Рубрикатор

Культура ЭРЗЯНЬ КАРТЬ Истямо мазый лем ало ютась фестиваль Покш Березникбуень Кузым велесэ
ЭРЗЯНЬ КАРТЬ Истямо мазый лем ало ютась фестиваль Покш Березникбуень Кузым велесэ

«Эх, карть, эрзянь карть, семеричка карть!» – морсесь эсь шкасто эрзянь раськень моронть содавикс сказительницась Серафима Марковна Люлякина. Сонзэ морамсто эрзянь авась свал кедьсэнзэ кирдтнесь семеричкань картнень. Гайтев морось кепсесь весень мелест-ёжост. А стяко седе сеедьстэ энялдсть сонзэ морамс одс ды одс. Морыцясь покш мельсэ топавтсь энялдоматнень. Эрьва концертэсь ламонь туртов теевкшнесь оймень покш чикс.

А стяко эрзянь картнеде минек покштятне арсесть морот. Сынст лезэвчидест, эрявиксчидест ёвтневи кезэрень ёвтамотнесэ, ёвкстнэсэ. Сынтемест таго-зярдо ломантне, аволь ансяк эрзятне, эзть нее эсь эрямост. Карьсэ якасть иень эрьва шкасто. Сынь ванстсть пильгетнень якшамодояк, летькедеяк. Теде а весть ледстязель «Шумбрат» республиканской национально-фольклорной праздникень «Эрзянь карть» фестивальсэнть, кона ютась таштамковонь 29-це чистэ Покш Березникбуень Кузым ды Дегилевка велетнень ютксо вирь чиресэ аштиця лушмосонть. Те таркась мазыйдеяк мазый. Тесэ стявтозь часовня, чувозь лисьма, теезь экшелямо тарка. Аштияк Кузым велев ветиця кинть эйстэ а васоло.
Таштамковонть прядовомсто, окойники, тусть кувать учонь пиземеть, экшелгадсь. Фестивалень анокстыцятне седейризкс марто учость: карми а карми пиземе цётазь чистэнть! Кода эно? Зяро вийть путозь сонзэ анокстамонтень?! Нать, уш маринзе талномаст-энялдомаст Инешки пазось. Валскестэ саезь ушодсь манейгадомо. Пельтнень ютксто прянзо невтизе чипаесь. Кенярдозевсть весе: кить пурнасть-сэрнясть покш чив, сехте пек – сонзэ анокстыцятне...
Обед малав фестивалень ютавтома таркантень пурнавсть ламо инжеть – Саранскойстэ, райцентрасто, шабра велестэ. Гайгезевсть эрзянь, рузонь морот, панжовсть зярыя выставкат-невтемкат, конатнень ютксто явовсть «Эрзянь каренсесь», «Чувтосто керсевкстнэ», «Декоративно-прикладноесь». Васня часовнянть вакссо ютавтовсь ознома кой. Мейле панжовсь сонсь фестивалеськак.
Пурнавозтненень седейшкавань паро валт ёвтасть ды казнеть макссть Покш Березникень буень Администрациянь прявтось И.И.Игонов, Мордовия Республикань культурань, национальной политикань, туризмань ды архивной тевень коряс министрань васень полавтыцясь А.И.Карьгин, Эрзянь-мокшонь раськень регионъютконь вейсэндявксонь исполкомонь прявтось А.С.Лузгин, Кузым велень администрациянь прявтось Т.Н.Селякина ды лият.
Пурнавозтне покш мельсэ кунсолызь эсь велень эрицянть, войнань ды трудонь ветеранонть Н.Г.Никитинэнь. Видьстэ меремс, бути а сон, паряк, «Эрзянь карть» покш чиськак Кузымсэ аволь юта. Те сонзэ картнень вельде, васняяк, Кузым веледенть кармасть содамо Мордовиясо, васоло сонзэ томбалеяк. Николай Григорьевич эйкакшпингстэ саезь тонадсь карень кодамо. Вечкевикс тевензэ зярдок эзизе кадно. Кодат карть ансяк эзь кода! Эрьва чинь якамонь, праздникень, покшонь, вишкинень туртов. Кудозо пешксе эрьва кодамо карде. Карензэ ванстовить республикань зярыя музейсэ. Сонсь Николай Григорьевич масторъютконь, весе Россиянь, республикань ламо выставкань дипломант. Карензэ казнесь содавикс ломаннень, конатнень ютксо ине спортсмент, артистт, учёнойть, общественной деятельть.
Покш чинь инжетнень икеле кортамсто Николай Григорьевич неявиксстэ талнось, но ялатеке кортась кеместэ. Марят, сон уцяскав ломань секс, мекс карень кодамонтень вечкемась теевсь тензэ эрямонь смустекс. Текень пес – Николай Григорьевичень ламо тонавтницянзо, конат свал ёвтнить тензэ сюкпря. Тень кувалмаяк кеняркшны ветеранось. Теде сон мельспаросо кортась фестивалев сыцятненень.
Пурнавозтненень паронь арсемань ёвтамодо мейле фестивалесь поладызе важодеманзо. Ушодовсь покш чинь концертэсь. Кинь ульнесь мелезэ, варчнесь виензэ «Тюштянь налксемасо», «Карьсэ киштемасо», лият пелькстасть «Содыкайка» карде викторинасонть. Эйкакштнень туртов ульнесть башка налксемат. Неть – «Карьсэ чийнемат», «Карьсэ модамарень кандомка», «Карень наряжамка», «Карень правтома».
Ульнесть ютавтозь зярыя конкурсткак. Неть – «Сехте вадря велень кудоютко-кардаз», «Сехте вадря кудазорава», «Тантей пряка». Изницятне казевсть Кузым велень администрациянь Шнамо конёвсо.
Весень мельс тусь концертэсь, конань невтизь зярыя райононь художественной самодеятельностень артисттнэ. Виев цяпамосо вастозельть «Веселуха» (Покш Березник), «Парынза» (Паракина), «Эрзяночка» (Чугырвеле), «Валскень зоря» (Отяжвеле), «Раздолье» (Чаунза), «Морденс» (Саранск ош) ансамблятнень, башка морыцятнень гайтев морост.
Седе тов инжетнень покш мельсэ андызь-симдизь сывель ямдо, кашадо, прякадо, каштомсо калязь алдо, лезэв тикшестэ лакавтозь чайде, ламо лия тантей ярсамопельде ды симемапельде.
Фестивалесь прядовсь покш чинь этнодискотекасо.


Н. ИШУТКИН.
Фотосонть: «Эрзянь карть» фестивалень шкасто.
Фототне авторонть


09.10.2018

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...