Те иень кизна пертьпельксэсь казсь тенек ламо пси чить. Велень эрицятне, сюронь-мезень кастыцятне пек учость пиземеть. Эдь теде ашти, кодамо урожай сынь кастыть паксятнесэ, зяро пурныть сюродонть ды лия касовкстнэде.
Сась кизэнь тёкшось, ушодовсь нуемань шкась. Недляшкань ютазь менелесь копачавсь тусто пельсэ ды кой-кува кармасть валомо виев пиземеть.
Сень содазь, кода аштить тевтне Покш Игнатбуень «8-ое Марта» ООО-со, минь сыргинек те райононь Ташто Чамза велев. Сонзэ песэ, кода те шкас кортыть тосонь эрицятне, ашти конторась. Куш икелень чистэнть кортынек вастовомадо те хозяйствань агрономонть Валерий Евгеньевич Левщанов марто, те ломанесь кабинетсэ арасель, кода эрявияк те профессиянь топавтыцянтень, сон сеедьстэ эрси паксясо. Те чистэнть прась уцяска теевемс содавиксэкс Мордовия Республикань Велень хозяйствань почётной роботникенть, «8-ое Марта» ООО-нь прявтонть Николай Иванович Куманёв марто. Те ломанесь, ловт, весе пингензэ алтызе велетнень виевгавтомантень, тосо эриця ломантнень эрямост шождалгавтомантень.
Виде, се чистэнть, кода минь ульнинек те хозяйствасонть, пиземеде мейле летькенть кувалма комбайнатне валске марто эзть лисе паксяв нуеме, учость, зярдо сорксты модась. Тень лангс апак вано, ульнесь мезде кортнемс те хозяйствань прявтонть ды тосо важодицятнень марто.
Кода пачтясь тенек Николай Иванович Куманёв, те хозяйствасонть трить-кастыть ракшат, ули фермаст, косо ладязь неень шкань оборудования, сокить модат, кастыть эрьва кодат культурат.
Неень шкасто ловсонь-товарной фермасо трявить-кирдевить малав 1500 сюракшов ракшат. Сынст эйстэ 400 ламо потявтовиця скалт. Прядовома лангсо вазтнэнень од кардонь теемась, косо кармить кирдевеме ансяк вазыязтне, тов кельгить малав 200 прят.
Велесэ важодемась аволь шожда тевтнестэ, тень содасызь весе. Неень шкане, зярдо лавкатнесэ эрьва мезенть лангс секе-тев касыть питнетне, пароль бу кастомс сынст велень хозяйствань продукциянь миицятнененьгак. Эдь сетне, кить сынст рамить ды нолдыть тевс, анок продукциянть кисэ саить а вишкине доход… Сон пек явови сетнень эйстэ, кить тенст тень кастыть-анокстыть. Невтемакс, ловсонть питнезэ тунь а идеви, себестоимостесь ков седе покш миеманзо коряс.
МТФ-нь отделениясонть течи важодить кодгемень ломанть. Неть: зоотехник, осеменатор, ветеринарной врач, ракша мельга якицят, скалонь потявтыцят ды лия тевень топавтыцят.
Истя, 2024 иестэ «8-ое Марта» ООО-нть видемань площадензэ 9598 гектарт мода. Сынст ютксо озимой товзюро – 1100 гектарт, яровой товзюро – 2300 гектарт, ламбамо якстерькай – 2528 гектарт ды истя седе тов. Тесэ кастыть кукуруза кода коромокс, истя зёрнакскак, веиень ды ламо иень тикшеть.
Модатнестэ ламось саезь арендас маласо велень эрицятнень кедьстэ. Тешкстасынек, весе вешематне, конат тешкстазь сынст ютксо договорсонть, шкастонзо топавтовить. Те, васняяк, моданть кисэ налогонь пандомась, ломантненень сюронь-мезень ды эрьва ёндонь лезксэнь максомась. Истят паро тевтне топавтовить маласо аштиця кавксо велень эрицятненень ды колмо велень поселениянь ломантненень, кить тенст максызь арендас паест.
Теде башка, сыненст сеедьстэ пшкалить апак учонь тевтнень лисемстэ, тельня китнень ловдо ванськавтомань, кизна зыянов тикшень ледемань коряс. Истя жо а кадновить ве ёнов сынст ёндо специальной военной операциянь участниктне ды сынст семиятне. Секе-тев максыть лезкс православной храмтненень.
Важодицятненень шкастонзо пандови зарплатась, ютазь иенть коряс те иестэ сон кепедевсь 20 процентс. Неень шкане те предприятиясонть важодить кавтосядто ламо ломанть. Ве ёно эрицятне роботамо ды мекев усксевить транспортсо.
Эрьва иестэ, Сыре ломанень ковстонть, явови мель предприятиянь ветерантнэнень, кить пингест алтызь велень хозяйствань тиринь предприятиянтень. Улить истят семият, косо икеле тесэ важодсть тетяст-аваст, ней сынст тевест поладыть эйкакшост. Самай истятнэнь вийсэ ванстовить велетне, а кадовить вановттомо покштятнень-бабатнень кудоюрттнэ.
Валентина Юдина