозь кочкамотнесэ Орданьбуе ёнкссо важодсь 41 кочкамонь участка. Эрьвасонть кемекстазельть кочкамонь комиссият. Жабина велень 12 номер кочкамонь участкань комиссиянтень совасть 5 ломанть, председателень тевенть топавтсь велень ФАП-нь прявтось Л.В.Исайкина. Комиссиянтень истя жо совасть КПРФ партиянь представителесь, культурасо, образованиясо ды лия ёнкссо важодицятне. Кочкамотнень закононь коряс ютавтомаст мельга пштистэ вансть общественной наблюдательтне. Эряви тешкстамс, тей сакшность наблюдательть коммунисттнэнь пельде Чувашия Республикасто. Сынь пштистэ вансть кочкамотнень закононь коряс ютавтомаст мельга, саизь мартост кочкамонь протоколонь копиянть. Сэтьмечинть ванстсть внутренней тевень органонь важодицятне.

Велень эрицятне кочкамонь участкантень кармасть ютамо кавксо чассто саезь. Ломантне ютасть вадря ёжосо. Эрьвась эйстэст бажась максомс эсензэ вайгелензэ, чарькодсть, сынст кочкамост эйстэ ашти се, кода карми эрямо республикась седе тов, кода кармить виевгадомо велетне, паролгадомо тесэнь ломантнень эрямост. Кода тешкстызь Жабина велень кочкамонь комиссиясонть, эсест вайгелест максомо сакшность велень сехте сыре ломантнеяк. Кочкицятнень ютксо истя жо ульнесь содавикс спортсменкась, Жабина велень тейтересь Елена Анюшина.

20 чассто кочкамонь комиссиясь ушодсь бюллетентнень ловомо, конатнень веть уш ускизь райононь куншкакуров. Истя, икелепелень ловоматнень коряс, Жабина велесэ явкась кармась улеме 91,6 процентт. 226 вайгельть (весемезэ спискасонть 263 ломанть) максозь В.Д.Волковонь кандидатуранть кисэ, 15 ломантне кирдизь КПРФ партиянть пельде кандидатонть Д.В.Кузякинэнь.

Кочкамотнень ютавтомань шкастонть коламот эзть редяво.

 

* * *

Саранск ошонь 649 номер кочкамонь участкась ульнесь Коваленконь лемсэ ульцясо 38 номер общеобразовательной школасонть. Тосо кочкицятнеде малав колмо тёжат ломанть (2946), юткстост вайгелень максомо обед малав сакшность кодгемень процентт. Кочкамотнень мельга ваныцятнеде ульнесть 13 ломанть. Ульнесть представительть весе партиятнень пельде. Теде башка, тов сакшность доверенной вейке лиця, колмотне совещательной права мартольть. Коммунистической партиянть пельде вейке сыцясь ульнесь мик Марий Элстэ.

649 номер участковой кочкамонь комиссиянь прявтонть, «ЭМ-Кабель» ООО-нь инновациянь, качествань ды культурань производствань коряс директоронть Ю.В.Ощепковонь пачтямонзо коряс, кочкамотне ютасть сэтьместэ, кочкамонь законодательстванть апак кола. Весе сетнень, кить икелепелев территориальной комиссияс пшкалесть кудов тенст урна марто самодо (истятнэде ульнесть  16 ломанть), мелест топавтозь. Сыненст кудов сакшность аволь ансяк комиссияс совицятне, истя жо эште якасть кавто ваныцят (наблюдательть).

Юрий Владимирович тешкстызе, кочкамотнень сэтьместэ ды видестэ ютавтоманть юрсо ашти территориянь комиссиятнень парсте важодемаст, икелепелев спискатнень ванкшномаст. Эште ламось аштесь агитатортнэнь эйстэ, ков седе ламо сынь вастневсть кочкицятнень марто, пачтясть тенст кочкамотнень смусттест, тов седе покш ульнесь лезэсь.

Те разнэ вайгелень максомо васенцекс састь сеть, кинень те чистэнть эрявсь молемс важодеме. Валост коряс, сынь мелявтсть, а кенерить чокшне топавтомс гражданской долгост. Кочкамонь участкатнес ламот те чистэнть састь эйкакшост, нуцькаст марто. Вишкинетненень максозельть казнеть: ручкат, блокнотт. Территориянь кочкамонь 649 номер комиссияс совицятнень эйстэ седе ламот од ломанть, кинень 35-40 иеть. Весе сынь «Энерго-ЭМ», «Кабель-Оптика-Энерго» ды «Эм-Пласт» предприятиятнень важодицят.

Тешкстасынек, участковой кочкамонь комиссиясь одкстомтозель. Теке составось сы иестэ карми важодеме РФ-нь Президентэнь кочкамонь комиссиянть ютавтомсто. Тень ловозь, сынст лангс путовить покш кемемат.

Кочкицятнень лангс ванозь, кода эрязасто сынь сайсть бюллетентнень ды кеместэ ютасть шаршавтнень потс, неявсь, ломантне кочкамост уш теизь икелепелев. Эдь эрьвась эсь вайгелень максомасонзо теи кочкамо васняяк эсензэ, семиянзо туртов. Кода ломантне макссызь вайгелест, истя кармить эрямо маласо шкастонть.

 

Кочкамотнень мельга

вансть Татьяна Аксенова

ды Валентина Юдина

 

Новости

Турчак заявил о запуске конкурса социальных проектов первичных отделений «Единой России»
В ближайшее время стартует конкурс социальных проектов первичных
отделений «Единой России», лучшие проекты смогут претендовать на
грантовую поддержку Партии. Об этом сообщил секретарь Генсовета Партии
Андрей Турчак, выступая на пленарном заседании форума первичных
отделений «Единой России» в Северо-Кавказском федеральном округе.
Подробнее ...
 
20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...