Суббота, октября 24, 2020
Важное

Покш Березникень районсо велень хозяйствань зярыя предприятият, конатнень покш таликаст райононть социально-экономической виевгавтомасонть. Ютксост – «Агроальянс» ООО-сь, косо управляющеекс важоди Владимир Евгеньевич Скрипченко.


Неть читнестэ пурнынек-сэрнинек ды сыргинек Судосева велев, косо ашти «Агроальянс» велень хозяйствань предприятиясь.

– Прявтонок, Владимир Евгеньевич, зярс арась, эри Саранскойсэ, – мерсть тенек тинге лангсо важодиця цёратне. – Аламос учодо. Сон тестэ ушоли важодемань чинзэ.
Алкукскак, зярыя шкань ютазь сась В.Е. Скрипченко.
– Нолдынк чумом, инескеть, аламос кирдевинь. Тенень ульнесть тувталт, – мерсь Владимир Евгеньевич. Ды ушодсь ёвтнеме велень хозяйствань предприятиясост важодицятнеде, сынст изнявкстнэде, течинь тевтнеде.
– «Агроальянс» велень хозяйствань предприятиясь теевсь 2018 иестэ. Азоронок – Виктор Викторович Ганзя. Сон эри Московсо. Икеле важодинек Тверь ошсо. Ансяк тосо тевенек эзть туе: модатне пек берянть, кевевть. Сокамсто-видемстэ яжинек ламо сокат, культиваторт, сеялкат, велень хозяйствань лия прицепной инвентарь, – ёвтни Владимир Евгеньевич. – Мордовияв пачкодинек ялгань мереманзо коряс. Сынек Покш Березникень райононь Администрациянь прявтонтень Иван Иванович Игоновнень. Ёвтынек меленек-арсеманок. Сон эзь отказа. Мекевлангт, кенярдозевсь. Эдь районсонть панжовить важодемань од таркат ды кармить соксевеме-видневеме кадозь модатне. Истя явсть тенек 3400 гектарт мода.

В.Е. Скрипченконь чачома ёнксозо – Алтаень краесь. 2014 иестэ прядызе Барнаулонь педагогической институтонть «Физика-информатика» специальностенть коряс. Истя уш лиссь, специальностень коряс эзь саво важодемс. Вейке ды пель ие важодсь «Агроальянс» ООО-нь прявт офиссэ, кона ашти Московсо.
«Агроальянс» велень хозяйствань предприятиянь управляющеенть валонзо коряс, Судосева велень скалонь ферматнень таркас теезель сюронь утом, одс витнезель латось, допрок витнезель фермань потмось.
Седе тов тевтне седеяк ламолгадсть. Ушодсть тракторонь, комбайнань, автомашинань, велень хозяйствань прицепной инвентарень рамсеме. Течи хозяйствасонть вейке ХТЗ-150, колмо МТЗ-82 тракторт, эйзэст ули прицепной инвентарь.

– Модатне тенек явозь сетне, конатне эзть соксеве, эзть видневе кеменде ламо иеть, – ёвтни Владимир Евгеньевич. – Тезэнь совить Шугурова, Гарт, Судосева, Пермезь велень модатне. Хозяйстванть пильге лангс кеместэ стямосонть покш таликазо монь полавтыцянть, теке шкане прявт агрономонть Юрий Степанович Чалдушкинэнь. Районсонть сонзэ асодыцянзо арасть. Икеле важодсь велень хозяйствань предприятиянь прявтокс. Сон куроксто мусь трактористт, кить соксизь-виднизь паксятнень. Вадрясто тевест топавтсть Сергей Карпеев, Николай Суняйкин, Александр Крайнов, Александр Крохин.
Тешкстасынек, важодемань васенце иестэнть «Агроальянс» хозяйствасонть эрьва гектарсто сайсть 15-18 центнерт сюро, весемезэ пивсэзель 300 тоннат. Велень хозяйствань предприятиясо важодицятне тенень пек кецясть. Эдь теезь ушодкс! Ды а берянь!

– Тедеде сюронь паксятнень урядамо лиснесть вете комбайнат: колмо «Акрост», 2 – «Полесье», – ёвтни прявт агрономось Ю.С. Чалдушкин. – Сынст эйсэ важодсть Сергей Карпеев, Александр Блошкин, хозяйствань механикесь Алексей Токарев, Михаил Старцев, од комбайнёрось Михаил Кечуткин.

