Рубрикатор

Культура Тиринь кельтнень ды культуратнень ванстомга
Тиринь кельтнень ды культуратнень ванстомга

Неть читнестэ Саранскойсэ ютавтовсь Эрзя-мокшонь раськень регионъютконь общественной организациянь Исполкомонь промксось. Торжественной пелькссэнть ульнесть  Эрзя-мокшонь раськень регионъютконь общественной организациянь прявтось, университетэнь  филологиянь факультетэнь деканось, профессорось Ю.А.Мишанин, МР-нь Государственной Собраниянь Председателень полавтыцясь И.М.Москаев, МР-нь Культурань, раськень политикань, туризмань ды архивень тевень министрась А.М.Чушкин, МР-нь Образованиянь министрась Г.А.Явкина,  Эрзя-мокшонь раськень регионъютконь общественной организациянь Исполкомонь председателесь А.С.Лузгин, Исполкомонь члентнэ, Россиянь регионтнэсэ мокшэрзянь автономиятнень прявттнэ.

Мокшэрзянь раськесь Россиянь финнэнь-угрань раськетнень ютксо ловови сехте покшокс, эрзятне ды мокшотне эрить масторонь весе регионтнэсэ. Секскак течи тезэ пурнавсть сеть, кинь седеест сэреди, а верест лаказь лаки тиринь кельтнень, эсь раськень койтнень-кирдатнень ванстомаст кис. Тевтнеде ды мелявкстнэде эштё ламо, ды сынст решамат весементь содазь ды апак капша. Республикань Государственной Собраниянь Председателенть пельде ёвтан покш сюкпря тенк истямо эрявикс тевенк кис, – пурнавозтненень пшкадемстэ тешкстызе Иван Москаев.

Анатолий Чушкин кортась, Россиясо эриця раськетнень консолидациясь ашти прявт тевекс сень туртов, штобу кирдемс зыянтнэнь ды апаротнень.

Минек масторсо ды республикасо примазь весе эрявикс нормативно-правовой акттнэ раськетнень койтнень-кирдатнень, культуратнень ды тиринь кельтнень ванстомга. Эрзя-мокшонь раськесь – те государствань раське. Секскак а эряви стувтнемс эсь историянть ды тешксэв событиятнень. Аволь умок Мордовиянь Прявтось Владимир Волков сёрмадсь Указ 2018 иестэ «Шумбрат» кенярксчинть ютавтомадо. Те седеяк лезды кемекстамс минек раськетнень ютксо ояксчинь сюлмотнень, – тешкстызе Анатолий Михайлович.

Эрзя-мокшонь раськень регионъютконь общественной организациянь прявтось Ю.А.Мишанин пачтясь пурнавозтненень 2017 иестэ Исполкомонь важодемань тевтнеде-мельтнеде. Кода тешкстызе Юрий Александрович, иесь сюпаволь эрьва кодамо мероприятиянь ды тевень коряс. Роботась ветявсь вадрясто ды ёроковсто. Раськень культурань мероприятиятне ютавтовсть аволь ансяк эсенек республикасо, истя жо ламо регионтнэсэ, косо эрить эрзятне ды мокшотне.

Минек организациясь примась участия ламо мероприятиятнесэ, конат алтавсть Октябрянь революциянь 100 иетненень, Иневанькс воинэнть Феодор Ушаковонь кулома чистэнзэ саезь 200 иетненень. Тешкставсть 100 иеть Советской Союзонь Героенть М.П.Девятаевень чачома чистэ, 100 иеть бу топодевельть просветителентень Г.Я.Меркушкиннэнь, 95 иеть – сказительницантень Серафима Люлякинанень. Истя жо тедеде ульнесть мероприятият, конатне алтавсть эрзя-мокшонь раськень васенце Инекужонть ютавтомань 25 иетненень. Минек организацияс совицятне якасть Россиянь финнэнь-угрань раськень VI-це съездэв, – тешкстызе Юрий Александрович.

Истя жо Юрий Мишанин ёвтнесь, те иестэ ламо мероприятият ютавтовсть масторонь регионтнэсэяк. Истя, Ульяновской областьсэ коень коряс ульнесь «Шумбрат!» кенярксчись. Тесэ эряви тешкстамс, региононь ламо школатнесэ ветяви мокшонь ды эрзянь кельтнень тонавтомась, тесэ васенцеде ютавтовсь неть кельтнень тонавтыцятнень конференциясь. Тедеде Саратова ёнксонь Оркина велесэ панжовсь Мокшэрзянь раськень куншкакурось.

Чувашия ёнксонь эрзянь келень тонавтыцятне И.В.Долгова ды К.В.Кулясова ёвтнесть, республикань сеть велетнень школатнесэ, косо эрить эрзят, школьниктне тонавтнить рузонь, чувашонь, англань, немецень ды эрзянь кельть. Тонавтыцятнень марто вейсэ эйкакштне тонавтнить велетнень историяст, эсь содамочист невтнить олимпиадатнесэ, республикань ды регионъютконь пелькстамотнесэ.

Пек вадрясто промкссонть кортась МР-нь Образованиянь министрась Галина Явкина. Галина Анатольевна толковизе пурнавозтненень тиринь кельтнень тонавтоманть коряс кевкстеманть. Меельце шкастонть масторонть келес тень коряс ламо кортамот, ламо пелькстамот ды ачарькодемат.

Минь лиясто аволь видестэ чарькодтяно, мезе те истямось тиринь кельтне ды государственной кельтне. 2017 иень январень 1-це чистэ тонавтнемань аравтлувонтень совавтовсь «родной кель ды литература» чарькодемась (икеле сон лемдевиль филология). Те ёнксось обязательной масторонь тонавтнемань весе заведениятнень туртов. Эрьва ломаненть ули эсь тиринь келезэ. Кинь-бути сон рузонь, лиянь – эрзянь, мокшонь, татаронь ды седе тов. Ды те ломаненть ули конституционной правазо тонавтнемс те келенть. Бути тиринь келесь рузонь, эйкакшось башка эштё тонавтни рузонь келенть, бути эрзянь – тонавтни эрзянсенть.

Улить эштё государственной кельть. Минек Мордовиясо  – те эрзянь ды мокшонь кельтне. Тень коряс, Саранск ошонь ды республикань школатнесэ тонавтневить минек республикань государственной тиринь кельтне. Тонавтомась ветяви мелень коряс. Минек республикасо тееви весемесь, штобу тонавтомс тиринь кельтнень ды а ёмавтомс сынст, – кемекстызе Галина Явкина.

Истя жо промксонть лувсо кортавсь «Лучший кабинет мордовских (мокшанских и эрзянских) языков» республикань конкурстонть. Сонзэ арсеви ютавтомс сы иестэ. Пурнавозтненень толковавсь, кода видестэ анокстама неть кабинеттнэнь.

Меельцекс пурнавозтне кемекстызь Исполкомонть 2018 иентень важодемань аравтлувонть.

Ю.Еремина

 

Новости

Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...
 
Казаконь дружина

Мордовиясо васенцеде пурнавсь эсь олясо важодиця казаконь пожарной дружина. Те тевентень анокстамонть Саранскойсэ ютызь «Свято-Предтеченской» казаконь обществантень 25 совицятне.

Подробнее ...