Рубрикатор

Культура Од иень кенярксчитне минек велетнесэ...
Од иень кенярксчитне минек велетнесэ...

Ташто Чамзасо

Эзть марявояк, кода ютасть Од 2018 иень кенярксчитне. Теке вейке чи ливтясть оймсема читне ды тусть историяс. Ансяк кой-кинь туртов неть кенярксчитне ульнесть аволь шождакс, васняяк, Культурань кудотнесэ важодицятненень. Покш Игнатбуень Ташто Чамзань велень Культурань кудонь роботниктне анокстакшность алкуксонь евксонь представленият. Те велень клубось а менстни вейкеяк покш кенярксчи, ды сонзэ важодицятне путыть весе оймест, штобу кенярксчитне ДК-сонть вечкевельть весенень.

2017 иень декабрянь 22-це чистэ тесэ стявтозель вирень мазыйкась ­– кузнэсь ды ушодовсть Од иень мероприятиятне. Пиже кузонть, кода свал, ускизь маласо вирьстэнть ды мазылгавтызь эрьва кодамо тюсонь налкшкесэ ды гирляндасо. Представлениясь мольсь ушосо, кузонть ало. Актертнэ весе эсест велень, ансяк мейсэяк эзть явово алкуксонь артисттнэнь эйстэ. Кода Од иестэ Якшаматявтомо (сонзэ роленть налксесь велень эрицясь Миша Дорофеев) ды Ловняськевтеме (Ташто Чамзань почтальонось Наталья Спиридонова). Клубонь прявтось Наталья Зайкина оршнекшнесь Яга-бабакс, кружоконь ветицясь Альбина Фролова – скоморохокс. Кузонть перька пурнавкшность малав 100 ломанть, ютавтозельть пелькстамот, налксемат ды киштемат. Од иенть каршо, декабрянь 30-це чистэ, ДК-нь роботниктне, коень коряс, яксесть кудова, ды кандтнесть казнеть вишка эйкакштненень. Ней Якшаматякс наряжакшнось велень библиотекаресь Галина Астафьева, Ловняськекс – Альбина Фролова, Яга-бабань честесь таго сатотсь Культурань кудонь прявтонтень Наталья Зайкинанень. Казнеде башка, евксонь персонажтне эрьва эйкакшонть марто киштсть-морасть ды кунсолость сынст стихотворенияст.

Од иень чокшнеськак ютась мельспаросо, малав 23 часос клубось тыц пешксель. Тесэ ютавтозель театрализованной представления Якшаматянть ды Ловняськенть марто. Ламо лездась «елканть» ютавтомсто Культурань кудонть умонь ялгась, Саранскоень эрицясь Валентина Дыдыкина. Сон свал аноксты лия енов а молиця пелькстамот, сонсь ладси стихотвореният ды поздоровт. Велень эрицятне сакшность оршнезь эрьва кодамо костюмсо. Кие ульнесь Кискакс, кие – Каткакс, кие – Лишмекс… Сехте паро оршамопеленть кисэ максозель паро казне велень администрациянть пельде. Лембе поздоровт Од 2018 иенть кувалма евтась тосонь администрациянь прявтось Т.Н.Куманева.

Январень 2-це чистэ Культурань кудонь роботниктне таго эзть сода оймсема, ды анокстасть эйкакштнень туртов «Якшаматянть кедьсэ инжекс» налксемань программа. Эйдетнеде каникуласто ульнесть байтяк, эдь ламот сакшность покштяст-сырькаест туртов оштнестэ.

Роштуванть каршо клубов тердезельть велень сырькайтне ды покштятне. Сынст туртов ютавтозельть кенярксчинь калярдомкат, налксезель сценка каштомонть лезэвчидензэ ды весе каванязельть тантей прякасо-чайсэ.

 

… Сабанцелесэ

Од иень чокшнень кенярксчиденть башка Отяжелень райононь Сабанцеле велесэ январень 3-це чистэ ютавтозель весенень вечкевикс мероприятия – «Иляк стувтне тон велеть!». Велень Культурань кудосонть арасель вейкеяк чаво тарка, кода кортыть, умарнень а козонь прамс ульнесь. Паро ежомарямотнень седеяк кепедсь дивавтыця мазычинь кузнэсь, конась свал стявтови ушосо, Культурань кудонть икелев. Те вастовоманть анокстамсто Культурань кудонь прявтонтень Ольга Кузнецованень лездасть «Сабанчеевское» ООО-нь прявтось Д.Н.Игушкин ды Сабанцеле велень администрациянь прявтось В.В.Сайгушкин. Ветясь мероприятиянть свалшкань конферансьесь, тонавтыцясь Надежда Слугина.

