Рубрикатор

Их знает вся Россия Е.Н.Шульгов: «Васенце тевенек – лездамс ломантненень, свал аштемс видечинть кисэ!»
Е.Н.Шульгов: «Васенце тевенек – лездамс ломантненень, свал аштемс видечинть кисэ!»

Саранск ошонь округонь Россиянь МВД-нь Управлениянь общественной порядкань ванстомань отделэнь правань коламотнень а нолдамонь отделениянь инспекторось, полициянь подполковникесь Евгений Николаевич Шульгов Внутренней тевень органтнэсэ важоди малав комсь иеть. Н.П.Огарёв лемсэ МГУ-нь историянь ды социологиянь факультетэнть прядомадо мейле сась роботамо Саранск ошонь Ленинской райононь ОВД-в. Важодсь участковоекс, мейле – старшей участковоекс, участковоень уполномоченноень отделэнь прявтонь полавтыцякс, седе тов – теке жо отделэнь прявтокс. Важодемань васенце иетнестэ поладызе тонавтнеманзо Нижней Новгородонь Юридической Академиясо. Ней Евгений Николаевич – МР-нь Правительстванть юрсо гуманитарной наукань НИИ-нь аспирант, маласо шкастонть арси идемс кандидатонь диссертациянть.

 

Вадрясто важодемань кисэ Е.Н. Шульгов казезь «За доблесть в службе», «За отличие в службе», «За охрану общественного порядка», «За заслуги в проведении Всероссийской переписи населения» медальтнесэ, Почетонь грамотатне ды Благодарносттне – а лововитькак. Аволь весть ульнесь Почётонь доскасонть. Ютазь иестэ Внутренней тевень органонь важодицянь чинть тешкстамсто Саранскоень ды Мордовиянь митрополитэсь Зиновий казизе Е.Н.Шульговонь Мордовиянь митрополиянь медальсэ. Евгений Николаевичень валонзо коряс, сехте покш казнесь жо сонзэ туртов – те эрицятнень пельде сюкпрянь валонь ёвтамось.

Общественной порядкань ванстомань отделэсь покш, тей совить правань коламонь профилактикань отделениясь, ПДН-нь инспектортнэ, участковойтне. Минь вантано Саранск ошонь участковойтнень тевтеемаст мельга, вансттано сэтьмечинть республикасонть мероприятиятнень ютавтомсто. Тедеде кармить ветявомо кавто покш тевть: мартонь 18-це чистэ Россиянь Президентэнь кочкамотне ды Футболонь коряс масторлангонь чемпионатонь матчтне. Мундиалентень учовить пек ламо участникть ды инжеть, сонензэ анокстамонть лувсо уш ней ютавтовить эрьва кодат тренировкат, тонавтомат, – ёвтни важодемадонзо Е.Н.Шульгов. – Мартонть прядовомс Саранскоень участковойтненень эрявить ванномс весе квартиратнень, кудотнень. Минь ёвтнетяно ломантненень Чемпионатонть ютавтомадо, макстано визиткат, толковатано эрицятнень талновтыця кевкстематнень. Те важодемась канды покш лезэ: редяви, косо эрить симицят, кона эрямо таркатне максовить сиведемс... Нама, роботась стака ды ломантнеяк эрьва кодат понгонить, лия ёндо, кортамс ломантнень марто мельспаро.

 

Е.Н.Шульгов тешкстызе, иеде иес редявиксстэ виевгады внутренней тевень органтнэнь материально-технической базась. Ды аволь ансяк Саранск ошсо, истя жо районтнэсэяк. Истя, Зубова-Полянань, Краснослободскоень ды Ромодановань ёнкстнэсэ полициянь участковой уполномоченнойтнень туртов теезь колмо административной-эрямонь комплекст. Россиянь Внутренней тевень министерстванть ды Мордовия Республикань Правительстванть лезксэст вельде региононь МВД-сэнть свалшкане одкстомтовить служебной автомашинатне. Неень шкантень автохозяйствань балансонтень путозь автотехникань малав 500 единицат. Теевить весе условиятне важодеманть вадрясто топавтомга. Ды те канды редявикс лезэ. Е.Н.Шульгов тешкстызе, Россиянь МВД-нь Управлениянь общественной порядкань ванстомань отделэнь правань коламотнень профилактикань отделениянь опытэнть ванкшномо-тонавтнеме сакшныть шабра региононь ялгатнеяк, аволь умок тесэ ульнесть Чувашия Республикань специалисттнэ.

