Чаунзань райононь Покш Эрьмезёнкасо улемстэ свал дивсян, кодат важодемань вечкицят тесэнь ломантне. Сынь путыть весе виест, штобу ванстомс тесэ важодиця «Ремезёнское» ООО-нть, конась аволь ансяк максы важодема таркат, истя жо теи эриекс велентькак. Велень хозяйствань предприятиянть прявтсо ламо иеть ашти «ООО МАПО и К» ТНВ-нь генеральной директоронь полавтыцясь Александр Борисович Ботайкин.
Эрзянь цёрась пингензэ перть важоди мода лангсо ды парсте чарькоди, бути а ули хозяйствась, аламонь-аламонь ёми велеськак.
– Минек хозяйствасонть роботыть эсь тевень содыця, вадря специалистт. Весе сынь зярыя кементь иетнень перть важодить эсь таркасост ды ковгак лияв а бажить туеме. Сынь – предприятиянть неже ды вандынь чинтень кемема, – тешкстась Александр Ботайкин.
Тундонь тевть
Тундонь видемась «Ремезёнское» ООО-нь паксятнесэ ушодовсь апрелень 18-це чистэ. Васняяк хозяйствань механизатортнэ вадрясто изызь-кавшакавтызь моданть, штобу сюрось лисевель вадрясто ды ве шкасто. Яровой сюротне весе видевсть, неть читнестэ прядызь ламбамо якстерькаень видеманть. Ней кадовсь лембень вечкиця культурась – кукурузась. Кода мерсь хозяйствань прявт агрономось Андрей Александрович Алексин, маласо читнестэ видемань тевтне прядовить.
– Хозяйстванть весемезэ 2223 гектарт моданзо. Тень эйстэ ютазь сёксня видезь 411 гектар озимой товзюро. Тедедень тунда видевсть 317 гектарт шуж, яровой товзюродонть – 103 гектарт, 189 гектарт – кснав. «Ремезёнское» велень хозяйствань предприятиясь истя жо три-касты ракшат. Сынст андоманть туртов видезь 300 гектарт веиень тикшеть, 152 гектарт лововить ламо иень тикшетнеде, конатне видезь икеле иетнестэ ды малав 80 гектарт видевить тедеде. Истя жо 236 гектарт видеви силосокс кукуруза, – ёвтнесь Андрей Алексин.
Те иестэ «Ремезёнское» ООО-со ламбамо якстерькайденть видевсть 400 гектарт. Неть читнестэ сонзэ коряс весе тевтнень прядызь, кундасть кукурузань видемантень.
Теде башка, хозяйствасонть гербицидсэ валныть озимой сюротнень. Сынст прядозь, важодицятне кундыть яровой сюротнень валномантень.
Кода ёвтнесь хозяйствань агрономось, важодеманть туртов «Ремезёнское» ООО-сонть ули весе эрявикс техникась ды агрегаттнэ. Тундонь тевтнень вадрясто ютавтомга рамазь «Амазоне» пургсемка ды неень шкань технологиятнень коряс эрязасто важодиця видемань агрегат. Техникась вадря, механизатортнэнь мельс тукшны. Мелявтовты вейкесь – важодицятне а сатныть. Хозяйствасонть важодицятнестэ седе покш пельксэсь – пенсиясо эли пенсиянь иетнес пачколиця ломанть. Ды истятнэяк иестэ иес аламолгадыть. Од ломантне жо велень хозяйствасо важодемантень а бажить, куш пандытькак тень кисэ вадря зарплата.
Паксянь азорт
Эсь хозяйствань паксятнесэ сынь содасызь эрьва губорькскенть ды эрьва лашмонть, содыть, косо модатне коськить васенцекс, козонь жо кизэнть самс а совават кодамояк тракторсо. Сынь паксянь алкуксонь азорт. Нама, неть механизатортнэ. Сокамонь-видемань, тикшетнень анокстамонь, сюротнень нуемань ды весе лия шкатнестэ велень хозяйствань прявт ломантне, конатнень эйстэ ламова ашти сюпав норовось.