– Важодинек а беряньстэ. Эрьва гектарсто саинек 27 центнерт сюро, пивсынек 1600 тоннат, – полады Юрий Степанович. – Весе сюрось зярс ашти тинге лангсо. Маласо шкасто ушодтано микшнемензэ аволь ансяк минек республикань эрицятненень, сонзэ томбалевгак.
Тешкстасынек, хозяйствань прявттнэ арсить сы иень урожайденть. Видезь уш 850 гектарт озимойть. Те тевенть тейсть трактористтнэ Александр Крохин ды Николай Баракшин.

Предприятиянь прявттнэ изнявксонть лангс эзть лотка. Сынь арсить вандынь чиде. Ды кундасть витаминно-тикшень гранулань нолдамонь коряс заводонь строямо.
– Сонзэ строинек вейке иес, – ёвтни Владимир Евгеньевич. – Стявтомонзо сакшнось Тверь ошсто монтажникень бригада. Заводонть сынь пурнызь куроксто. Эсенек ярмак лангс раминек оборудования, конань пурнызе тескень важодицясь Владимир Алексеевич Ключев. Сон тевензэ топавтсь вадрясто, эзь сода оймсемань чить. Нурькинестэ меремс, бажась седе куроксто ладямс оборудованиянть ды заводось ушодоволь важодеме. Ды те теезь.
Течи сындерят «Агроальянс» велень хозяйствань предприятиянь тинге лангов, сельмезэть каяты витаминно-тикшень гранулань нолдамонь коряс заводось. Сон кецявты ушо ёндояк, потстояк. Тесэ важодить кемень ломанть, конатнень прявтсо А.И. Панов. Тевест парсте топавтыть Сергей Гаврюшов, Евгений Макаркин, Денис Катишин.
Тешкстасынек, заводось часозонзо нолды 900 килограммат витаминно-тикшень гранулат.

– Зярс продукциянок ковгак а ильтятано, – ёвтни хозяйствань управляющеесь Владимир Евгеньевич. – Эряви теемс сертификат. Арсян, маласо шкастонть тень тейсынек. Заводонь продукциянть карматано микшнеме республикань томбалевгак.
В.Е. Скрипченконь валонзо коряс, гранулатнень теемс видневи 1100 гектарт люцерна. Эйстэст 500 гектартнэ видезельть «Баренбург» омбо масторонь видьмекссэ. Тикшенть ледсть Александр Космачев, Виктор Лизиков. Заводось важоди кавто сменасо.
– Арсетяно теемс ниле сменат, – видькстась Владимир Евгеньевич. – Ламолгавтсынек важодема таркатнень. Койсэнь, те удалы.
– Течи зяро ломанть важодить «Агроальянс» велень хозяйствань предприятиясо? – кевкстинек управляющеенть В.Е. Скрипченконь.
– Зярс хозяйствасонть важодить колоньгемень вете ломанть. Сынь – Шугурова, Пермезь, Покш Березник, Гарт, Судосева велетнестэ. Зярдо заводось ушоды важодеме ниле сменасо, эштё панжовить важодема таркат, – каршо валсо мерсь Владимир Евгеньевич.

Кецявты, «Агроальянс» велень хозяйствань предприятиясо важодить семиянь династият. Вана Александр Катишин важоди шофёрокс, Денис цёразо – заводсо операторокс, Владимир Ключев важоди эрьва мезень витницякс, Дмитрий цёразо – снабженец ды истя седе тов.
«Агроальянс» велень хозяйствань предприятиянь прявттнэнь аравтлувсо – маласо шкасто ушодомс сывелекс скалонь трямо. Тень туртов кеместэ витнезь икелень скалонь фермась, кона ашти Судосева веленть эйстэ малав кавто вайгельбеть. Ульяновскоень, Владимирскоень областтнестэ ды Мордовиянь Покш Игнатовань райононь «Воля» предприятиясто усковить вазт. Тесэ, фермасонть, тевтнень лади Андрей Бабич.
…Судосева велестэ сыргинек мельспаросо. Тесэ важоди велень хозяйствань виев предприятия, кона вансты веленть вандынь чинзэ.

Пётр Зиновьев. Фототне: Э.Ретунский
Покш Березникень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».