Рубрикатор

Cобытия недели Депутатось Темниковасоль
Депутатось Темниковасоль

Мордовиянть пельде Государственной Думань депутатось Василий Пискарев важодемань тевень коряс содавтызе Темниковань райононть. Те чистэнть тесэ ульнесь покш мероприятия – путовсь васень кев иневанькс праведной воинэнть, Россиянь флотонь адмиралонть Феодор Ушаковнень теевиця кеврунгонтень.

 

Темниковань райононь прявтось Сергей Кизим парламентариентень ёвтнизе, теевиця монументэнть алов тарканть кочкасть кувать ды весементь арсезь. Райононь архитектурань-экспертэнь советэсь кочкизе ошонь парконть, Культурань куншкакуронть маласо. Самай тесэ, сэтьме ды мазый таркасонть, кеврунгось кармияк аштеме.

Эряви меремс, малав иеде икеле Темникова ёнксонь Ушаковка велесэнть флотоводецэнтень кеврунго уш стявтовсь. Сон ашти се таркасонть, косо зярдо-бути эрясь Федор Ушаков. Од постаментэнь таркась истя жо тешксэв. Ламо иеде икеле тесэ ульнесь Спасо-Преображенской соборось, конасонть 200 иеде икеле служазель воинэнть уловось.

«Темниковань районов мон свал сакшнан покш мельсэ, – тешкстась Василий Пискарев мероприятиянть панжомсто. – Ды монь туртов покш честь улемс истямо мероприятиясо. Феодор Ушаковнень кеврунготне улить Россиянь ламот оштнесэ. Темникованть историязо кеместэ сюлмавозь ине адмиралонть эрямонзо марто, секскак кеврунго сонзэ ледстнемга тезэ эряви стявтомс. Пек паро, те меленть-арсеманть кирдить райононь ды республикань прявттнэ».

Эрицятненень жо Василий Пискарев мерсь, васень кевесь, кона путозь кеврунгонть юрс, кармаволь фундаментэкс Мордовиянь кезэрень ошонть касоманть-вадрялгавтоманть туртов, весе райононть вадря енов полавтоманть туртов.

Торжественной мероприятиядонть мейле депутатось вастневсь райононь эрицятнень марто. Сынь ёвтнесть Василий Пискаревнень талновтыця мелявкстнэде.

Седе сеедьстэ депутаттнэнь марто вастовоматнес ломантне сыть эсь мелявксост марто – вешить лездамс эрямо таркань получамосо, важодемань муемасо... Темникова ёнксонь эрицятне жо пшкадсть лия кевкстема марто, конат талновтыть аволь вейкень-кавтонь, весень.

Темниковань районсонть «Безопасный город» программанть седе куроксто тевс нолдамонзо коряс депутатонтень пшкадсь райононь Вейкине диспетчерской службань  прявтось И.П.

Васин. МР-нь Информатизациянь ды связень министерствась Темникованть совавтызе программань омбоце очередентень, те – 2020-2025 иетне. Депутатонть марто кортамосонть И.П.Васин тешкстызе, районось эрязасто виензы, туристтнэ ламолгадыть, секскак эряви седе куроксто куротнес ды кичиретнес, зыянтомочинть ванстомга, путнемс камерат. Иван Петрович энялдсь лездамс программань шканть 2018-2020 иетнес кандоманть коряс. Василий Пискарев алтась лездамс райононтень те кевкстеманть решамосо.

Ярмактнень а сатомадо, конат явовить школатненень автобустнэнь кирдеманть лангс, парламентариенть марто кортась Темниковань средней общеобразовательной школань прявтось З.И.Хозина. Василий Пискарев явсь мель сенень, пшкадицясь сонсь Мордовиянь Госсобраниянь депутат, бюджетэнь ды лия кевкстематнень ванномасо прими участия. Сон мерсь те кевкстеманть коряс кортамс Госсобраниянь сессиясо. Теке марто тешкстызе, автобустнэнь кирдемась ды мельгаст якамось аволь школатнень тевесь ды те кевкстеманть решама.

Ведень коряс мелявкс марто Василий Пискаревнень пшкадсь Русско-Караевской велень поселениянь прявтось Н.А.Позднякова. Пшкадицясь кортась райононь весе эрицятнень пельде. Тевесь сеньсэ, зярыя тувталонь коряс эрицятне симема веденть кис пандыть предприятиятнень туртов аравтозь тарифтнень коряс, те жо зярыяксть седе ламо эрицятнень туртов кемекстазь тарифенть коряс. Депутатось алтась домкасто ванномс те кевкстеманть ды лездамс эрицятненень.

 

Ю.Еремина

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...