Касы эрицятнень кемемась полициянь важодицятненень, теде корты сеяк, чизэнзэ Евгений Николаевичнень кевкстема марто пшкалить комсь, лиясто мик колоньгемень ломанть.

– Пек ламо пеняцямот меельце шкасто эрямо таркань кевкстематнень коряс: кинь тейтерезэ саизе квартирань пельксэнть, кинь цёразо нельгизе эрямо тарканть. Пек берянь, ванкшноматнень ютавтомадост мейле редяви, весе неть факттнэ алкуксонь. Истя жо меельце шкастонть ламолгадсть манчицятне. Аволь умок лиссь истямо аволь паро тев, – ёвтни Евгений Николаевич, – минек участкасо общежитиянь комнатасо ськамонзо эрясь инвалид цёра. Содавиксэнзэ мерсть тензэ: миик комнатанть. Тона миизе, рамасть тензэ лия. Цёрась – I-це группань инвалид, секскак эрявсь мельганзо якиця, ды се якицясь кармавтызе сёрмадстомс лангозонзо комнатань дарственноенть, инвалидэсь, мездеяк берянде апак арсе, теевтизе дарственноенть нотариусонь кедьсэ, мельганзо якицясь документэнть получизе, ды те ломанесь седе тов эзь эряво тензэ, мешась, ды сонзэ ускизь велев. Пек апаро тевесь. Монень мейле пшкадсть инвалидэнть малавиксэнзэ, ёвтнизь лисезь зыянонть, меринь тенст молемс судс, тосо кармить ванномо те тевенть. Кемтяно, весемесь карми вадря.

Весенень, кить сакшныть тень, кортан: ломанень ярмактне эштё киненьгак эзть кандо уцяска. Эстензэ ломанентень кирдема вал салазенть-манязенть кисэ, эйкакшонзояк эштё кармить кандомо пежетькст неть салазь ярмактнень кисэ. Те аволь ансяк ней истя, икелеяк истя ульнесь ды карми свал. Эрьва трёшникенть кисэ эряви кирдемс вал. Важодемань шканть перть мон ламо истят манчиця ломанть неинь, ды конаськак эйстэст эштё эзь пачкоде парос. А минек ланга ютыть пек ламо ломанть.

Е.Н.Шульгов видькстась, малав эрьва чистэ сакшныть тетят-ават, конат пеняцить 30 иеде седе покш эйкакшост лангс: косояк а роботыть, беряньстэ пряст ветить, колыть эсест эрямост ды тандавтнить-покордыть малавиксэст. Участковойтне молить, кортыть мартост, кадык ломанесь аволь педе-пев полавтови, куш нурька шкас ды лиякс карми ветямо прянзо, лиси роботамо. Те уш пек покш тев. Миненек те, паряк, а редявияк, а семиянть туртов те пек неявикс ды питней.

– Васенце тевенек – лездамс ломантненень, свал аштемс видечинть кисэ! – поладызе кортамонзо Евгений Николаевич.

Вадрянть теемстэ кенярдыть аволь ансяк ломантне, кинень лезды, седе покш мельспаросо сонсь, видькстась, оймезэяк валдомгады. Евгений Николаевичень обуцязо чевте, стака тензэ ваномс ломантнень майсемаст лангс, эрьвантень бажи лездамс, кинень валсо, кинень тевсэ. Ламот эрить нужачисэ, толкови тенст: эряви пшкадемс социальной службав, тосо лездыть тенст – явить ярмакт, максыть ярсамопельть.

