Рубрикатор

Александр Седойкин:«Важодеманть кисэ сехте покш казнесь – те эрицятнень пельде сюкпрянь валтнэ»

Покш Игнатбуень ёнкссо участковой уполномоченноесь Александр Михайлович Седойкин Внутренней тевень органтнэсэ важоди малав кеветее иеть. Неень шкантень сонзэ участканть кувалмозо кодгемень вайгельпеть – ушодови Ицял ёнксонь границястонть ды моли Орданьбуе ёнксонть видьс. Важодемань вановтонзо ало 23 эрямонь пунктт, косо эрить 2347 ломанть. Аволь умок Покш Игнатбуе ёнксонь Киржеманы, Горки, Якстере Нива, Любимовка ды лия велетнень эрицятне кучсть сёрма Мордовия Республикава Внутренней тевень министранть Ю.В.Арсентьевень лемс, сынь шнызь эсест участковоенть ды ёвтасть покш сюкпря сонзэ аволь шожда важодеманть кисэ. Сёрмасонть кортави: «…эрьва кодамо пшкадеманть кувалма, куш кона шкастонть, улезэ те оймсема чи эли позда чокшне, А.М.Седойкин вестькак а отказы, покш мель марто кунсолосынзе эрицятнень талновтыця кевкстематнень ды лезды. Минек вановтонок коряс, сон пек вадря невтекс весе од сотрудниктнень туртов. Александр Михайлович алкуксонь профессионал, эсензэ тевень специалист, седеймариця, паронь арсиця, цидярдыця, свал анок самс лездамо эрицятненень. Покш сюкпря тензэ вадря важодеманть кисэ!»
Аволь умок вастовкшнынек участковой уполномоченноенть А.М.Седойкин марто, кортнинек сонзэ важодемань башка ёнкстнэде.

 

