Пятница, марта 29, 2024
Важное
Чаунзань райононь Отрадной велесь аволь покштнень эйстэ, ашти жо райцентрадонть овсе аволь васоло. Аволь умок минь содавтынек те эрзянь веленть ды ванынек, кода ды мейсэ эрить тесэнь ломантне, кодат полавтомат тесэ лиссть меельце шкастонть. Покш кистэнть веленть ёнов велявтозь, весень васты сехте эрявикс ды покш полавтомась – Отраднойс теезь вадря од ки. Кода тешкстызь велень эрицятне, истямо казненть сынь учость уш умок.
Ды вана ней сынст бажамост топавтовсь. Кинть теемась ветявсь «Безопасные качественные автомобильные дороги» национальной проектэнь программанть лувсо.

Эряви меремс, неень шкане вадря китне пек эрявикст покш ошсояк, вишка велесэяк. Отрадноенть туртовгак сон пек эрявикс. Велесь аволь кадозь. Сон эри. Ды кода тешкстыть тесэнь эрицятне, эри велесь сень коряс, што куш аволь ламо, ансяк улить важодема таркат, конатнень максыцякс зярыянь туртов ашти Валерий Николаевич Аношкинэнь крестьянонь-фермерэнь хозяйствась.



Валерий Аношкинэнь эсь тиринь веленть марто сюлмавозь весе эрямозо. Сон зярдояк эзь бажа, кода ламот течи, оргодемс велестэ ошов, мекевлангт, свал снартнесь кепедемс эсь веленть, теемс весементь сонзэ ванстомга. Ды кода корты сонсь цёрась, те лиси ансяк мода лангсо важодезь, хозяйствань кирдезь. Секскак КФХ-нь теемадо меленть лангсо арсесь а кувать, сеске кундась тевс. Те ульнесь 2014 иестэ. Валерий Аношкин сестэ важодсь «Россия» СПК-нь председателекс. Роботась тензэ вечкевсь ды зярыя иетнень перть топавтсь сонзэ покш мельсэ. Ансяк вана Валерий Николаевичень ульнесь вейке покш бажамозо – ушодомс эсензэ тев. Эдь эштё овсе вишкине цёрынькакс сон свал чийниль фермав скалонь потявтыцятнень тевест мельга ваномо, бажиль тенст лездамс. Ды те бажамонть, ракшатненень вечкеманть мельсэнзэ кирдсь ламо иетнень перть. Секскак специальностенть получамодо ды эрявикс опытэнть пурнамодо мейле сон пурнась эсензэ хозяйства ды целанек алтызе эсь прянзо вечкевикс тевентень.

– Мон чачинь-касынь велесэ. Ды сон монь туртов свал ульнесь васенце таркасо. Оргодемс тестэ покш ошов кода-бути мельтькак эзть сакшно, – корты Валерий Аношкин. – Монь покштян-бабан, тетям-авам весе пингест перть эрясть Отраднойсэ. Весе ульнесть важодемань вечкицят. Ды те весемесь моненьгак максовсь.

Ансяк вана школанть прядомадо мейле цёрась велень хозяйствань ёнксонть эзизе кочка, тонавтнеме мольсь Н. П. Огарёв лемсэ МГУ-нь исторической факультетэв.

– Мон кода школам прядыя, пек покш мелем ульнесь тонавтнемс юристэнь тевентень ды мейле важодемс правоохранительной органсо, – ёвтни Валерий Николаевич. – Ды документэньгак максынь юридической факультетс. Анокстамонь курсаткак уш ютакшнынь. Те шкастонть сестэнь ректорось Александр Иванович Сухарев минек весень пурнымизь ды мерсь, юридической факультетс ансяк армиядо мейле саить. Мон эсь уцясканть варчнеме эзинь карма, куш тонавтнемс юридическойсэ бажамом покшоль, молинь историческойс. Теке марто превсэнь ульнесь истямо арсема: иенть тонавтнеса, молян армияв, тосо эсь прям примавтса партияс, сан мекев ды ютан юридическойс.
Мезесь-бути Валерий Аношкинэнь эрямосо истя лисськак. Цёрась тонавтнесь ие ды тусь армияв. Службанть ютызе Германиясо, Зале ошсо. Тосо ульнесь весе кавто иетнень перть. Армиясто велявтозь, юридическойс эзь юта, прядызе историческоенть. Ды уш ветеце курссо ушодсь роботамо.

