Вторник, октября 27, 2020
Важное

«8 МАРТА» ВЕЛЕНЬ ХОЗЯЙСТВАНЬ ПРЕДПРИЯТИЯСЬ ИЕСТЭ ИЕС ВИЕНЗЫ. ТЕСЭ ВАЖОДИЦЯТНЕ ШКАСТОНЗО СОКСИТЬ-ВИДНИТЬ, УРЯДЫТЬ ПАКСЯТНЕНЬ. СКАЛСТО ПОКШОЛГАВТЫТЬ ПОТЯВКСТНЭНЬ, ОДКСТОМТОВИ ТРАКТОРОНЬ-МАШИНАНЬ ПАРКОСЬ. ТЕСЭ НЕЙ ОМБО МАСТОРОНЬ ЗЯРЫЯ ВИЕВ ТРАКТОРТ, СЕЯЛКАТ, ВЕЛЕНЬ ХОЗЯЙСТВАНЬ ЛИЯ ИНВЕНТАРЬ.


МОРДОВИЯНЬ АГРАРИЙТНЕ ПРЯДЫЗЬ СЮРОНЬ УРЯДАМОНТЬ. «8 МАРТА» ВЕЛЕНЬ ХОЗЯЙСТВАНЬ ПРЕДПРИЯТИЯНЬ ПАКСЯТНЕСЭЯК КОМБАЙНАНЬ УВТТНЭ А МАРЯВИТЬ.

КОДА ЮТАСЬ СЮРОНЬ УРЯДАМОСЬ? ЗЯРО ЯВОЗЬ СЮРОТНЕНЬ АЛОВ МОДА? ЗЯРО ПИВСЭЗЬ СЮРО? КОСО СОН ВАНСТОВИ? ТЕЧИ КОДАТ ТЕВТЬ ТОПАВТЫТЬ ВЕЛЕНЬ ТРУДИЙ ЛОМАНТНЕ? ТЕДЕ ДЫ ЛИЯДО МИНЕК КОРРЕСПОНДЕНТЭСЬ КОРТНЕСЬ «8 МАРТА» ВЕЛЕНЬ ХОЗЯЙСТВАНЬ ПРЕДПРИЯТИЯНЬ ПРЯВТ АГРОНОМОНТЬ В.Е. ЛЕВЩАНОВ МАРТО.
– Валерий Евгеньевич, зярыя валт ёвтнеде эседенк.
– Мон чачинь 1975 иестэ Покш Игнатовань райононь Андреевка эрзянь велесэ. Тесэ ютась эйкакшпорам, тесэ кемекстыя обуцям. Тиринь велень средней школанть прядомадо мейле тонавтнинь агрономонь тевентень Ицялонь райононь Кемлянь совхозсо-техникумсо. А шнамга, ульнинь вадря студентэкс. Производственной практикам ютавтнилия тиринь велень колхозсо.

Совхозонть-техникумонть прядомадо мейле саимизь армияв. Служинь Москов маласо. 1996 иестэ, служамодо мейле, велявтынь тиринь ёнксов. Чинь ютазь молинь Андреевка велень «Заря» колхозонь прявтонтень Александр Михайлович Зубовнень. Сон аравтымим хозяйствань агрономокс.

Сестэ колхозонть мельга кемекстазель 3000 гектарт мода. Сюротнень алов явозельть 2500 гектарт. Те – районсонть весемеде ламо. Паксятнень свал виднинек элитной видьмекссэ. Эрьва гектарсто сайнинек 22-24 центнерт сюро. Се шкане те невтевксэсь а берянель.
Истя уш лиссь, кавто иень ютазь паро эрямонь вешнеме сыргинь Самарань областень Тольятти ошов. Тосо важодинь слесарекс «ВАЗ» предприятиясо. Мерть, ульнесь весемесь, эряк ды кецяк! Арась, ойменть тердсть тиринь ёнксось, тосонь паксятне, пертьпельксэнь мазычитне. Ды 2005 иестэ велявтынь эсенек велев. «Заря» велень хозяйствань предприятиянь прявтось Анатолий Радиславович Кутуров вастымим мельспаросо. Таго кундынь агрономонь тевенть топавтомо. Ней уш сюротнень алов явозельть 1500 гектарт. Сестэ виевстэ важодсть комбайнёртнэ Иван Григорьевич Куманев, Александр Викторович Кутуров.

Александр Викторовичень парсте содылизь аволь ансяк районсо, сонзэ томбалеяк. Сон – Мордовиянь велень хозяйствань заслуженной роботник. Ней важоди «МАПО-Транс» предприятиясо.
2013 иестэ «Заря» колхозось каладсь, ды минь ютынек «8 Марта» велень хозяйствань предприятияв. Сестэ прявтокс ульнесь Николай Алексеевич Дорофеев. Ней сон ютксонок арась, но валдо ды паро тевензэ эрить.
– Содазь, васень шкасто эрьва ломаненть эрси превс путыцязо. Кода кармить важодеме велень хозяйствань од предприятиясо, кие ульнесь превс путыцят?

– Превс путыцям ульнесь те хозяйстванть икелень прявт агрономось Михаил Николаевич Дорофеев. Сон тонавтымим, кода теемс модантень известкования, невтинзе сеть таркатнень, косо парсте касыть ламбамо якстерькаесь, силосокс кукурузась. Нурькинестэ меремс, Михаил Николаевич Дорофеев тонавтымим весементень, сехте эрявиксэнтень – эсь тевенть, тиринь ёнксонь пертьпельксэнть вечкеме.
– Валерий Евгеньевич, течи «8 Марта» велень хозяйствань предприятиянть зяро моданзо?

