Воскресенье, июля 21, 2024
Важное

Весе минь содатано, велень хозяйствасо важодицятнень туртов оймсема шкат а эрсить. Сынь трудить эрьва чистэ. Эзть кенере прядовомо видемань тевтне, вана уш ушодовсь ракшатнень туртов теленень тикшетнень-андомапельтнень анокстамось. Васняяк ледить-пурныть ламо иень тикшетнень, а кенерят кончтамс сельмесэ, кода мельгаст кенерить веиенсетнеяк.

Нетненьгак эряви кенеремс урядамс шкастост. Тикшетнень-андомапельтнень анокстамонть марто вейке эскелькссэ моли сюротнень, кукурузанть ды ламбамо якстерькаенть гербицидтнэсэ пургсемась. Эряви ёвтамс, республикань малав весе паксятнесэ пургсемань тевтне прядовома лангсот.

Неть читнестэ минь ульнинек инжекс Ромодановань райононь «ООО Мордовское агропромышленное объединение и компания» ТНВ-сэнть. Тешкстасынек, «ООО МАПО и К» ТНВ-сь – Мордовия Республикань велень хозяйствань покш предприятиятнестэ вейкесь. Неень шкасто сон важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь ёнкстнэсэ. Те хозяйстванть прявтсо уш ламо иеть важоди ёроков, эсензэ тевензэ содыця ды алкуксонь аграрникесь Николай Всеволодович Ютяев, кона келейстэ тенек ёвтнесь, кода  молить тевтне сынст хозяйствасонть. Николай Всеволодович кортась, важодемась предприятиясонть лаказь лаки. Тундонь видемань тевтне топавтозь шкастост ды вадрясто, эдь прявтонть вановтонзо ало важодить алкуксонь специалистт, ломанть, конатне весе виест путыть велень хозяйствасо важодемантень. Секскак Николай Всеволодович а талны, соды, истямо неже марто хозяйстванть тевензэ свал кармить ютамо икелев. 

Эряви ёвтамс, «ООО МАПО и К» ТНВ-нть юрс совить зярыя отделеният: Пятинань, Вишка Березникень, Кочуновань (Ромодановань район) ды Эрьмезёнкань (Чаунзань район). Кода тешкстась прявтось, неень шкантень важодемась ветяви весе отделениятнесэ. Зярс ушолксось маней ды пси, эряви кенеремс анокстамс тикшетнень ды пургсемс весе видьметнень.

Истя, Николай Всеволодович тердимизь эсенек сельмесэ варштамс, кода молить тевтне хозяйствань паксятнесэ. Ды минь шкань апак таргсе сыргинек килангов – Пятина велень отделениянь паксясо важодицятнень марто вастовомо.

Васняяк вастовинек ды кортнинек коромонь урядыця комбайнёртнэнь марто, конатне важодсть Пятина веледенть аволь васоло.  Тесэ пурнасть меельце тикшенть. Вейке агрегатонть руль экшсэ важодсь дока ды тевензэ вечкиця комбайнёрось Александр Николаевич Кемаев. Велень хозяйствасо сон важоди малав 31 ие. Чачома тарказо – Отяжелень райононь Трокс Кужо велесь.

Велень хозяйствань тевтнес чопавтинь армиядо мейле. Важодемась пек тусь мелезэнь. Васня роботынь Отяжелень райононь хозяйствасо, а кода урьвакстынь, козяйкан марто сынек эрямо Ромодановань райононь Лыковщина велев. Надежда ним эрямонзо  перть важоди  «ООО МАПО и К» ТНВ-нь бухгалтериясо. Минь весе оймевиенек путтано тесэ важодемантень, – мельспаросо ёвтни комбайнёрось.

Паксятнесэ мольсь пси важодема. Веенст важодицятне анокстасть тикшетнень, омбонстнэ – пургсесть. Шабра паксясонть пургсемась топавтовсь «Джон Дир» ды «Агрифак» самоходной пургсемань техникатнесэ. Васенценть руль экшсэ озадоль Анатолий Михайлович Хранов. Сонзэ чачома ёнксозо – Саратовань областесь. Вишкапингстэ тетянзо-аванзо састь эрямо Мордовияв. Неень шкасто важодицясь эри Лыковщина велесэ.

«ООО МАПО и К» ТНВ-нь хозяйствасонть ушодынь важодеме 2006 иестэ саезь. Ладимизь ракшань андыцякс, мейле – механизаторокс ды вана омбоце ие уш, кода важодян пургсемань техникасонть. Велень хозяйствасо важодемась – те монь эрямом. Кодамояк лия профессиясо эсень прям а неян, – корты Анатолий Михайлович.

Седе тов кортамонть поладынек Владислав Потапов марто. Цёрабаенть туртов ансяк 18 иеть. Неень шкасто цёрась топавты ведень усксицянь тевенть. Эряви ёвтамс, велень хозяйствас Владислав важодеме сась эштё пиже цёрынекс.

Васенцеде озынь комбайнас, зярдо тень топодсть ансяк 7 иеть. Ладимизь тетянь ваксс комбайнасо лездыцякс. Самай се чистэнть саезь мон чопавтинь велень хозяйствасо важодемантень. Эрьва кизэ сакшнан тей механизаторокс важодеме. Тевесь монь мельс пек тукшны, секскак техникумонть прядомадо мейле лия важодема тарка вешнеме а карман, сон монь чачомстон уш ёвтазь, – мизолдозь корты од специалистэсь.

Мейле вастовинек Алексей Иванович Курбаков управляющеенть марто.  Велень хозяйствасо сон важоди малав 15 иеть. Ушодсь прявт экономистэнь тевстэнть, мейле ладизь прявт бухгалтерэкс, ютазь иестэ сон кармась Кочунова велень омбоце отделениянь управляющеекс. Алексей Иванович нурькинестэ ёвтнесь, кода сонзэ отделениясо молить тевтне.

Неень шкасто отделениясонть важодить малав 100 ломанть. Сынь весе алкуксонь важодицят, конатне вечксызь ды вадрясто содасызь эсест тевест. Кода лия отделениятнеяк, минекеськак важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь ёнкстнэсэ. Эряви ёвтамс, эсенек тевенек топавттано ёроковсто ды шкастонзо. Ломантне важодить чинь-чоп, вана нейгак весе паксясот, кить пургсить, кить анокстыть тикшеть-андомапельть. Велень хозяйствань тевтненень арась пе, секскак тей сыть роботамо сеть, кить а пелить важодемадо, – корты Алексей Иванович.

Минь а мольтяно неть валтнэнь каршо. Тешкстасынек, неень шкасто Мордовиянь агропромышленной ёнкссонть важодить малав 80 тёжат ломанть: сынст ютксо паксятнесэ ды ферматнесэ важодицят, велень хозяйствань ды перерабатывающей предприятиятнень, фермерэнь хозяйстватнень руководительть ды специалистт. Мордовиянь агропромышленной комплексэсь эрязасто виевгады ды теньсэ покш виесь ды лезэсь, нама, трудий ломантнень. Эдь сынь чиде-чис бажить эсест важодемасост теемс покш путовкс республикантень ды целанек масторонтень. 

Алена Артемьева

Фототне

Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».