– Мон васняяк малав ниле иеть роботынь дежурной частьстэ оперативной дежурноень лездыцякс. Важодемасонть лездыцякс, превспутыцякс тень ульнесь майорось Иван Владимирович Осипов. Кортась тень, келя, мезе тон кармат важодеме дежурной частьсэ сержантонь званиясо, эдь тонь ули высшей образованият. Теде мейле арсезевинь, эдь алкукскак, эряви мезеяк полавтомс. Се шкастонть тень мельс пек тукшнось участковойтнень коллективесь, сон покшоль, кемевиксэль, весе важодсть покш ялгаксчисэ, вейке-вейкенень лездазь. Монь чачсь покш мелем кармамс участковоекс, ды пек паро, чаво тарка тосо ульнесь. Ды ней уш малав кевейкее ие важодян участковоекс, – ёвтнесь Александр Михайлович. – Участкам покш. Ней уш малав весе велетнесэ эрить ансяк сыре ломанть, улить истяткак, косо вейке ды кавто эрицят. Бажан эрьва чистэ ардомс велетнес, вастовомс, кортамс ломантнень марто, чизэнзэ сави ардомс ламо – ведьгемень-кодгемень вайгельпеть.
Участковоесь тешкстызе, ломантне седе сеедьстэ пшкалить семиясо аладямотнень коряс. Сеедьстэ нитне пеняцить мирдест лангс, тонат симить, колыть эсест эрямост ды тандавтнить-покордыть малавиксэст, кедест кепсить. Нитнень арась мелест явомс, калавтомс семиянть, энялдыть кортамс мирдест марто, кармавтомс чарькодеме, кодамо зыян сынь кандыть малавиксэст туртов.
– Лиясто нитне пшкадить тень: «Александр Михайлович, мон яволявтома сёрмадомо а карман мирдем лангс. Тон, инеськеть, совак тенек, кортак мартонзо». Вастован, кортнян, ды алкукскак те лезды, – тешкстызе А.М.Седойкин. – Зярдо мирдтне а чарькодить кортамотнень ды превс путоматнень, сестэ сави тевс нолдамс административной мератнень. Истя, вейке цёранть ушосто рединек пек иредьстэ, ускинек участкас, тесэ кавтошка чить кирдинек ды нолдынек кудов. Ковонь ютазь вастыя нинзэ: «Александр Михайлович, сюкпря, мирдем симемадо лоткась! Кудосонок сэтьмечи, а сёвномат, а тюремат арасть, мон ойминь». Ломантне пшкалить эдь аволь яволявтоматнень кисэ, энялдыть кортамс малавиксэст марто. Эрси, мирдтнень-нитнень озавтсынь вейке столь экшс ды ютавтан мартост кортамот, максан превспутомат.
Участковоесь видькстась, сынст ёнкссо од ломантне сэтьметь, мартост арасть кодаткак стакачить. Александр Михайлович тешкстызе, одтнэнь марто сон корты апак покшкавтне, тонат тень редить ды кемить.
Александр Михайлович ёвтызе, участковоень тевтнень топавтомсто, эряви бажамс седе сеедьстэ вастневемс ды кортамс ломантнень марто, кунсоломс-чарькодемс, мезе сынст талновты.
– Лиясто ломантненень эряви лезкс аволь ансяк правань ванстомань тевтнень коряс, эдь эрьва кодат кевкстемат лиснить эрямосонть. Лиясто эряви максомс превспутома, кода улемс те эли тона тевсэнть. Монь вановтон коряс, бути улить возможностеть, эряви лездамс ломантненень, редямс эрицятнень весе энялдомаст ды кевкстемаст. Велень эрицятне сеедьстэ пшкалить, зярдо госуслугатнень вельде эряви сёрмадстомс оружиянть, гайневтить-кевкстнить лезкс. Ульнесть истят тевтькак, зярдо васоло велень эрицятне макссть тень ярмакт ды энялдсть пандомс кредитэст. Ды мезе, савкшнось молемс банкс ды пандомс ярмактнень, – ёвтни Александр Михайлович. – Монь участкам ашти кавто пельксстэ, вейке ёнкссонть рузонь велеть, омбоцесэнть – эрзянь. Рузонь велень ломантнень обуцяст вейке, эрзятнень – овсе лия. Ды тень пингстэ эрьва ломанентень эряви муемс башка чарькодема, ладямс кель-валонть, а покордамс пшкадицянть. Ней важодемань иетнень перть пек вадрясто содасынь участказон совиця эрьва велень ломантнень, мейсэ ды кода сынь эрить, кода эряви мартост кортамс. Ёвтаса, важодемасонть пек лезды тень эрзянь велетнесэ тиринь кельсэ кортамось, эрзянь кельсэ кортамсто ломантне ваныть лангозот лиякс, седе кемить ды апак сёпо ёвтасызь потмо валост. Ней уш рузонь велетнесэяк кой-кить бажить тень эрзякс пшкадемс.
А.М.Седойкин тешкстызе, иеде иес редявиксстэ виевгады внутренней тевень органтнэнь материально-технической базась. Ды аволь ансяк Саранскойсэ, истя жо районтнэсэяк. Россиянь Внутренней тевень министерстванть ды Мордовия Республикань Правительстванть лезксэст вельде региононь МВД-сэнть свалшкане одкстомтовить служебной автомашинатне, улить компьютерт, важодеманть туртов максови телефон. Александр Михайлович ёвтызе, пек паро, ули служебной машиназо, тень вельде сон шождасто ды куроксто пачкоди сонзэ участкань эрьва велентень, читькак, ды, бути эряви, ветькак. Участковоесь тешкстызе, кода ансяк ушодсь важодеме, сонсь явшесь эрицятненень телефононь номерэнзэ марто визиткатнень. Ней телефононть содасызь малав эрьва кудосонть, кие жо ёмавтсы или стувтсы – кевкстнить почтальонканть.
Кода мерсь Александр Михайлович, эрьва эрицянть марто эряви кортамс, кунсоломс пшкадеманзо-энялдоманзо, муемс кель-вал ды, сехте прявтось – лездамс. Александр Михайлович эрьванть эйстэст кунсолосы, чарькодьсы ды лезды, тень пингстэ киньгак а покорды
– Зярдо лездат ломанентень витемс сонзэ стакачинзэ-кевкстеманзо, кудовгак паро ёжосо велявтат. Минек важодеманть кисэ сехте покш казнесь – те эрицятнень пельде сюкпрянь валтнэ, – корты А.М.Седойкин. Участковоесь видькстась, те тевсэнть сон муизе эсензэ тарканзо ды вестькак эзь янксе кочказь профессиянть кувалма.
Александр Михайловичень нежезэ – те вечкевикс семиязо, косо сонзэ а мурнить ды а сёвныть веть ды оймсема читнестэ важодеманть кисэ. Низэ, Елена Александровна, тонадсь мирдензэ тевдеемантень ды вадрясто чарькодьсынзе сонзэ важодемань башка ёнкстнэнь.
– Лиясто веть тердьсамизь роботамо, састыне пурнан ды туян. Мейле валске ёвтнян нинтень, веть араселинь кудосо, важодема таркав тукшнынь. Сон каршон: «Вай, а мон эзинь фатяяк», – пейди А.М.Седойкин.
Седойкинтнэнь кавто эйкакшост, Катянень кемнилее иеть, Диманень неть читнестэ топодсть кемень.
Важодемадо башка А.М.Седойкин неень шкане тонавтни Ицялонь педагогической колледжень физической воспитаниянь факультетсэ. Сонзэ ули покш мелезэ сы шкастонть важодемс эйкакшонь тренерэкс. Ды уш ней топавты те бажамонть. Недлязонзо кавксть яки Игнатбуень спортзалс, косо эйкакштнень марто налксить футболсо, ули эсест командаст.
– Монень пек вечкеви важодемс эйкакштнень марто. Иень лангс апак вано, сынь монь ловить эсест ялгакс. Ней командазонок совить 10-це ды 11-це класстнэсэ тонавтницят, зярдо сынь прядсызь школаст, тарказост сыть лия эйкакшт. Лиясто мик пурнавить комсь ды седе ламо од ломанть. Зярс цёрам а карми налксеме мартон, мон те тевенть а кадса, – покш мельсэ тешкстызе А.М.Седойкин.
Т.Аксенова


