Пятница, марта 29, 2024
Важное

Ицялбуень «Агропромсервис» ООО-нь паксятнесэ сюротнень пивсэмась ушодовсь июлень 30-це чистэ. Теде тенек пачтясь прявтось В. И. Нужнов. Минь капшазевинек вастовомс предприятиясонть важодицятнень марто, конат роботыть Кельме лисьмапря (Холодные ключи) вакссо аштиця тинге лангсо. Сюротне кенерсть, паксятнесэ важодемась лаказь лаки. Ушоськак кецявты псисэ, маней читнесэ.



Агрономось Александр Михайлович Петрунин ёвтнесь, ней пивсыть озимой товзюро. Сондензэ видезь 1500 гектарт. Вейке гектарсто саить 40 центнерт. Паксятнесэ нуить кавксо комбайнат: сынст ютксо аволь умок рамазь «Ростсельмашось», «Акрост», «Класст».

– Те тинге лангсонть ашти калибровочной зерновой станция. Тей ускить паксятнестэ весе товзюронть. Сон каяви кавто латкова. Сюрось трубава кепедеви верев, мейле понги сепаратортнэс, конатнесэ улить калибровочной сувтеметь. Истя юты понжавтомась. Станциясь панси шукшонть, зыян тикшиненть, лукшонть. Томбазь товзюрось ве ёнов, парось – ве ёнов, мезесь-бути туи фуражной зёрнакс. Часос КЗС-нь вейке ёнксось (эйстэст кавто) ванськавты 50 тоннат. Товзюрось ускови ванстомс утомс. Сон эряви ракшань андомс, кадомс видьмексэкс ды седе тов. Видьмексэкс кадынек 350 тоннат «Скипетр» сортонь товзюро. КЗС-нть важодеманзо мельга пштистэ ваны оператор. Те тевенть топавты Андрей Афонин. Тинге лангсонть важодить ниле ават, – пачтясь Александр Петрунин.

«Агропромсервис» ООО-со агрономокс сон важоди 2016 иестэ саезь. Чачсь Ромодановань райононь Вырыпаева велесэ. Школанть прядомадо мейле кармакшнось тонавтнеме историянь факультетсэ, ансяк чарькодсь: те аволь сонзэ тевесь. Тусь армияв служамо. Тосто самодо мейле прядызе Н. П. Огарёв лемсэ Аграрной институтонть. Вадря примерэкс, васенце лездыцякс, превс путыцякс тензэ кармась тетязо. Михаил Иванович кувать важодсь Ромодановань районсо агрономокс. Истя, сонзэ киява тусь цёразояк, важодемась тензэ вечкеви, косояк лиясо а неи эсь прянзо.

Иван Николаевич Огурцов те хозяйствасонть роботы 2019 иестэ саезь. Сон чачсь Орданьбуесэ. Ней семиянзо марто эри Станция Оброчное посёлкасо. Сыненст вечкевсь районось, лиссь важодема таркаяк. Цёрась кармась тонавтнеме Кемлянь аграрной колледжсэ. Иван важоди водителекс. Ардтни ГАЗ-53 машинасо. Сон ускси КЗС-в ды утомс сюро, паксястояк ускси, бути а сатныть машинат.
Михаил Евгеньевич Сесоров важоди погрузчиксэ водителекс. Ульянки велень эрицясь тесэ роботы ансяк васенце ие. Кепси сюротнень машинас, пешти сынст апак лотксе. Товзюрось туи складс эли ускови элеваторов.

Кода а ёвтнемс тинге лангсо важодиця тейтерь-аватнеде? Вера Ивановна Шикова эри кавтонь таркава: тельня – Саранскойсэ, кизна – Конезаводсо. Колмоце кизэ сон важоди тинге лангсо.
– Тесэ минь ледстнетяно эйкакшпингенек, кода аванок-бабанок марто свал якинек лездамо тинге лангов. А ёвтавияк, кодамо ёжось паро, зярдо несынек тей ардыця сюро марто васенце машинанть! Мейлеяк эрьва машинанть васттано мельспаросо, – ёвтни Вера Ивановна.
Марина Александровна Хлевина лиссь пенсияв ды сон васенце ие тинге лангсо. Эсь шкасто важодсь тонавтыцякс, мейле киртизь, кемень иеть роботась Конезаводсо скалонь потявтыцякс. Важодезь, вейке-вейкень марто кортнезь, тесэ шкаськак а маряви, кода юты. Валонзо коряс, тинге лангс од ломантне а капшить самс, тесэ малав весе пенсионерт.

Ялатеке, тедеде понгсь юткозост од тейтерьгак – Марина Дупленкова. Сон – Конезаводонь. Тонавтни Кемлянь аграрной колледжсэ, 3 курссо, «Экономика и бухгалтерский учет» специальностенть коряс. Икеле иетнестэяк Марина сакшныль тей лездамо. Аватне шнызь тейтеренть: сеске весементь чарькоди, кармавтомс ды тонавтомс а эряви. Соды, кода тенсемс, кода ванськавтомс. Тинге лангсо сынь важодить сменасо, валске кавксо чассто саезь ниле часос, мейле полавтсызь лият.

«Агропромсервис» ООО-нь паксятнесэ тедеде видсть 2 тёжат гектарт шуж, 200 гектарт зёрнакс ды 200 гектарт силосокс кукуруза, 1793 гектарт ламбамо якстерькай, 150 гектарт тикшеть. Товзюронь пивсэманть прядомадо мейле кармить нуеме шужонть.

Татьяна Маторкина
Фототне
Эдуард РЕТУНСКИЕНЬ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».