Механизаторось Олег Анатольевич Наумкин «Ремезёнское» ООО-со роботы уш зярыя иеть, сась сеске школанть прядомадо мейле.
– Минек од шкасто тракторонь руль экшсэ важодеманть туртов праватнень максыльть школасо тонавтнемстэ. Сестэ меельце классо тонавтнемстэ весе цёраэйкакштнень туртов ветясть тракторонь коряс урокт, косо тонавтсть велень хозяйствань техникасо важодемантень. Тевесь ульнесь паро ды эрявикс, – корты Олег Наумкин. – Трактористэкс анокольть уш школань парта экшстэ.
Секскак колхозсо важодемань кинть Олег Анатольевич ушодызе тракторонь руль экшсэ. Ды аволь школасо тонавтнемась лездась тенень. Цёранть туртов те ульнесь малавикс вишка шкасто саезь. Велень хозяйстванть марто сюлмавозель весе семияст – тетязо эрямонзо перть ульнесь механизаторокс, авазо роботась ветврачокс. Те коесь эзь колаво нейгак. Наумкинтнэнь семиясь – велень алкуксонь трудий ломанть. Олег Анатольевичень низэ, Наталья Николаевна, важоди фермасо, цёраст, Дмитрий, теке хозяйствасонть роботы механикекс, техникантень вечкемась сонензэ ютась тетянзо ды покштянзо пельде. Теке марто од ломанесь ёроков аволь ансяк тракторонь-комбайнань руль экшсэ, витнемасосткак весементь пек парсте чарькоди.
А вана Филипп Васильевич Наумкин «Ремезёнское» ООО-со механизаторокс роботы уш малав 44 иеть. Весе те шканть перть варчнесь эрьва кодамо техника. Роботась ГАЗ-53 автомашинасо, КамАЗ-со, эрьва кодамо тракторсо ды седе тов.
Школанть прядомадо мейле тонавтнесь ДОСААФ-со, макссть тензэ прават ды тусь армияв. Службанть ютазь, иешка эрясь ды роботась Саранскойсэ. Ошсо эрямось цёранть мельс эзь туе, сон велявтсь тиринь велев. Те шкастонть саезь весе эрямозо сюлмавозь тиринь Эрьмезёнканть ды тесэнь хозяйстванть марто.
– Васень шкасто зярсыя роботынь ГАЗ-53 автомашинасонть. Сеть шкатнестэ те ульнесь сехте вадря машина, – тешкстась Филипп Васильевич.
Ней механизаторонть техниказо – «Кировец» тракторось. Истя жо сеедьстэ ойси КамАЗ автомашинань руль экшс.
Мода лангсо ламо иень перть вадрясто важодеманть кисэ Филипп Васильевичнень максозь «Мордовия Республикань велень хозяйствань заслуженной роботник» лемесь, истя жо сон трудонь ветеран.
Александр Николаевич Коробков истя жо роботы механизаторокс уш малав 30 иеть. Сон тракторсояк роботы, тикшень ледема ды сенажонь анокстамо шкастонть комбайнасояк.
Александр Коробков видеманть ветясь аволь умок рамазь од агрегатсонть. Механизаторонть мельс техникась тусь.
– Неень шкань техникась, мезе иля корта, вадря. Сон арсезь важодеманть эрязасто топавтомга. Видемань те агрегатсонть а марявияк кода куроксто ютавить гектартнэ, – тешкстась механизаторось.
Александр Коробковонь марто лездыцякс важодсь од цёрась Павел Григорьев. Сон тонавтни Отяжелень аграрной техникумсо. Эрьмезёнкань велень хозяйствань предприятиянть кочкизе практикань ютавтома таркакс.
– Практиканть мон тесэ ютан уш омбоце ие. Пек вечкеви тень. Хозяйствасонть важодиця механизатортнэ – алкуксонь профессионалт, сынст пельде ули мезес тонавтнемс, – мерсь сы шкань механизаторось.
Арсеви, од цёрась аволь ансяк практиканть тесэ ютавтсы, тонавтнеманть прядомадо мейле сы важодеме. Эдь тесэ од специалисттнэнь пек учить.
Юлия Еремина
Фототне Эдуард Ретунскиень