Пятница, марта 29, 2024
Важное

Мордовиянь «Торгово-промышленной палата» вейсэндявксось ютавтсь экскурсия «Станкостроитель» Саранскоень ОАО-со. Неень шкане те тевенть лемдить промышленной туризмакс.

Вастовомантень пурнавкшность минек ёнксонь предпринимательтне, школасо тонавтницятне, журналисттнэ.

«Станкостроитель» заводось ушодызе кинзэ 1979 иестэ. Течи – те вейкине станкостроительной предприятия Мордовиясо. Сон зани 50 тёжат кавонзазь метрат. Тесэ ламо цехть. Заводось теи профилированиянь линия, конась тевс нолдави металлочерепицань, профлистэнь нолдамсто. Ушодсть нолдамо велень хозяйствань, автомобильной промышленностень, вагоностроениянь производства (эрявикс эчкелмасо вагононь латот ды вагононь бокат). Нолдыть эрьва кодат пресст. Оборудованиясь эсест, советской шкань ды меельце шкасто нолдазь.

Экскурсиянть ветясь заводонь прявтось Дмитрий Иванович Огрин. Сон паро мельсэ ды домкасто ёвтнесь эсь тевдест. Тесэ важодить 300 ламо ломанть. Аволь эрьвась анок тесэ роботамс. Эрявить ламо вийть, содамочить, чарькодемс тевенть. Содазь, кшнинть кери оборудованиясь, мезе эряви – теить станоктне, ансяк ломанень кедтеме мезеяк а теят.
Заводонь крантнэ кепсить покш сталмот – 10 тоннань, 250 тоннань. Тесэ нолдазь оборудованиясь тевс нолдави аволь ансяк минек масторсо, сонзэ рамсить Италиясо, Ирландиясо, Германиясо, Казахстансо ды лия таркатнесэ. Сынст продукциясь вадря, эрявикс ды вешевикс эрьва косо.
Те заводсонть ули Саранскоень промышленно-экономической колледжень производственной площадка.

– Од ломантне тесэ тонавтнить классо ды ютыть практика токарной станоктнесэ. Варчить виест сварщикень, фрезеровщикень, вальцовщикень тевтнесэ, тонавтнить важодеме плазменной ды лазерной установкатнесэ операторокс. Тесэ лисить алкуксонь специалистт. Ламот кадовить важодеме теске, – ёвтнесь заводонь прявтось Д.И. Огрин.

Эряви меремс, зарплатась тесэ паро. Заводось свал учи од ломанть, од вийть, сырнень кедть. Экскурсиясь тусь мельс эрьвантень, весе минь теевинек содавиксэкс дивавтыця покш тев марто.

Татьяна Маторкина.
Фотось: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».