Сонськак Е.Н.Шульгов, козо сатыть виензэ, лезды. Телевидения марто анокстасть ламо сюжетт, конатнень вельде лездасть зыянс понгозтненень. Участкасонзо ульнесь вейке инвалид, стакасто сэредсь, пильгензэ пек коськекшнесть, мик наксадомо кармасть. Сонсь зярыяксть пшкалесь врачтненень – эзть сае эйсэнзэ больницяв. Евгений Николаевич тердсь тензэ медицинань куроконь лезксэнь максомань автомашина ды цёранть саизь больницяв. Мейле пурнызь эрявикс весе документтнэнь ды пачтизь Покш Березникень инвалидтнэнь туртов интернатов. Пельиень ютазь Е.Н.Шульгов якась варштамонзо ды эзь кеме эсензэ сельмтнес: цёрась аволь ансяк стясь пильге лангс, сон эрязасто налксесь футболсо!

Лезды сэредиця эйкакштненень, нужасо эрицятненень. Ризны-талны седеезэ бомжтнень кисэяк. Видькстась, меельце иетнестэ эйстэст кармасть седе аламо. Покш ризкс марто ёвтнесь, неть ломантнень калмить штапо, кирьгасост крёсткак арась. Ансяк православиясо истя а мереви. Е.Н.Шульгов эсензэ ярмак лангс рами коцт, паро ялгазо питневтеме сты кувака панарт цёратнень ды аватнень туртов. Евгений Николаевич кандсы сонсь моргс, вадря, тосо важодицятне а молить каршо, чарькодить те тевенть эрявиксчинзэ, ды оршавтсызь роднявтомо-раськевтеме ломантнень. Иезэнзэ малав сядо истят оршамопельть ставты, кирьгазост крёсткак рамси.

– Неть ломантнень калмить Ключаревас башка калмолангс, сынь кадозь, киненьгак а эрявить, минь участковойтнень марто зярыя иень перть ванськавтынек сынст: шукшонть пурнасынек, тикшенть ледьсынек. Калмотнень лангсо крёстонь таркас кавто частоколт путыть, лемть апак сёрмадо, ансяк номерт, – ёвтни Е.Н.Шульгов.

Нама, важодемадонть башка пракшныть оймсема читькак, сынь пек эрявить стакачиде пешксе эрямосонть. Е.Н. Шульгов видькстась, сон а вечки оймсеме иневедь чиресэ, вийть пурны иневанькс таркатнесэ улемстэ. Сон ветексть ульнесь Иерусалимсэ, пачколесь Палестинав, Синайской пельусиянтень, косо ашти Иневанькс Екатеринань монастыресь. Ульнесь Валаамсо, сон ашти Карелиясо, Финляндия марто границясонть, тов арась модаланга ки, эряви ведьга уемс, пачколесь Соловецкой монастырев, малав эрьва ковсто яки Дивеевав, Арзамасов, ульнесь Оптина Пустыньсэ ды ламо-ламо лия таркатнесэ.

– Мордовиясояк ламо истят таркат, невтемакс, Санаксарской монастыресь, тосо эрясь Иероним старецэсь, сон пек содавикс аволь ансяк Россиясо, православиянь весе масторсонть, сон эрзяль, – корты Е.Н.Шульгов.

Евгений Николаевич бажи седе сеедьстэ пачколемс тиринь ёнксов – Отяжбуень Ламбаське велев.

– Мон пек вечкса эсень велем, ризксэнтень, тетям-авам уш арасть, кудось чаво, ансяк а кадтано сонзэ, якатано. Козо сатыть виень, лездан тиринь велентень, – ёвтни Е.Н.Шульгов.

Тешкстасынек, Евгений Николаевичень кармавтоманзо коряс аванзо кулома чистэнть Ламбаськесэ эрицятненень кшинть максыть питневтеме. Е.Н.Шульговонь ды те ёнксонь ломантнень бажамост ды лезксэст вельде велесэнть строязь часовня, теезь купель, конань светямо сакшнось содавикс старецэсь Феофан, сонсь васенцекс экшеляськак тосо. Путозь крёст шабра Тазалень икелень церькованть таркас.

– Кортыть, ташто церьковань алтаренть таркас кадовить ангелт, ды бути тосо арась крёст, сынь авардить. Мон эштё тонавтнемстэ арсинь топавтомс те ине тевенть – путомс крёстонть, ды вана малав комсь иень ютазь топавтыя бажамонть, – ёвтни Евгений Николаевич. – Од крёстонть путомадонзо мейле лиссь овсе дивань тев: сядо иень ютазь муезель церькованть эсензэ кезэрень крёстось, ней сынь кавонест путозь.

