Четверг, марта 28, 2024
Важное

 

Кортыть, зярдо ломанесь котьми вечкевикс тевсэ, сон пек уцяскав. Ды, бути арсемскак – те алкукс истя. Истямо ломаненть вановтозояк лия: панжадо, валдо, сэтьме ды ванькс. Газетасо важодемань иетнень перть савкшнось вастневемс эрьва кодамо профессиянь ломань марто. Пек кенярдовты се, кода ламот алкукс вечксызь эсь тевест. Эсь роботадонть сынь ёвтнить покш мельсэ ды уцяскав мизолкс марто. Ламо истят трудий ломанть вастокшнынь «Тепличное» АО-сонть. Сынст ютксо – Светлана Васильевна Котова. Авась важодемань кинзэ тесэ ушодокшнызе эштё 1993 иестэ. 

 

Светлана Котова чачсь Саранскойсэ, прядызе 31-це № школанть ды мольсь тонавтнеме стыцянь анокстыця училищав. Прядызе сонзэ ды ушодсь важодеме получазь профессиянть коряс – стыцякс. 
– Кода-бути эзь савтово тень те тевесь. Аволь монь коряс сон ульнесь. Арсян, стыцякс юткошкастояк улят, робота жо эряви вешнемс лия, – ёвтни Светлана Васильевна. – Арсинь варчамс виень тепличницакс ды сынь тей важодемань коряс кевкстеме. Саимизь сеске. Те ульнесь 1993 иестэ. Аравтымизь видьмекстнэнь мельга якицякс. Роботынь истя колмо иень перть. 
Кода ёвтни седе тов авась, эрямось ладявсь истя, савсь туемс. Ансяк вана лия тев марто эрямонть сюлмамс эзь саво, ды 2008 иестэ сон тей велявтсь мекев. Кармась роботамо тепличницакс. 
– Роботан 3-це № цехень 2-це звенасонть, касттано куярт, – тешксты Светлана Котова. – Звенасонть эйстэнек весемезэ кеветее ломанть. Эрятано покш ояксчисэ ды вейке-вейкень чарькодемасо. Паряк, тень кисэ вечксаяк эсь роботанть. Кадык стакаяк сон, ансяк вана лиянть лангс а полавтса. Тесэ ней весе монь эрямом. 
Важодема таркасо тейтерь-аванть шныть. Ансяк, кода тешксты сонсь Светлана Васильевна, тевесь аволь шнамонь валтнэсэ. Прявтось ашти сеньсэ, кода тонсь ванат ды топавтат эсь тевенть. Ды бути эсь роботат вечксак, важодема таркав ливтязь ливтят, эрьва тевентень кундат покш мельсэ ды кенярдозь. 

Юлия ЕРЕМИНА  

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».