Рубрикатор

Культура Андрейвеле. Кезэрень шкадо евтнемат
Андрейвеле. Кезэрень шкадо евтнемат

Неть читнестэ минь вастневинек журналистэнть ды сёрмадеенть Тамара Сергеевна Баргова марто. 

– Тамара Сергеевна, седейшкавань поздоровт тенк од книганк лисеманть кувалма.

– Сюкпря! Ансяк те книгась аволь монь, сонзэ сёрмадызе лия ломань – Василий Иванович Самсонов. Мон те книганть ансяк анокстыя-пурныя. Сёрмадыцязо кулось 30 иеде теде икеле, а вана весе конёвонзо тейтерезэ максынзе монень. Се шкава эштё важодинь «Эрзянь правдасо». Минь Василий Иванович марто секе-тев сёрмалинек вейке-вейкенек туртов сёрмат, монь энялдомам коряс сон кучнесь «Эрзянь правдав» корреспонденцият, статьят. Сынь лиснильть газетасо. 

 

Теньгак ёвтаса: бути а пурнавлия-теевлия те книганть – истямо книгась зярдояк а лисевель. Ней кенярксом покштояк покш. Васняяк, книгась ёвтни тиринь веледень, сонзэ кезэрень шкадонть. Омбоцекс, топавтыя Василий Ивановичень покш бажамонзо – нолдамс истямо книга.
– Кие те ломанесь, Самсонов Василий Иванович?
– Те ломанесь минек Андрейвелестэ. Чачсь сон, ловт, XX пингенть ушодовомсто, 1903 иестэ. Эйкакш шкава уш превеель, тонавтнесь церковно-приходской школасо. Кода карминь сондензэ содамо? – Тевесь сеньсэ, сон минек роднянь-раськень, монь тетянь двоюродной братозо. Василий Ивановичень авазо ды монь покштям – лелят-сазорт. Вишкинестэ уш содылинь: Московсо эрить минек малавикс роднянок. Васня фотографиятнень коряс, конатнень кой-зярдо тенек кучнилизь сёрмасо Московонь малавикстнэ, мейле сынськак сакшность. Те ульнесь 1967 иестэ. Монень се шкава ульнесть весемезэ 12 иеть. Ды вана се шкастонть саезь карминь пек парсте содамо, кить неть минек инженек – Московсо эриця Андрейвелень ломантне. Василий Иванович сась Московсто Алексей Иванович Самсонов ялаксонзо марто, кона истя жо ускизе мартонзо 12 иесэ Витя цёрынензэ. Теке шкасто Андрейвелев састь Василий Ивановичень эйкакшпорань ялганзояк: Никита Фёдорович Кутуров – Туласто ды Яков Иванович Кузнецов – Челябинскойстэ. Эрьвась эйстэст пачкодсь эрямо килангсост покш тёкшс. Василий Иванович войнань иетнестэ уш важодсь СССР-нь Внешней торговлянь министерствасо, войнадо мейле – РСФСР-нь Госплансо. Никита Фёдорович цехень прявтоль Тулань оборонной заводсо, Яков Иванович важодсь Челябинской тракторной заводонь главной инженерэкс. Ялгатне 1923 иестэ кадызь тиринь велест, бажасть тонавтнеме ды улемс лезэвекс тиринь масторонть туртов. Пачкодсть Московов, Василий Иванович прядызе Московонь университетэнь историянь факультетэнть, мейле тонавтнесь экономистэкс. 1930-це иетнестэ сон важодсь Мордовиясо, якась велетнева, пурнась краеведениянь музеев эрзянь раськень экспонатт, сёрмалесь, кода моли велетнева коллективизациясь. Неть сонзэ тетрадтне те шкас эште апак тонавтне, тонавтнемскак уш а шожда. Сёрмадозь карандашсо, таркань-таркань уш конёвтне оласть, мезеяк а ловнови.
Ды вана 1967 иестэ Андрейвелев вейсэнь самось ульнесь неть шержей пря ломантнень туртов покш ледстнемакс икелень шкатнеде. Сынь сестэ ютызь весе таркатнень, кува чийнесть-кассть. Мартост вейсэ яказь, миньгак, эйкакштне, седе парсте карминек содамо тиринь веленек, перьканзо таркатнень. Дубкав, Пиянав, Миловкав, Оржаньбиёв… – эрьва ков якинек мартост. Ютынек Андрейвелень весе ульцятнень, инжетне секе-тев лотксекшнесть, ледстнесть, кие эрясь те таркасонть, кие тосо…