07.11.2018

 

Новости

«Единая Россия» предложила Правительству усовершенствовать систему целевого набора в вузы
Премьер-министр Дмитрий Медведев поддержал предложения
фракции «Единой России» в Государственной Думе, озвученные ее
руководителем, вице-спикером Сергеем Неверовым. В частности,
одобрена идея пересмотра программы целевого набора в вузы,
введения сбалансированного питания в школах и сохранения
региональных и муниципальных телеканалов при переходе на
«цифру».
Подробнее ...
 
7 мая в Мордовии пройдет Диктант Победы
Региональный организационный комитет по проведению Всероссийского
исторического диктанта подержал решение Генерального Совета «Единой России» о
проведении «Диктанта Победы»
Подробнее ...
 
Кортавсь шукшонь пурнамонь реформадонть ды «Экология» национальной проектэнть тевс нолдамодо

Неть читнестэ Саранскойсэ ютавтовсь «Единой Россиянь» региональной дискуссионной площадкань васенце промксось. Сонзэ лувсо кортавсь коммунальной шукшонь пурнамонь реформадонть ды республикасонть «Экология» национальной проектэнть тевс нолдамодо. Промксонть важодемасо ульнесть «Ремондис Саранск» региональной операторонь прявттнэ, республикань Жилищно-коммунальной хозяйствань, энергетикань ды эрицятнень гражданской ванстомань, Вирень ды охотямонь хозяйствань, Эрицятнень социальной ванстомань, трудонь ды занятостень министерствань важодицятне, тарифень коряс республиканской службань специалисттнэ, ОНФ-нь ды общественной организациятнень члентнэ.

Подробнее ...
 
Кобзев: Получение паллиативной помощи по месту пребывания сделает ее доступной для всех нуждающихся
Возможность  получения  паллиативной  помощи  по  месту  пребывания   существенно   упростит  жизнь
нуждающихся в ней людей и их родственников по всей стране. Об этом заявил член общественного
совета партпроекта «Единой России» «Здоровое будущее», член комитета Госдумы по охране здоровья
Юрий Кобзев, комментируя подписанное премьер-министром Дмитрием Медведевым постановление о
внесении   изменений   в   программу   государственных   гарантий   бесплатного   оказания   медицинской
помощи.
Подробнее ...
 
Региональная дискуссионная площадка «Единой России» на «круглом столе» обсудит реформу обращения с ТКО
17 апреля в Региональном исполнительном комитете Партии состоится первое
заседаниеРегиональной дискуссионной площадки ВПП «Единая Россия».
Ее Координатором стал заместитель Председателя Государственного Собрания
РМИван Михайлович Москаев.
"Круглый стол" Региональной дискуссионной площадки Партии будет посвящен
теме: "Ход реформы обращения с твердыми коммунальными отходами и реализация
национального проекта "Экология" в Республике Мордовия".
К обсуждению партийцы пригласили регионального оператора "Ремондис Саранск",
министерство ЖКХ, энергетики и гражданской защиты, министерство лесного и
охотничьего хозяйства, министерство социальной защиты, труда и занятости
населения, Федеральную службу по надзору в сфере природопользования,
Республиканскую службу по тарифам, ОНФ и другие заинтересованные ведомства,
общественные организации. Начало мероприятия в 15.00.