– Течи минек велень хозяйствань предприятиянть моданзо 10400 гектарт. Тезэнь совить Ташто Чамза, Андреевка, Аржадеева, Спасское, Маревка, Киржеман, Ташто Селища, Отяжеле, Кучкаева велетнень модатне. Сынь аштить Нижней Новгородонь областень Сеченовань ды Болдинань районтнэнь маласо. Сюротнень алов явозь вете тёжат гектарт, ламбамо якстерькаенть – 2200, силосокс кукурузанть – 700 гектарт ды зёрнакс кукурузанть – 300 гектарт.
– Те иесь тынк хозяйстванть туртов удалась-арась?

– Сеске мерян – удалась. Тедеде сюронь урядамо паксятнес лиснесть кемголмово комбайнат: колмо – «Акрос-561», кото – «Акрос-530», вейке – «Россельмаш-161» ды зярыя «Дон-1500Б». Сынст ветнесть сюронь алкуксонь кастыцят. Весемеде ламо – 29 тёжат тоннат сюро, пивсэсь Евгений Александрович Мамаев, 24 тёжат тоннат пивсэсь Александр Петрович Дорофеев, зняро жо пивсэсь Дмитрий Александрович Наумов. Истя жо виевстэ важодсть Иван Григорьевич Куманев, Николай Вячеславович Фадеев, Николай Иванович Дорофеев. Эйстэст эрьвась эсь «Дон-1500Б» комбайнасост пивсэсь 12 тёжат тоннат сюро.
– Сюронь урядамо ве ёндо лездыцят сакшность-арась?
– Сакшность кото ломанть Ромодановань районсто. Неть – Владимир Комиссаров, Сергей Томилин, Александр Дворянкин, Иван Терентьев, Павел Монастырский, Алексей Бурдаев. Сынь важодсть «Акрос-530» комбайнасо. Весемезэ саинек 164 тёжат тоннат сюро, эрьва гектарсто – 36 центнерт. Те меленде седе ламо.
Пек удалась яровой товзюрось. Эрьва гектарсто саинек 53 центнерт, видезель – 950 гектарт. Шуж видекшнынек 2230 гектарт, эрьвастонть саинек 34 центнерт.
– Сюронть ков ускиде?

– Весе сюронть ильтинек Лямбирень райононь «Атемарская» нармунень фабрикав ды Ромодановань «Элеком» предприятияв. Сюронть мельга сакшность эсест автомашинасо.
– Валерий Евгеньевич, течи кодат тевть топавтыть «8 Марта» велень хозяйствань предприятиясо важодицятне?
– Течи минек хозяйствань сюронь кастыцятне покш мель явить сы иень урожаенть алов моданть анокстамонтень. Вана Латко пря паксясонть парсте важоди трактористэсь Иван Васильевич Куманев. Сон эрьва чистэ дискови малав 120 гектарт мода. Трактористэнь тевензэ топавты умок. Сон – Андреевка велестэ.
Лия паксясо моданть соки омбо масторонь «Джон Дир» тракторсо Валерий Александрович Мамаев. Сонгак чинь норманзо топавтни велькска.
– Озимойтнень видинк-арась?
– Видинек уш 1400 гектарт. Те тевенть топавтыть трактористтнэ Иван Васильевич Куманев ды Евгений Викторович Кисляков.
Тешкстаса, Евгений Викторович Кисляков видинзе Киржеман велень паксятнень.

Видьмекст рамсинек Чамзинкань райононь «Калиновское» велень хозяйствань предприятиясто. Ансяк элитнойть. Эштё 20 тоннат «Леонидовка» видьмекст усксть «Ромодановосахар» предприятиясто.
– Зярдо листядо ламбамо якстерькаень таргамо ды зяро учнетядо саемс эрьва гектарсто?
– Тедеде ламбамо якстерькаенть алов явозельть 2200 гектарт мода. Сон кассь вадря. Лиякс меремс, культурась удалась. Таргамонзо ушодтано сентябрянь 15-це чистэ. Эрьва гектарсто арсетяно саемс 400-450 центнерт.
– Кода важодиде коромонь анокстамсто?
– Кода свал, виевстэ. Коромось саты натой кавто иес. Истя, анокстынек 11,5 тёжат тоннат сенаж, 500 тоннат тикше. Коромонь анокстамсто виевстэ важодсь Василий Васильевич Анников. Ёвтаса, сон тенек важодеме сась Украинань Донецкойстэ, сестэ, зярдо тосо ушодовсть аволь сэтьме шкатне. Паро валсо ледстясынь шоферэнть Павел Астафьевень, трактористэнть Пётр Сундуковонь. Коромонь анокстамсто сынь шка эзть ёмавтне. Свал тевсэльть. Течияк оймамонь апак сода важодить сенажонь анокстамосо.
– Валерий Евгеньевич, тедеде тынь ушодыде прявт агрономонь тевтнень топавтомо. Арсетяно тенк кеме шумбрачи, тевенк молест вадрясто, уцяска, важодемасо од изнявкст!
– Сюкпря вадря валонк кисэ. Содазь, ансяк вейсэнь вийсэ таштавить изнявкстнэ.

Пётр ЗИНОВЬЕВ.
Покш Игнатовань район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».