Меельцеде Самсоновтне сакшность Мордовияв 1988 иестэ. Арсесть самс эштё, ансяк эзть саво. 1988 иень сёксня Василий Иванович тусь эрямосто. Тейтерезэ сёрмадсь тень сёрма: келя, бути ули мелеть саемс тетянь конёвонзо – сак, саить. Истя монь кедьс понгсть Андрейвеледе кезэрень ёвтнематне, конатнень ладсесь-тешкстнесь Василий Иванович.
Неть ульнесть тюжалгадозь конёвт. Эрявсь эрьва лопанть тонавтнемс, чарькодемс, мезде тосо сёрмадозь, арсевтемс, ков сонзэ путомс. Текень пес, весе конёвтне сёрмадозельть пек вишкине буквинесэ, эйсэст ламо черьксневкст трокс ды кувалт, эрьва ёндо поладкст – секе-тев эрявсь сайнемс кедьс лупа. Истя вана малав ие ладсинь-ловнынь ды теинь те книганть.
Видькстан, Андрейвеледе неть сёрмадовкстнэс кундынь а пек умок, сынь яла учость эсь шкаст. Пшкадсть тень Андрейвелень од ломанть, конат эрить-важодить ней Московсо. Кевкстимизь: сёрмадозь-арась мезеяк Андрейвелень кезэрень шкатнеде. Мон уш кундакшнынь те книганть лангсо важодеме, книгась уш, ловт, пурназель. Лиссь чудань тев: книгась анокстазель самай те шкантень, зярдо эртевсть монь эйс лездыцятне.
Сень лангс апак вано, кода а шождаль сравтнемс-тонавтнемс весе сёрмадовкстнэнь, молинь Василий Ивановичень киява, теке алкуксонь вешниця. Истя талновтсть весе сёрмадовкстнэ! Ды кодамо кеняркс ульнесь, зярдо муилия кодамояк историянть поладксонзо, пензэ! Сельмень икеле стиль седикелень, умонь Андрейвелесь, ютазь пингень ушодовома шкань ломантне стильть икелень овсе живстэ, сынсест кортавксост, арсемаст, мелявксост марто. Мон вастовинь минек веленть историянзо марто аволь превстэ саезь – алкукс эриця ломантнень уцяскаст трокс! Те ульнесь панжовкс кезэрень шкатнес, редявсть сюлмавкстнэ, конат пачтить неень шкатнес. Тосо весе истя, кода ульнесь алкукс!
В.И.Самсоновонь ёвтнематнесэ содавильть минек таркатне, кудотне, кудолемтне, травамкатне. Пек ризнэвтсь покштояк покш нужачись, натой лиясто чачиль снартовкс венстемс течинь эрямостон тов – седикелень шкатнес, куш кшикочом, куш мезеяк тантей – истя весемесь маласоль ды истя васололь.
Ды эште вейке мель-арсема эзь кадно весе неть лопатнень ловномсто-тонавтнемстэ. Минек бажить кармавтомо арсеме, кодамо пароль эрямось инязоронть шкава. Вана сон кодамо паро – ловнодо, ванодо, тесэ весе ёвтнезь, сёрмадозь! Аволь лия кодамояк книгасто, аволь киносто – минсенек велень ломаненть ёвтнематнестэ Андрейвеленть эрямодо неяви, кодамоль эрямось 1914, 1917, 1942 иетнестэ… Вана сон кодамо те алкуксчись! Ловнок – ды кармат содамонзо.
Мон те книганть теемстэ седеяк пек маринь лия-лия пингень ломантнень ютксо аколавикс сюлмавкстнэнь. Секс те книганть вельде бажиньгак пачтямс неень шкань Андрейвелень ломантненень ды сы шкань ломантненень кезэрень шкадонть, кодамо сон ульнесь Андрейвелесэ. Эдь минь поладтано сетнень эрямост-тевест, кить ульнесть минденек икеле, пачтятано весе минекенть сы шкатненень. Кеман, Андрейвелесь а ёми. Кодат стакат шкат сон печтясь – ды ванстовсь! Андрейвелесь – минек лавсенек! Кода ведьбайгинесэнть несак менеленть, истя Андрейвелеськак невти весе сень, мезе тееви-моли модамасторонть лангсо. Мон кеман: велесэнек кармить эште чачомо превей, паро ломанть. Минек васень тевенек – ванстомс веленек, ванстомс сонзэ эйсэ эрямонть!
В.Юдина


09.10.2018

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...