Рубрикатор

Культура «Мон – вармань вийсэ, чипаень лембесэ, мазый моросо кастозь эйде»
«Мон – вармань вийсэ, чипаень лембесэ, мазый моросо кастозь эйде»

Татьяна Ларина… Истямо мазый  ды  гайтев  лем  сатотсь  аволь ансяк  рузонь  ине поэтэнть  А. Пушкинэнь «Евгений Онегин»  романонь  персонажонтень.  Эрзянь   аватнень   ютксояк  сынь  улить.  Вейкесь  эйстэст  эрзянь  содавикс  телерадиожурналистэсь,  кинь репортажонзо, радио  ды   видеосюжетэнзэ  кунсолость  ды  вансть  аволь ансяк  Мордовиясо,  сонзэ томбалеяк:  Башкортостансо,  Татарстансо, весе сеть  регионтнэсэ,  косо  эрить  эрзят  ды   мокшот. 1998  иестэ  саезь  2007 иенть  самс  «Мордовия»  ВГТРК-со  важодемадо  башка  (ветясь  «Сияжар» программанть). Эфирэнь шказо ульнесь «Татарстан» радиосо, сонзэ сюжеттнэнь  нолдтнесть  «Между Волгой и Уралом»  радиожурналсо. Татьяна Ларина ульнесь «Финно-угорский мир» радиожурналонь редакторокс…

 