– Од ломантнень васенце таркасо мезесь ашти? Нама, вечкемась, – ёвтни Валерий Аношкин. – Монгак вастыя вечкевиксэм Еленань. Вастневинек зярсыя. Сон тонавтнеманзо прядызе ды кармась важодеме эсенек райононь больницясо. Тесэ урьвакстынек. Монгак ветеце курссо ютынь индивидуальной графикс ды карминь важодеме эсенек райононь Наченалы велень средней школасо историянь ды обществознаниянь тонавтыцякс. Велесь минек Отрадноенть эйстэ кеменьшка вайгельбеть. Тосо вете иеть роботынь. Мейле 1997 иестэ аравтымизь эсенек Отрадноень школань прявтокс. Те таркасонть кенеринь роботамс кавто иеть. Вейке чистэ жо Чаунзань райононь сестэнь прявтось Геннадий Сергеевич Лобанов тердимим ды мерсь, эряви кундамс велень хозяйствань тевтнес – аравтымизь «Россия» СПК-нь председателекс. Кеветее иеть пиинь-палынь те тевсэнть. Велень хозяйствасо важодемась лиякс кодаяк а ёвтавияк. Тон чинек-венек тевсат, оймамот а эрсить. 2014 иестэ пурнынь-теинь эсень крестьянонь-фермерэнь хозяйства, конась важоди течияк. Теке марто эсь мелем ялатеке топавтыя, юридической факультетэнть прядыя. Кадык заочна, ансяк бажамом топавтовсь. Истя жо прядыя экономической факультетэнть. Ды фермерэнь тевсэнть те монень пек лезды, – тешксты Валерий Николаевич.

Весе неть иетнень перть В.Н. Аношкинэнь крестьянонь-фермерэнь хозяйствась важодсь сюракшов ракшань трямонь ды сюротнень видемань ёнкстнэсэ. Иешкадо икеле весе стакачитнень ды асатыкстнэнь ваннозь, фермерэсь кемекстась вейке ки – важодемс ансяк сюротнень кастомань ёнкссонть.

 
– Минек хозяйствась аволь пек покш, модатнеде весемезэ 1,5 тёжат гектарт, – корты Валерий Аношкин. – Арсинек, ракшань трямось канды ламо стакачить, весе вийтнень макссынек сюротнень кастомантень. Нама, теяк а шожда. Меельце шкастонть пертьпельксэсь велень хозяйствасо важодицятнень пек а кольневти. Тедеде оно тундось ульнесь якшамо, видемань шкась таргавсь. Сюротнень нуемаськак ушодовсь аволь шкасто. Ней вана эштё ламбамо якстерькаенть кадовсь урядамс. Минек эсенек моданок аволь пек ламо, лиятнень сайтяно арендас эсенек Отрадноень ды шабра Кульминань, Пичеурынь, Наченалынь эрицятнень кедьстэ. Тень кисэ жо тенст пандтано сюросо.
Эряви меремс, кадык Аношкинэнь хозяйствась аволь покшкак, ялатеке сон максы важодема таркат кемгавксово ломаннень. Веленть туртов те пек а берянь, эдь важодема таркань коряс велетнесэ неень шкане покш мелявкст. Теке марто те паро КФХ-нть туртовгак, эдь важодицятне тесэ – прявт неже.

Васень лездыцякс жо ды весе мельтнень-арсематнень кирдицякс Валерий Николаевичень туртов ашти семиязо. Елена Борисовна низэ важоди эсест велень ФАП-со, Татьяна покш тейтерест прядызе Н. П. Огарёв лемсэ МГУ-нь омбо масторонь кельтнень факультетэнть, ульнесь стажировкасо Америкасо. Ней уш ули эсензэ семиязо. Цёраст Семён ды Андрей тонавтнить школасо ды весе юткошкаст максыть тетяст-аваст туртов. Сынь прявт лездыцят куш кодамо тевсэ.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».