Вастовомась ушодовсь ютазь пингень 80-це иетнес «ливтямосонть». Ваныцятненень невтезель фильма, козонь совасть се шкань кинотне, моротне, велень эрицятнень фотографиятне. Велень эрицятнестэ ламотне неизь эсест пряст, од пингест. Те фильмась ламонь сорновтынзе седеест, сыргозтизе ностальгиянть сырнень 80-це иетнень коряс.

Се шкастонть кармакшнось касомо-кемекстамо Сабанцеле велень культурань историяськак. Ламо паро тевть тейсь велень клубонть туртов сестэнь «Путь Ильича» колхозонь прявтось Н.М.Баринов, конась рамакшнось аппаратура клубонь эстрадантень. Сестэ пурназель васенце вокально-инструментальной ансамбля, козонь совакшность велень эрицятне: Александр Федотов, Владимир Игушкин, Владимир ды Василий Федотовтне. Николай Михайлович мелявкстомо макснесь транспорт ды ярмакт аппаратуранть рамамс ды ускомс. Клубось, конась строязель 1967 иестэ, витнезель. Бариновонь туемадо мейле культурантень лездыцякс теевсь колхозонь од прявтось В.П.Бухаркин.

Сабанцелень эстрадась мейле гайнесь весе райононть келес ды сонзэ томбале. Теньсэ покш таликась ВИА-нь прявтонть, баянистэнть Н.И.Нестеркинэнь. Кодат концертт сынь сестэ анокстыльть, кодат дискотекат! Ансамблянть составось, нама, полавтневиль. 80-це иетнень омбоце пельксстэнть эйсэнзэ морасть ды седясть Александр Титяпкин, лелятне-ялакстнэ Виктор ды Евгений Леонтьевтне, Юрий Сидоров, Геннадий Елеськин, Александр Игушкин, Николай Сидоров. 90-це иетнень ушодовомсто ансамблянтень састь од вийть: Владимир Титяпкин, Олег Батяркин ды Николай Федотов.

Нейгак клубось ашти васенце таркасо районсонть мазычинть ды ютавтовиця мероприятиятнень коряс. Ансяк ВИА-сь совась историяс. Велень администрациянь прявтось В.В.Сайгушкин поздоровонь евтамсто истя жо казсь Шнамонь коневт Сабанцеле велень эрицятненень, конатне ламо тейсть ды теить эсест велень лементь ды культуранть кастоманть-кемекстамонть кувалма: Н.И.Нестеркиннэнь, А.Е. Палькиннэнь, А.Н.Тикшайкиннэнь ды В.С.Сидорованень. Мероприятиянтень тердезель икелень колхозонь прявтось Н.М.Бариновгак.

Торжественной пелькстэнть мейле ушодовсь концертэсь, конанть эсест вийсэ анокстызь Сабанцеле велень эрицятне ды тесэ чачозетне: Анастасия Сорокина, Юлия Учеваткина, Марина Сайгушкина, Ольга Кузнецова, Владимир Титяпкин, Александр Игушкин, Михаил Подмарев. Сакшность морамо шабра велетнестэ инжетькак. Отяжелестэ – Ирина Котина ды Дубенкань райононь Кенде велестэ – Александр Демкин. Моротне ульнесть эрзякс ды рузокс, сынь весе алтазельть тиринь масторонь вечкемантень. Меельцекс «Штатол» моросонть ледстязельть сеть ломантне, конатне ламо тейсть Сабанцеле велень культуранть виевгавтоманзо туртов, ансяк уш тусть эрямостонть.

Концертэнть прядовомсто велень эрицятне энялдсть Владимир Титяпкиннэнь морамс «Сабанцеле» эрзянь моронть, конась теевсь те веленть гимнакс.

Вастовомадонть мейле ушодовсь 80 иетнень дискотекась, конась мольсь позда чокшнес ды кармась алкуксонь казнекс весе эрицятненень.

 

М.Девятова

 

Новости

Турчак заявил о запуске конкурса социальных проектов первичных отделений «Единой России»
В ближайшее время стартует конкурс социальных проектов первичных
отделений «Единой России», лучшие проекты смогут претендовать на
грантовую поддержку Партии. Об этом сообщил секретарь Генсовета Партии
Андрей Турчак, выступая на пленарном заседании форума первичных
отделений «Единой России» в Северо-Кавказском федеральном округе.
Подробнее ...
 
20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...