…Ларинакс сон теевсь мирденень лисемадо мейле. Те ульнесь 1987 иестэ, зярдо Татьяна Шаляева тонавтнеманзо прядомадо мейле Ленинградсто ардсь кудов. Мартонзо сынст велев ардсть студентт стройотрядов. Юткстост вейкесь, Николай, сельмензэ сеске каинзе Танянь лангс. Ды омбоце чистэнть уш тердизе лисемс экшэзэнзэ мирденень. Танянь превсэ сестэ арасельть мирденень лисемадо мельть-арсемат. Кавто иеть цёрась яксесь мельганзо. Окойники солавтызе Танянь седеенть. Налксесть свадьба. Ансяк вейсэ эрямс тенст ялатеке савсь аволь кувать. Мирдензэ казямо обуцясь теизе эсензэ тевенть. Тейтерензэ Олесянь чачтомадо мейле Танянень савсь салава оргодемс ансяк стявтозь од кудостонть ды велявтомс аванстэнь-тетянстэнь.
…Шаляевтнень родост-племаст Ицялбуень Селища велесэ пек содавикс. Нейгак улить ломанть, кить ламо-мезе ёвтнить покштянзо Семён Фроловичень семиядонть. Вете лелят-ялакст ды весе паро киява тукшность. Вейкесь Борис Фролович – колхозонь прявтокс ульнесь. Омбоцесь, Иван Фролович, войнань шкасто полковникекс кудов велявтсь. Покштязо эсь олясо истя жо тукшнось ятонть каршо тюреме. Седе мейле сонзэ эзизь нее. Пачтякшность сермине: келя, ёмась кулявтомо.
Тетязо, Иван Семёнович, эзь понгоне войнас, куш мелезэ покшоль. Тень таркас ламо мезе савсь печтямс тензэ тылсэ. Велесэ сестэ мезеяк арасель. Од ломантне тукшность фронтов, техникань таркас вейке-кавто алашат ды весе. Ярсамс ломантненень а мезель. Вачодо аштезь, кодат эйстэст роботыцят? Иван Семеновичень путызь бригадирэкс, макссть тензэ алаша. Валске рана ютыль кудодо кудос, пурнылинзе лавшомозь ломантнень, озавтнилинзе крандазс ды – паксяв, сюронь нуеме. Чокшне ланга кудоваяк истя усксилинзе. Пек мелявтсь ломантнень кисэ. Истямо мелявтоманть кувалма савсь аштемс тензэ тюрьмасояк. Те ульнесь уш войнадо мейле. Сестэяк ломантне паро ладсо эзть стякшно пильге лангс. Ламот виде паро вачодо аштесть. Вейке истямо семиянть жализе, мерсь ускомс тенст кескав суро ямкст. Сеске муевсь «паронь арсиця» шабра, яволявтсь «ков эряви». Иван Семенович весе чумонть саизе эсензэ лангс. Ды… кемень иес – тов, «верьгизэнь андомо». Паро, кажось лиссь ведьгемень иетнестэ. Ушодовсь 1953 иесь, чумовтомо ламо лия пекстазтнень марто нолдызь кудов сонзэяк.
– Паряк, теде а эряви сёрмадомс? – кавтолдозь мерсь Татьяна Ивановна телефононь пачк кортамсто. – Пек уш ризнэсь тетям тень кувалма. Седеяк пек – авам.
Истямо тевде ледстнемс, нама, а шожда. Ансяк тетязо аволь ськамонзоль, кинь лангс се шкане каякшность чопода сулей. Виздемс тень кувалма а мезекс. Меремс, Татьяна, кода лия эйкакштнеяк (сындест сисем, сон ветецесь), тетяст кувалма свал аштесть покш мельспаросо. Иван Семёнович ламонь содыцяль. Вечкиль книгань ловномо. Секс, паряк, кельвалозояк пек сюпаволь. Теде башка пек парсте морыль. Кудосост мезеяк эзь ютне моровтомо. Велесэ пурнакшнось морыцянь куро. Келя, те ансамблядонть паро кулясь сралесь пек васолга ды пелькстамосо-косо сайнесь васенце таркат. Велесэст, кортыть, нейгак морсить тетянзо моротнень. Тетякс, морыцянь вечкицякс, тусть весе эйкакштне. Сехте покшось, Валя, морсесь натой «Келу» ансамблясо, зярдо сонзэ прявтсоль Г.И. Сураев-Королев.
– Моронь вечкемась тетянень сась аванзо, Анна Павловнань пельде. Сырькаем сказительницаль, пек парсте лайшиль. Сонзэ вайгельсэ лайшематнень сёрмалеме сакшнось сонсь Гавриил Вдовин, – ёвтни Татьяна Ивановна. – Монень сестэ сисемшка иеть ульнесть. Неть лайшематне путозь нота лангс…
…Ансяк лембе валсо Татьяна Ивановна ледстни авадонзояк. Мария Васильевнань (тейтерькс Ведяшкина) лангс пракшность а седе аламо мелявкст ды стакачить. Се шкань од тейтертнень марто яксесь «болотав», косо торфонь таргамстояк, мейле колхозсо важодемстэяк свал васенцетнень ютксоль. Эсензэ эйкакштненьгак кастась тевень вечкицякс. Эрьва валске марто паксяв-ков туемстэ эрьвантень максыль тев: «Тонеть течи кияксонть шлямс, тонеть – тувонть андомс, тыненк кавоненк – эмежтнень валномс…». Мезенть кис Татьяна Ивановна те шкас ёвты сюкпря аванстэнь, те – Мария Васильевна зярдояк вестькак аволь ансяк эзизе вачкоде эйстэст киньгак, зярдояк эзь пижне лангозост ды эзь мурнеяк. Мезе тосо а истя, сон васня чатьмонезь кунсолылинзе, мейле озыль ды кортниль эрьванть марто башка.
Теке марто авазо мездеяк а пелицяль. Зыянонь лисемстэ зярдояк а оргодиль. Мекевланк, чииль зыянс понгозенть идеме. Весть чадыведьстэ таргась ваиця ломань. Эзь тандадо сестэяк, зярдо шабра кудосо улемстэ кудазораванть цёразо ялга юткс лисемадо икеле пурксинзе черензэ одеколонсо, сонсь стясь потопка икелев сынст костямо. Чертне кирвазсть. Паро, авазо чарькодсь ды кенерсь лангозонзо каямс ватола. Лиякс цёрась аволь идеве.