2016 иестэ Шульговонь ушодксонзо вельде велень эрицятнень марто ванськавтозель-витнезель Ламбаське велень калмолангось. Теезь од пирявкс, ортат, керязь коське чувтотне ды куракштне. Важодемась ветявсь сёксня, валы пиземе ало. Ды алкуксонь дивань тевекс кармась, зярдо сентябрянть прядовомсто, а шкась ульнесь пек якшамо, калмолангсонть апак учне цветязевсь сирень чувтось. Сонзэ лангсо арасель вейкеяк лопа, ансяк тантейдеяк тантейстэ качадыця цецят. Пазнэнь кемицятне кортыть, те покштятне-бабатне истя ёвтасть сюкпря.

Т.Аксенова

 

Новости

«Единая Россия» предложила Правительству усовершенствовать систему целевого набора в вузы
Премьер-министр Дмитрий Медведев поддержал предложения
фракции «Единой России» в Государственной Думе, озвученные ее
руководителем, вице-спикером Сергеем Неверовым. В частности,
одобрена идея пересмотра программы целевого набора в вузы,
введения сбалансированного питания в школах и сохранения
региональных и муниципальных телеканалов при переходе на
«цифру».
Подробнее ...
 
7 мая в Мордовии пройдет Диктант Победы
Региональный организационный комитет по проведению Всероссийского
исторического диктанта подержал решение Генерального Совета «Единой России» о
проведении «Диктанта Победы»
Подробнее ...
 
Кортавсь шукшонь пурнамонь реформадонть ды «Экология» национальной проектэнть тевс нолдамодо

Неть читнестэ Саранскойсэ ютавтовсь «Единой Россиянь» региональной дискуссионной площадкань васенце промксось. Сонзэ лувсо кортавсь коммунальной шукшонь пурнамонь реформадонть ды республикасонть «Экология» национальной проектэнть тевс нолдамодо. Промксонть важодемасо ульнесть «Ремондис Саранск» региональной операторонь прявттнэ, республикань Жилищно-коммунальной хозяйствань, энергетикань ды эрицятнень гражданской ванстомань, Вирень ды охотямонь хозяйствань, Эрицятнень социальной ванстомань, трудонь ды занятостень министерствань важодицятне, тарифень коряс республиканской службань специалисттнэ, ОНФ-нь ды общественной организациятнень члентнэ.

Подробнее ...
 
Кобзев: Получение паллиативной помощи по месту пребывания сделает ее доступной для всех нуждающихся
Возможность  получения  паллиативной  помощи  по  месту  пребывания   существенно   упростит  жизнь
нуждающихся в ней людей и их родственников по всей стране. Об этом заявил член общественного
совета партпроекта «Единой России» «Здоровое будущее», член комитета Госдумы по охране здоровья
Юрий Кобзев, комментируя подписанное премьер-министром Дмитрием Медведевым постановление о
внесении   изменений   в   программу   государственных   гарантий   бесплатного   оказания   медицинской
помощи.
Подробнее ...
 
Региональная дискуссионная площадка «Единой России» на «круглом столе» обсудит реформу обращения с ТКО
17 апреля в Региональном исполнительном комитете Партии состоится первое
заседаниеРегиональной дискуссионной площадки ВПП «Единая Россия».
Ее Координатором стал заместитель Председателя Государственного Собрания
РМИван Михайлович Москаев.
"Круглый стол" Региональной дискуссионной площадки Партии будет посвящен
теме: "Ход реформы обращения с твердыми коммунальными отходами и реализация
национального проекта "Экология" в Республике Мордовия".
К обсуждению партийцы пригласили регионального оператора "Ремондис Саранск",
министерство ЖКХ, энергетики и гражданской защиты, министерство лесного и
охотничьего хозяйства, министерство социальной защиты, труда и занятости
населения, Федеральную службу по надзору в сфере природопользования,
Республиканскую службу по тарифам, ОНФ и другие заинтересованные ведомства,
общественные организации. Начало мероприятия в 15.00.