Рубрикатор

Культура Эстониянь эрзя-мокшонь вейсэндявкстнэ парсте невтить пряст
Эстониянь эрзя-мокшонь вейсэндявкстнэ парсте невтить пряст

Аволь умок Эстониянь Таллин ошсо ютасть кенярксчить, конат алтавсть Эстониясо эриця раськетнень Ассоциациянть 30 иетненень. Мольсь покш Этноярмунка ды раськетнень Форум. Тедеде Эстониянтень топодсть 100 иеть, секскак иень перть тесэ ютыть культуранть марто сюлмавозь эрьва кодат кенярксчить. Минек республикастояк тов тердевсть инжеть. Те – «Эрьмезь» чувтосто керсиця вейсэндявксонь прявтось П.В.Рябов, Саранскоень 4№ эйкакшонь художественной школань тонавтыцясь А.В.Рябов, «Мерема» фольклорной студиянь прявтось Е.Модина ды сонзэ «Вирявакай» студентэнь морамонь коллективесь. Кода ютась кенярксчись, миненек ёвтни чувтосто керсицясь П.В.Рябов: 

 

– Кода содатано, Эстониясо важодить эрзянь ды мокшонь кавто вейсэндявкст. Вейкесь эйстэст – эстононь-эрзя-мокшонь вейсэндявксось, конань прявтсо Наталья Константинова, тердимизь те покшчинтень. Ледстяса, Наталья чачомань коряс Орданьбуе ёнксонь Лувне велестэ.
Эстониясо эриця раськетнень Ассоциациясь арсесь сюпав программа, кона мольсь колмо чинь перть. Минь якинек невтеме эсенек керсевксэнек. Ютавтынек чувтосто керсемань коряс мастер-класст. Весемесь ютась Таллин ошсо, таркась пек паро, сыре ошонть Ратушной площадьсэ.
Васенце чистэнть минек ульнесь вастома «Финно-угрия» вейсэндявкссо. Кругловой столь экшс пурнавкшность обществантень совицятне, эстэнь ломантне, «Вирявакай» ансамблясь невтсь аволь покш концерт, минь пурнынек выставка. Тешкстаса, Екатерина Модина – пек виев кода морыця ды тонавтыця. Кадык ансамблясонзо рузонь тейтерть, но сынь истя морыть! Парсте чарькодьсызь морамо коенть. Содыть, кода ветямс пряст. Оршнить кезэрень оршамосо. Тосо кевкстнесть минек раськень оршамопельтнень коряс: кодамо иень, тейтерень эли авань, мокшонь эли эрзянь. Ламотне кой-мезе содыть тень эйстэ. Нама, неень шкане кармасть човорямо оршамотнень, те ацирьгавты, сынь стувтовить.
Омбоце чистэнть ютась покш Этноярмунка, мастер-класст Эстононь панжадо менель ало музейсэнть ды Эстононь Фольклоронь Советсэнть. Эстониясо эриця раськетнень вейсэндявкстнэ, кода минек Наталья, тердсть инжеть эсь тиринь ёнкссто: морыцят, киштицят, артыцят, кедьчелькев ломанть. Чинь перть ульнесть ламо ломанть, апак капша якасть, кортасть, ванность, рамсесть, кевкстнесть. Мельспароль неемс, семиятнесэ трить ламо эйкакшт. Невтинек, кода тееви тутушкинесь, алашинесь. Ратушной площадьсэ покш сцена лангсо мольсь мазый концерт. Кодамо раськень илязо уле ломанесь сцена лангсо – весень вастыть лембестэ. Сонсь ветямось шождыне, оля, мазый. Весень сельмест палыть. Эстониясо савкшнось улемс аволь весть, секскак мельспароль неемс ялгатнень ды содавикстнэнь.
Мейле ютась вейсэнь Форум, косо тешкстызь Ассоциациянть 30 иетнень. Сынь свал покшчитнесэ кортыть эстононь кельсэ, мейле – рузонь кельсэ. Промкссонть тешкстызь, кодамо раськень ломантне ламо лездасть. Обществатнень, конат тов совить, улить эсест программаст. Сынст ванкшныть, кие седе ламо теи, сенень лездыть. Минек кавто вейсэндявкст: эстононь-эрзя-мокшонь ды «Сятко» культурань курось. Сынь овсе эзть ёма эстононь эрямо лувсонть, парсте невтить пряст, теить паро программат, ютавтыть эрьва кодат вастовомат. Тосо улить виев ломанть. Тесэ башка валт ёвтавлинь Николай Степанович Баюшкиндэ. Сон свал ульнесь эрзя-мокшонь вейсэндявкссо. Ульнесь сеть шкатнестэ саезь, зярдо кармасть пурнавомо-теевеме Эстониясо эриця раськетнень обществатне. Паро мельсэ моры «Вастома» ансамблясонть. Те ломанесь весе пингензэ путызе эрзянь ды эстононь келень тонавтомантень. Сон – Эстониясо эрзянь келень тонавтомасо патриарх. Ламо студентэнзэ, нейгак тердтнить лекция марто, весе мерить: лекциянзо шождынеть ды мельстуицят, превейть ды домкат. Курок Николай Степановичнень топодить 70 иеть. Арсетяно тензэ кеме шумбрачи ды кувака эрямо!
Сы иестэ Мордовиясо карми Раськень озкс. Теде истя жо кортынек. Кадык эрзятне эрить республикань томбале, весе содыть Раськень озкстонть, кевкстнить, зярдо карми ды кода тов понгомс. Монь кецявтымим ды дивавтымим, лия раськень ломантнеяк бажить самс. Раськень озксов пурныть самс кавто группат.
– Пётр Владимирович, неень шкане этнотуризмась теи келей эскелькст.
– Мон сентябрясто якинь Удмуртияв, тосо ютась этнотуризмань коряс семинар. Пек лезэв те семинарось, мольсь кавто чить, тердезель «Финляндия-Россия» вейсэндявксось. Сакшность превей ломанть, конат умок важодить те тевсэнть. Невтсть проектт, конат аволь кармить, конат уш важодить. Тосо весе од ломанть, иест 30-40, тиринь келест содасызь. Кортасть эйкакшонь, келень содамонь, калонь кундамонь туризмадо. Улить ломанть, конат бажить ардомс велев ды эрямс кудова ломань кедьга, важодемс эрьва чинь тевсэ, лездамс паксясо-пиресэ. Тень кисэ сынь эштё максыть ярмакт! Финнтнэнь ды эстонтнэнь ули покш мелень явомаст Россиясо эриця финнэнь-угрань раськетненень. Сынь ардыть Удмуртияв, Марий Элэв, вана кизнаяк сакшность Мордовияв финнт. Ды пек тусь мелезэст. Ней парсте юты финнэнь-угрань туризмась, ламо проектт тень перька сюлмазь, вадря ули, бути те поладови ды седеяк виевгады.


Т.Маторкина


09.10.2018

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...