– Тетянь-авань коряс мон уцяскаван. Мон – вармань вийсэ, чипаень лембесэ, мазый моросо кастозь эйде. Видькстан, монь санга чуди грекень раськень верь. Тетянь покштязо Фрол атя русско-турецкой войнасоль. Тосто велявтсь козейка марто. Се ульнесь грекень ава. Черензэ раужольть. Истямо тюсонь черест патянь-ялаксоньгак. Монь – ашот. Авакс туинь, – пейдезь мерсь Татьяна Ивановна ды кармась ёвтнеме аванзо ёндо родонь ломантнеде.
Покштязо, Василий Матвеевич, колмо войнасоль. Сон пек виевель. Маштсь тюреме. Седикеле кодамояк покшчистэ – Троицясто, Мастясто – велень цёратне яксильть Сакулька ёно пандо пряв виест варчнеме. Стильть карадо-каршо ды адя вейке-вейкень мокшнасо «зэрькаеме».
Аванзо лелязо, Дмитрий Васильевич Ведяшкин, войнасо разведчикель. 1944 иестэ ранязель. Операциянть савсь тензэ теемс тюреманть молема таркасо. Ёмавтсь пек ламо верь. Кудов сась кедтеме.
Весе сень эйстэ, кода парсте ды весемеде содазь, Татьяна Ивановна ёвтни, чарькодят, кодамо покш мель яви эсензэ родонь-племань ломантненень. Тень эйстэ неявить обуцянь истят ёнкстнэяк, конат ладить алкуксонь журналистэнтень: ламонь содамо бажамось, эрямонь койтнень чарькодемась, ломантнень уцяскадост мелявтомась. Те лездаськак мейле кочкамс журналистэнь тевенть. Школасо тонавтнемстэ, виде, сон седе пек вечкилинзе математикань уроктнень. Теке марто тейтеренть превсэ свал аштесь литературась. Книгатнень сон аволь ловнось – нильнезь нильнесь.
Истя Таня Шаляева 1980 иестэ понгсь Мордовской госуниверситетэнь филологической факультетэв, косо се шкастонть панжозель журналистикань кафедра. Колмоце курсонть прядомадо мейле Мордовской обкомонть мереманзо коряс кучизь А.А. Жданов лемсэ Ленинградской государственной университетэв, косо поладызе тонавтнеманзо журналистикань факультетсэ. Студентэкс улемстэ тонавтнемадо башка топавтсь ламо лия тевть: кочксизь комиссарокс, «Радуга» студентэнь отрядонь командирэкс. Тонадсь кудонь стявтомсто кирьпецень вачкамо, бетонсо кинь валомо. Ленинградсо якась лездамо эйдень кужов. Теке марто эзь стувтне сёрмадома тевенть. Материалонзо лиснесть «Мордовский университет», «Ленинградская правда», «Знамя юности» (Минск), «Советская Мордовия», «Эрзянь правда» газетатнесэ.
Мордовияв велявтсь 1987 иестэ ды сеске сась «Путь Ильича» Ицялонь райгазетав. Тесэ эрямонь кинзэ-янонзо ветнесть эйсэнзэ мекев-васов. Васня пачтизь Ельникень райононь Надеждина велев, косо кармась тонавтомо эйкакшт. 1991 иестэ мекев велявтсть Ицялонь районов. Инелей велесэ, ков савкшнось эрьва чистэ яксемс малав 8 вайгельпеть васня тов, зняро жо – мекев, ветясь рузонь, эрзянь келень ды историянь урокт. Иень ютазь сась эрямо Инсаров. 1993 иестэ саезь 1995 иенть самс важодсь ПТУ-со.
Саранскоев эрямо сась 1998 иестэ ды сеске сиведизе прянзо «Мордовия» ВГТРК-в корреспондентэкс. Анокстась ды ветясь «Сияжар» программанть 2007 иенть самс. Секе жо иестэнть кармась улеме продюсерэкс ды редакторокс «Од пинге» национальной программасо.
Истя лиссь, сонензэ савсь кадомс вечкевикс тевенть. Тень лангс апак вано, Т.И.Ларина эзинзе сезе сюлмавкстнэнь национальной журналистиканть марто. Весе се, мезе сон кенерсь тееме тележурналистэкс улемстэ, аволь ансяк эзизе ёмавто питнензэ, совась культурань ды историянь сырнень паргос. Шкань ютазь, вансынк-ва, сонзэ репортажтнень, видео ды радиосюжеттнэнь коряс кармить ванкшномо ды онкстнеме сень, кода ладязель минек раськенть эрямозо 20 пингенть прядовомсто ды 21 пингенть ушодовомсто. Берянь се, зярс тень ламот а чарькодить. Секс а капшитькак венстямс тензэ лезксэнь кедь. Сестэяк, зярдо Татьяна Ивановна пшкалесь энялдома марто панжомс минек раськень культурань сюпавчитнень ванстомань фонд, сестэяк, зярдо Саранскоев велявтомадо мейле вешнесь эстензэ важодема тарка. Эрьва косо вастасть эйсэнзэ некеть валтнэсэ: «Эсенектненьгак а ков теемс». Куш содась: ков пшкалесь, тосо эрявить журналистэнь тевсэ чарькодиця ломанть. Ансяк таго-мекс кирдить неть таркатнень чавокс. Эли, паряк, пелить саемс виев ды ламонь содыця журналист, кода минек эрси сеедьстэ. Кода илязо уле, Татьяна Ивановнанень косояк эзь муеве тарка. Сон ашти кудосо, котьми-ози нуцьканзо марто. Сынст сонзэ кавто. Лизанень 5 иеть, Матвейнень – кавто. Одс ванкшны эсензэ репортажтнень ды яжи пря, кода сынст ванстомс ды кадомс сы шкань эрицятнень туртов.
Ацамковонь (декабрянь) 7 чистэ Татьяна Ларина тешксты чачома чинзэ. Ёвтатано тензэ пси поздоровт. Арсетяно кеме шумбрачи, шожда уцяска, кувака ды сюпав эрямо. Кадык весе арсеманзо ды бажамонзо топавтовить, эрямось кази тензэ седе ламо маней ды кенярксов чить!

Раиса Щанкина,
Россиянь Журналистэнь союзонь член


05.12.2018

 

Новости

«Единая Россия» запускает всероссийский контроль за реализацией нацпроектов

«Единая Россия» запускает всероссийский партийный контроль за реализацией национальных проектов. К нему будет подключен депутатский корпус Партии в регионах и муниципалитетах. Об этом в рамках заседания Президиума Генерального совета «Единой России» заявил секретарь Генсовета Андрей Турчак.

«Это позволит отслеживать, как на местах выполняются национальные проекты – строятся, реконструируются объекты, проводятся запланированные мероприятия», - сказал Турчак.

Подробнее ...
 
Комиссия «Единой России» по этике провела первое заседание
 Первое заседание утвержденной XVIII Съездом «Единой России» Комиссии
по   этике   прошло   16   января.   В   его   рамках   были   избраны   председатель
Комиссии, его заместитель и ответственный секретарь.
Подробнее ...
 
Россиянь Почтань 200 клиентт теевсть миллионерэкс

Государственной лотереянь статистиканть коряс, 2018 иестэ Россиянь Почтань отделенияс якицятне рамасть 68 миллиондо ламо лотерейной билетт. Вейке миллиондо ламо целковойть налксесть 206 ломанть. Те 2,4-ксть седе ламо икельце иенть коряс, сестэ миллионертнэде ульнесть 88 ломанть.

Подробнее ...
 
Управление Министерства юстиции Российской Федерации по Республике Мордовия напоминает порядок и сроки предоставления ежегодной отчетности некоммерческими организациями.

Законодательством Российской Федерации определена обязанность некоммерческих организаций ежегодно отчитываться перед уполномоченным органом. В частности, статьей 32 Федерального закона «О некоммерческих организациях», статьей 29 Федерального закона «Об общественных объединениях», статьей 25.1 Федерального закона «О свободе совести и о религиозных объединениях».

Подробнее ...
 
Крештениянтень анокстамот

Крештениянтень Саранскойсэ арсеви теемс экшелямонь туртов 11 тарка: «Старт» стадиононь эрькесэнть (2 таркат), Гончаровонь куросо, «Вирень эрьке», «Зелёная роща» эрькетнесэ, «Огни Саранска» кафенть маласо, Макаровкасо (Иоанн Богословской цёрань монастыренть вакссо), Куликовкасо Чапаевень куросо лисьмапрясонть, Полянки велень Юбилейной куросо аштиця лисьмапрясонть, Добровольной посёлкань Дачная куросонть, Иоанн Кронштадтскоень храмонь лисьмапрясонть ды Грузинской куросо аштиця эйкакшонь парконь эрькесэнть.

Подробнее ...